“Mənim ailəmi məhv edib, gərək buraxmayaydılar”

“Gərək buraxmayaydılar, əgər buraxıblarsa, mən daha nə deyə bilərəm?”
“Gündəm Xəbər” bildirir ki, bu sözləri azxeber.com-a açıqlamasında xalq artisti, məşhur tarzən Ağasəlim Abdullayev əfvə düşən Xalid Mədətov haqda deyib. O qeyd edib ki, əfv xəbərini bu gün mediadan oxuyub: “Mən də bu xəbəri mətbuatdan oxudum. Bu barədə artıq danışmaq istəmirəm. Çox yorulmuşam, əgər buraxıblarsa, mən daha nə deyə bilərəm?”

Qeyd edək ki, X.Mədətov 3 il əvvəl sərxoş vəziyyətdə “Gelandevagen” markalı avtomobili ilə qəza törətmiş, nəticədə tarzən Ağasəlim Abdullayevin həyat yoldaşı və nəvəsi ölmüşdü. Ona Bakı Ağır Cinayətlər Məhkəməsinin hökmü ilə 12 il həbs cəzası verilmişdi. O, cəzasının 3 ilini çəkdikdən sonra azadlığa buraxılıb. Bu hadisədən sonra Mübariz Mədətov vəzifəsindən kənarlaşdırılmışdı.
Məsələylə bağlı tanınmış vəkil Adəm Məmmədovun fikri də öyrənilib. Vəkil deyib ki, əfv sərəncamı birbaşa Prezidentin səlahiyyəti daxilində olan məsələdir və müzakirə predmeti olmamalıdır: “Əlbəttə, əfv etmək prezidentimizin müstəsna hüququdur”
Vəkil həmçinin bu məsələdə xalq artistinin ailəsinin də rolu ola biləcəyini deyib: “Ola bilər ki, zərərçəkmiş tərəf şikayətini geri götürüb və buna görə belə addım atılıb”.