“Bil ki, bir dəfə məni işimdən çıxartmışdılar, 15 min manat verib “ostanavit” oldum. Yenə də işdən çıxartsalar, ən azından 20 min verib “ostanavit” olacağam” deyir
Bu günlərdə Naftalan şəhər sakini Əsgərov Müşfiq Nizami oğlunun “Gündəm Xəbər”ə ünvanladığı müraciəti oxuduqca, az-çox əksər mətləblərdən xəbər tuta bildik. Belə ki, o, redaksiyamızın elektron poçtuna ünvanladığı müraciətində yazır ki, “mən olduqca imkansız şəxslərdən biriyəm və 2015-ci ildən şəhərin Həsənzadə küçəsinin yaxınlığında avtoyuyuculuqla məşğul oluram. Məşğul olduğum işim nə qədər çətin olsa da, dolanışığımız xatirinə belə bir addımımı atıb müəyyən təminatlarımızı birtəhər ödəyə bilirəm. Son vaxtlar isə, üz-üzə qaldığım problemin varlığı dolanışığımızın kəsilməsinə səbəb olub. Bunun da başlıca səbəbi, ərazi üzrə sahə müvəkkili vəzifəsini daşıyan polis kapitanı Orxan Nəsirovun, mənə “gün verib işıq verməməsi” olur. Belə ki, adı çəkilən şəxs 2017-ci ilin fevral ayından mənə təzyiqlər etməyə başladı və şəxsi avtomobilini gündəlik pulsuz yumağı qarşıma şərt də qoydu. Atdığı addımı azmış kimi, aylıq “haqq” verməyimi də tələb etdi. Elə ki, Orxan Nəsirova etdiyi hərəkətlərlə bağlı aidiyyəti qurumlara şikayət edəcəyimi bildirirəm, o halda o, “get kimə istəyirsən şikayətini et, mən nə bir kimsədən qorxuram, nə də çəkinirəm. Çünki, arxa-dayağım Naftalan polisinin rəisi Ziya müəllimdir. Mən onunla hesablaşıram və lazım gəldikdə onu da “görürəm”. Tutaq ki, şikayət etdin və məni daşıdığım vəzifəmdən çıxartdılar, nə dəyişəcək? Bil ki, bir dəfə məni işimdən çıxartmışdılar, 15 min manat verib “ostanavit” oldum. Yenə də işdən çıxartsalar, ən azından 20 min verib “ostanavit” olacağam” deyir. Belə olan halda DİN-i cənab Ramil Usubovdan daxili işlər orqanlarında çalışan və polis adıyla uzlaşmayan, həmçinin çoxsaylı problemlərin də əmələ gəlməsinə səbəb olan sahə müvəkkilinin əməllərini diqqətdə saxlamasını xahiş edirəm. Yəqin ki, o halda “əndazəni aşan” Orxan Nəsirov özünü “yığışdırmalı olacaq”.
Belə bir məlumatların xəbər portalımıza göndərilməsi və yaşanan olayların ictimailəşdirilməsinin xahiş olunması və s. onu söyləməyə əsas verir ki, sahə müvəkkilinin atdığı addımlar, məhz vətəndaş polis münasibətlərinə xələl gətirən addımlardır. Digər tərfdən isə, halal zəhmətinin müqabilində əmək fəaliyyəti ilə məşğul olan Müşfiq Əsgərovun müəyyən təzyiqlərlə, şərtlərlə üz-üzə qalması da, heç cür yolverilməz haldır. Ən azından imkansız bir şəxsin dolanışığının kəsilməsi yöndə atılan addım da, nə mənəvi, nə də ki, hüquqi baxımdan yoverilməzdir. Baş verənlərə diqqət yetirib belə bir qənaətə də gəlmək olar ki, bu gün müəyyən problemlər içərisində yaşayan və dolanışığının təmin olunması məqsədilə zəhmət çəkən Naftalan sakininin yeni bir problemə düçar edilməsi, əslində ölkə rəhbəri cənab İlham Əliyevin aztəminatlı ailələrlə bağlı vermiş olduğu tapşırıqlarla ziddiyyət təşkil edir.
Hörmətli oxucular! Dərc etdiyimiz açıqlamada sadalanan olaylar Naftalan şəhər sakini Əsgərov Müşfiq Nizami oğluna məxsus olduğundan, hələlik problemin varlığı haqda geniş açıqlama dərc edə bilmirik. Amma çalışacağıq ki, bu yöndə araşdırmalarımızı davam etdirək ki, növbəti saylarımızda daha ətraflı açıqlamalar da dərc edə bilək.
Qarşı tərəfin də mövqeyini dinləyə bilərik.

Aslan