İcra başçısının biznes maraqları etirazları gücləndirir; Rayonu sosial problemlərin əsirinə çevirən başçının karyerası ilə bağlı yaxın günlərdə qərar veriləcəyi bildirilir
Demək olar ki, hər gün respublikanın əyalətlərindən müxtəlif məsələlərlə bağlı şikayətlər eşidirik. Bu şikayətlərin yarıdan çoxu məmur özbaşınalığı ilə bağlıdır. Ölkə rəhbəri son aylar ərzində yerli və mərkəzi icra hakimiyyəti orqanlarının rəhbər şəxslərini vətəndaşları incitməmələri barədə xəbərdar etsə də, bəziləri sanki özlərini eşitməzliyə vurublar. Belə ki, onlar prezidentin tənqidlərinə ötəri münasibət bəsləyərək özlərinin təyin etdiyi "qanunlarla" idaretmə üsulu yaratmağa çalışırlar.
Belə olan təqdirdə də vətəndaşlar bir sıra problemlərin əlində aciz qalırlar və haqlı şəkildə buna narazılıqlarını bildirirlər. Sosial problemlərin məngənəsində sıxılan, eyni zamanda məmur özbaşınalıqlarından əziyyət çəkən bölgələrimizdən biri də Cəlilabad rayonudur. Rayon sakinlərinin mətbuata ünvanladıqları müraciətlərdə qeyd edilir ki, İcra Hakimiyyətinin başçısı Əziz Əzizov vətəndaşlara saymazyana rəftar göstərərək özünü sanki rayonun sahibi kimi aparmaq istəyir: "Axır zamanlar rayonda özbaşınalıqların daha da artması insanların etirazı ilə nəticələnib. Rayon sosial problemlərin əsirinə çevrilib. Cəlilabadda insanların normal yaşaya bilməsi üçün heç nə yoxdur. İnsanlar nə edəcəklərini, hara gedəcəklərini, kimdən kömək istəyəcəklərini bilmirlər. Bura bir qrup məmurun şəxsi qazanc mənbəyidir. Rayonda fəaliyyət göstərən müxtəlif dövlət idarə və müəssisələrində qanunsuzluqlar baş alıb gedir. İcra başçısı bunlara bir dəfə də olsa reaksiya verib, nəysə ölçü götürmür. Biz icra başçısının qəbuluna düşüb ona sözümüzü deyə bilmirik. Camaat çox pis vəziyyətdə yaşayır. Cəlilabadın elə kəndləri var ki, icra başçısı illərlə ora ayaq basmır. Həmin kəndlərin sakinləri ağır şəraitdə yaşayırlar. Rayonun gözə görünən yerlərini təmir etməklə iş bitmir. Ən böyük problem işsizliklə bağlıdır. Televiziyada göstərirlər ki, rayonda filan qədər iş yerləri açılıb. Nədənsə bizim bundan xəbərimiz yoxdur. Çünki həmin iş yerlərində ancaq Əziz Əzizovun və digər məmurların yaxınları işlə təmin ediliblər". Şikayətçilər daha sonra müraciətlərində söyləyirlər ki, son 7 il ərzində, daha dəqiq söyləsək, icra başçısı rayona rəhbərlik etməyə başlayandan sonra Cəlilabadın mərkəzində və turizm bölgələrində bir qarış da boş yer qalmayıb: "İcra hakiminin tapşırıqlarını yerinə yetirən xüsusi adamlar rayondakı boş torpaqların hamısını satıblar.
Hətta rayonun şimal hissəsində qəbristanlıq üçün nəzərdə tutulan ərazi də pay torpağı kimi vətəndaşlara satılır. Bununla yanaşı, rayon təhsil şöbəsinin qarşısı, uşaq bağçalarının əraziləri, avtobus dayanacaqları da kommersiya obyektləri yaratmaq üçün satılıb. Başçının qanunsuz işlərinə "dur" deyən yoxdur. Prezident rayona səfər edəndə başçı ona bildirdi ki, abadlıq işlərini Rayon İcra Hakimiyyəti həyata keçirib. Bu yalan idi. Ona görə ki, rayonda görülən bütün təmir-tikinti işlərinin maliyyə hesabını sahibkarlar ödəyib. Rayon rəhbəri onları təyinatlarından kənar işlərə məcbur edir. Bu da sonda sahibkarlığın inkişafdan qalmasına gətirib çıxarır. İcra başçısı 1996-2006-cı illərdə bizneslə məşğul olub. Bu gün də biznes maraqlarından qalmayan başçı rayonun ayrı-ayrı yerlərində ticarət obyektləri tikdirib.
Onun həmçinin Bakıda və Sumqayıtda da biznes şəbəkəsi mövcuddur". Məlumata əsasən, adıçəkilən məmur komitə sədrlərindən biri ilə şərikli olaraq rayonda spirtli içki sahəsini də monopoliyaya almağa nail olub: "Rayonun Alar kəndində sabiq nazir Fərhad Əliyevin adamlarına məxsus bəzi obyektlər, torpaq sahələri və üzüm bağları icra başçısının əlinə keçib. İcra başçısının fəaliyyəti ərzində Cəlilabadda saxta araq biznesi və qanunsuz spirtli içkilərin hazırlanması çoxalıb. Həmin içkilər daha çox Şirvan və Muğan zonalarındakı şadlıq evlərinə satılır". Qeyd olunan məlumatlardan sonra bu qənaətə gəldik ki, artıq Əziz Əzizovun Cəlilabadda vəzifəsini davam etdirməsi qeyri-mümkün olan bir işdir. Hesab edirik ki, yuxarı dairələr icra başçısının fəaliyyətini hərtərəfli yoxlayaraq onun postundan alınması barədə qərar qəbul edəcəklər.
Xalid