Ədliyyə Nazirliyinin Pentensiar Xidməti 16 saylı Cəzaçəkmə Müəssisəsində cəza çəkən məhbusların qiyam qaldırması ilə bağlı yayılan informasiyaya aydınlıq gətirib. Bu barədə Movqe.az-a açıqlama verən Pentensiar Xidmətin ictimaiyyətlə əlaqələr şöbəsinin rəisi Mehman Sadıqov bildirib ki, bu gün 16 saylı cəzaçəkmə müəssisəsində bir qrup məhkum müəssisənin daxili intizam qaydalarına zidd olan imtiyazlar tələb ediblər: "Onların bu tələbi cəzaçəkmə müəssisəsinin rəhbərliyi tərəfindən rədd edilib. Amma həmin məhkumlar bu imtiyazları tələb etməkdə israrlı olduqlarını nümayiş etdirərək daxili intizam qaydalarını pozublar. Bu zaman həmin məhkumlara qarşı qanuna müvafiq vasitələr tətbiq olunub. Həmin məhkumlar digər məhkumlardan təcrid olunaraq cərimə otaqlarına salınıblar”. M. Sadıqov bildirdi ki, məhkumların özünəxəsarət yetirməsi ilə bağlı məlumat yalandır: "Onlardan hər hansı biri özünəxəsarət yetirməyib. Həbsxanada üsyan qaldırılması məlumatı da doğru deyil. Pentensiar Xidmət cəzaçəkmə müəssisələrində hər bir qanundan kənar halların qarşısını alır və bundan sonra da istənilən qanunua-zidd hərəkətlətin qarşısı qətiyyətlə alınacaq.”.
Qeyd edək ki, AzNews.az saytına 16 saylı cəzaçəkmə müəssisəsində məhbusların qiyam qaldırması ilə bağlı məlumat daxil olub. Məlumatda bildirilir ki, həbsxanada cəzaçəkən məhkumlar saxlanma şəraitlərinin yaxşılaşdırılmasını və rəhbərliyin məhkumlarla davranışlarının yumşaldılmasını tələb ediblər. Həbsxanada baş verən qalmaqala səbəb iki məhkumun özünü doğraması olub. Hadisəyə səbəb iki məhbusun həbsxanada telefon danışıqlarına nəzarət edən şəxsi vurması ilə başlayıb. Bunun ardınca isə həbsxana işçiləri yığışaraq həmin məhkumları çox möhkəm formada döyüblər. Həbsxana əməkdaşları tərəfindən möhkəm döyülən məhkumlar isə özlərini doğrayıblar. Hadisələr də məhz bundan sonra başlayıb. Həbsxanada cəza çəkən digər məhkumlar döyülən və özlərini doğrayan məhbus yoldaşlarının müdafiəsinə qalxıblar və "kolon”da rəhbərliyə qarşı üsyana qalxıblar. Həbsxanaya Ədliyyə nazirliyinin 6500 saylı mühafizə alayının xüsusi təyinatlı qrupu cəlb edilib. Baş verən hadisə ilə əlaqədar həbsxananın girişi bağlanıb və kənar şəxslərin yaxınlaşması qadağan edilib. Həbsxanadakı vəziyyətdən xəbər tutan məhbus yaxınları da 16 saylı cəzaçəkmə müəssisəsinin qarşısına toplaşıblar.