“Bu ölkəyə getməkdən çəkinin, terror aktları mümkündür”

Estoniyanın Xarici İşlər Nazirliyi Azərbaycana dair şok xəbərdarlıq yayıb. “MK-Estoniya” qəzetinin nazirliyin rəsmi saytına istinadən yaydığı xəbərdə deyilir ki, bu Baltik ölkəsi öz vətəndaşlarına “terror aktlarının mümkünlüyünə görə” Azərbaycana səfər etməkdən çəkinməyi tövsiyə edir.

Virtualaz.org yerli mətbuata istinadən xəbər verir ki, Estoniya XİN öz ölkəsinin vətəndaşlarına ilk növbədə Dağlıq Qarabağa səfər etməkdən çəkinməyi məsləhət görür. Bəyanatda bildirilir ki, Ermənistanla Azərbaycan arasındakı təmas xəttində atışmalar mümkündür. Estoniya XİN bu bölgədə aviasiya nəqliyyatından istifadənin də təhlükəsiz olmaya biləcəyini qeyd edir.

XİN əlavə edir ki, Azərbaycanda Estoniyanın nə səfirliyi, nə də fəxri konsulluğu var. Ona görə də Estoniya vətəndaşlarına konsul xidməti lazım olsa, onlar Latviyanın Bakıdakı səfirliyinə və ya Avropa İttifaqı ölkələrindən hansısa birinin yaxınlıqdakı nümayəndəliyinə müraciət etməlidir.

Estoniya XİN-in Azərbaycanda terror aktlarının mümkünlüyü barədə xəbərdarlığı hansı əsasla etdiyi məlum deyil. Xəbər iyulun 9-da Bakı vaxtı ilə saat 20:40-da yayıldığından və həmin vaxt iş günü başa çatdığından bu məsələ ilə bağlı Azərbaycan tərəfinin mövqeyini öyrənmək mümkün olmadı.