Hacı Allahşükür Paşazadə Almaniyadan neçə səbət "gilas" gətirib?
"Bu nə sualdır mənə verirsən? Kişi də başqasını izləyər? Onun "sumkalar"ını sayar? Onu yazanın kişiliyi yoxdur, heç ona cavab vermək də kişilikdən deyil. Xahiş edirəm bu söhbəti yığışdırın. Adam Almaniyadan çemodanla gəlir, jurnalistin nə ixtiyarı var ki, çemodanları eşələsin?". Bunu Teleqraf.com-a açıqlamasında Qafqaz Müsəlmanları İdarəsinin (QMİ) sədri, Şeyxülislam Hacı Allahşükür Paşazadənin qardaşı, millət vəkili Cavanşir Paşazadə şeyxin Almaniyadan "əlidolu" qayıtması barədə “Yeni Müsavat”ın yazdıqlarına münasibət bildirərkən qeyd edib.

Qəzet yazır ki, şeyx müalicəsini yarımçıq qoymaq məcburiyyətinə qalıb. "Qardaşı Cavanşir Paşazadə ilə görüşən Şeyx yüklərinin gətirilməsi ilə bağlı göstəriş verib. “90 AB 017" dövlət nömrə nişanlı xidməti avtomobilinə əyləşən Şeyxülislam 4 maşından ibarət xüsusi kortejin müşayiəti ilə hava limanından ayrılıb. Maraqlısı ilə Şeyxin çantalarla bağlı göstəriş verməsindən sonra üç maşının VİP salonu qarşısında yüklərin təyyarədən endirilməsini gözləməsi olub. Təxminən yarım saat gözləyən QMİ nümayəndələri iki böyük yük arabasından gətirilən ağır çantaları maşınlara yükləyiblər. Bu zaman maraqlı bir hadisə də yaşanıb, unudulan daha beş çantanı hava limanının işçiləri gətirərək QMİ nümayəndələrinə təqdim ediblər. Bu çantalar başqa bir maşına yüklənib.
Məlumata görə, Hacı Allahşükür Paşazadə uzun illərdir şəkərli diabet xəstəliyindən əziyyət çəkir. Şeyx Almaniyada özəl klinikaların birində xüsusi həkimlərin nəzarəti altında müalicəsini davam etdirir".

“Yeni Müsavat”ın yazdıqlarına qəzəblənən C.Paşazadə əlavə etdi ki, özünə hörmət edən adamlar bu cür yazıları oxumamalıdır: "Almaniyada konfet, gilas alıb gətirmişik...Boş-boş söhbətlərdi. Cavablar çoxdur, amma adam iyrənir cavab verməyə. Kimin arvadı nə geydi, nə aldı, belə şeylərdən yazırlar. Bunların sözü qurtarıb. Yazmağa mənalı heç nə tapa bilmirlər. Məgər şeyx əliboş gələndə səninlə məsləhətləşmişdi ki, indi də məsləhətləşsin? Belə şeyləri oxuyanda jurnalistika adamın gözündən düşür. Bəlkə düz deyil? Mənim oğlum, qardaşım oğlu, qardaşımın nəvələri bizimlə olub. Onların yükləri, uşaqların beşikləri, arabaları var. İki-üç yaşlı uşaqların gün ərzində neçə dəfə paltarı dəyişdirilir, siz bilirsiz. Bunu yazan jurnalist məgər belə şeyləri dərk eləmir? İnandırım sizi hətta şeyxi istəməyənlər belə bu yazını oxuyub əsəbləşirlər".