“Müalicə Müəssisəsində baş alıb gedən bu özbaşınalıqlara yuxarı orqanların biganə qalmaları bütün məhkumları narahat edir”

Penitensiar Xidmətə məxsus Cəzaçəkmə Müəssisələrində məhkumluq həyatı yaşayan Əmirov Elvin Vidadi oğlu, Fətəliyev Rasim Məzahir oğlu və Abdullayev Bayram Oruc oğlu hüquq müdafiəçisi Taleh Xasməmmədova məktub ünvanlayıblar. Bir nüsxəsi də AzNews.az-ın redaksiyasına göndərilən məktubda adı çəkilən məhkumlar həyatlarının təhlükədə olduğunu iddia edirlər.

Məktub müəllifləri yazır ki, Ədliyyə Nazirliyi Penitersiar Xidmətin Müalicə Müəssisəsinin Cərrahiyyə Şöbəsinin fəaliyyəti nəticəsində son zamanlarda həbsxanalarda ölüm halları artıb. Məhkumların iddiasına görə, Cərrahiyyə Şöbəsində cərrahiyyə əməliyyatları rüşvətlə aparılır. Bununla belə, həkimlərin yarıtmazlığı nəticəsində cərrahiyyə əməliyyatına məruz qalmış məhkumların səhhətlərində ağırlaşmalar baş verib. Məktubda bildirilir ki, hətta burada cərrahiyyə əməliyyatına məruz qalmış məhkumların bəziləri dünyalarını dəyişib, bəzilər isə ölümlə üz-üzə qalıblar.

Şikayətçilər iddia edir ki, səhhəti ağırlaşmış məhkumlar yenidən müayinə edilmək əvəzinə, əlavə pul verə bilmədikləri üçün yenidən Cəzaçəkmə Müəssisələrinə qaytarılırlar. Məktubda yazılır: “Belə məhkumlardan Əmirov Elvin Vidadi oğlu babasildən cərrahiyyə əməliyyatı olması üçün 550 manat rüşvət versə də, düzgün aparılmayan əməliyyat nəticəsində ölümlə üz-üzə qalıb və belə ağır vəziyyətdə cəza çəkdiyi müəssisəyə qaytarılıb. Mərhum Abdullayev Bayram Oruc oğlu isə həkimlərə verməyə pulu olmadığı və cərrahiyyə stolunda öldürüləcəyindən qorxuya düşdüyü üçün müalicədən imtina edərək, öz ərizəsi ilə Cəzaçəkmə Müəssisəsinə qaytarılıb”.

Məktub müəllifləri yazır ki, Müalicə Müəssisəsinin baş həkimi Bəhruz Mirzəyevin korrupsiya əməlləri nəticəsində adı çəkilən qurumda özbaşınalıq, qanunsuzluq baş alıb gedir.

Şikayətdə bildirilir ki, imkansız xəstə məhkumların müayinə və müalicəsinə heç bir şərait yaradılmır. İmkanlı sağlam məhkumlar isə rüşvət hesabına saxta xəstəlik sənədləri alaraq, uzun müddət xüsusi imtiyazlarla Müalicə Müəssisəsində qalırlar. Məktub müəllifləri daha sonra yazır: “Bunlardan biri məhkum Ələkbərov Şahlar Xəlil oğludur ki, onu babasil xəstəliyi müalicəsi adı ilə 9 aydır, Müalicə Müəssisəsində rüşvət hesabına saxlayırlar. Hansı ki, bu 9 ay ərzində çoxlu sayda xəstə məhkumları babasildən müalicə ediblər”.

Məhkumların iddiasına görə, Müalicə Müəssisəsinin bütün şöbələrində qeyd olunan formada analoji hallar baş alıb gedir.

Müalicə Müəssisəsində saxlanma şəraitindən də şikayətlənən məhkumları yazır ki, imkansız xəstə məhkumlar hətta yer olmadığından mətbəxdə stol-stulların üzərində, döşəmədə yatmalı olurlar: “Qidalanma çox pisdir, antisanitariya baş alıb gedir, sanitar qovşaqlar, hamam yararsız vəziyyətdədir, telefon danışıqları pulludur”.

Məktubda yazılır ki, Müalicə Müəssisəsində baş alıb gedən bu özbaşınalıqlara yuxarı orqanların biganə qalmaları bütün məhkumları narahat edir.

Qeyd edilir ki, Ombudsman Aparatının 2012-ci ilin yanvar ayının yekunlarına dair hesabatında Penitensiar Xidmətinin Müalicə Müəssisəsində, Cəzaçəkmə Müəssisəsinin tibb hissələrindəki yarıtmaz vəziyyət barədə Milli Məclisin iclasında məsələ qaldırılıb. Bununla belə, həmin dövrdən bəri Müalicə Müəssisəsinin fəaliyyətində irəliləmə müşahidə edilməyib.

Məktub müəllifləri mətbuat vasitəsilə Azərbaycan Respublikasının Prezidenti İlham Əliyevə, Ədliyyə Nazirliyi Tibb Baş İdarəsinin rəisi Rafael Mehdiyevə, İctimai Komitəyə, Ombudsmana və Beynəlxalq Qırmızı Xaç Komitəsinin Azərbaycandakı Nümayəndəliyinin rəhbərinə müraciət edib: Xahiş edirik, Penitensiar Xidmətin Müalicə Müəssisəsində baş alıb gedən korrupsiya, antisantariya, özbaşınalıq hallarının qarşısını alın və korrupsiyaya qurşanmış məmurlar barəsində təcili tədbirlər görün”.