“Xüsusi qurğularla təmin olunmamış avtomobillərlə təlim keçməyə icazə verilmir. Şəxsi maşınla kiməsə sürücülüyü öyrətmək üçün də təlim keçmək qadağandır”.
Bu sözləri açıqlamasında DİN Baş Dövlət Yol Polisi İdarəsinin İctimaiyyətlə əlaqələr şöbəsinin rəisi Kamran Əliyev deyib.

Şöbə rəisinin sözlərinə görə, təlim keçməyin öz qaydaları var.

“Təlim keçən şəxsin müvafiq lisenziyası olmalıdır. Həmçinin, təlim maşınlarında əlavə pedallar və arxanı göstərən güzgü olmalıdır. Bundan başqa, təlim keçənin ən azı 5 il sürücülük təcrübəsi olmalıdır. İlkin təlim qapalı meydançalarda və xüsusi yerlərdə keçilməlidir. Söhbət şəxsi ya hüquqi şəxsə məxsus maşından getmir. Təlim avtomobilini avadanlaşdırmaq məsələsi var. Yəni o təlimi keçən müəllimin də ayaqları altında əlavə əyləc pedalı olmalıdır ki, baş verə biləcək istənilən qəzanın qarşısı alınsın”.

DYP rəsmisi bildirib ki, bundan başqa, məsələ ilə bağlı ayrıca şərtlər də var. Belə ki, “Yol hərəkəti haqqında” Azərbaycan Respublikasının Qanunun 78-ci maddəsində “Sürmə təlimi” haqqında 5 əsas şərt göstərilir. Onlar aşağıdakılardır:
I. Nəqliyyat vasitələrinin idarə edilməsi üzrə ilkin təlim bağlı meydançalarda və ya avtodromlarda keçirilməlidir.
II. Yollarda sürmə təliminə yalnız təlim verən şəxsin iştirakı ilə və nəqliyyat vasitəsini sürməyi öyrənən şəxsin onu idarə etməkdə ilkin vərdişi olduqda yol verilir. Nəqliyyat vasitəsini sürməyi öyrənən şəxs bu qanunla nəzərdə tutulmuş yol hərəkəti qaydalarını bilməli və onun tələblərini yerinə yetirməlidir.
III. Sürmə təlimi verən şəxsin üstündə həmin kateqoriyalı nəqliyyat vasitəsini sürmə təlimi vermək hüququna dair sənəd və ya azı 5 il sürücülük stajına malik olmasına, habelə müvafiq kateqoriyalı nəqliyyat vasitəsini idarə etmək hüququna dair vəsiqə olmalıdır.
IV. Sürmə təlimi keçirilən mexaniki nəqliyyat vasitəsi «Təlim nəqliyyat vasitəsi» tanınma nişanı ilə işarələnməli və sürmə təlimi verən şəxs üçün arxanı göstərən güzgü və pedallar ilə təchiz olunmalıdır.
V. Siyahısı müəyyən edilmiş qaydada elan olunan yollarda sürmə təlimi qadağandır.

Qeyd edək ki, bu qaydaların pozulduğu bir təlim zamanı baş verən qəzadan bir neçə aydır ki, gənc xanım əziyyət çəkir. Söhbət Müsavat Partiyası Gənclər Təşkilatının sədr müavini Nigar Yaqubludan gedir. N.Yaqublu avqustun 25-də Bakı-Şamaxı yolunun 13-cü kilometrliyində müsavatçı Aydın Acalovun ölümü ilə nəticələnən qəza ilə bağlı həbs olunub. Həmin vaxt mərhum A.Acalov öz maşını ilə təqsirkar bilinən N.Yaqubluya təlim keçirmiş. Qəza bu təlim zamanı baş verib. Yəni hadisə zamanı sükanın arxasında N.Yaqublu olub.

DİN Baş Dövlət Yol Polisi İdarəsinin şöbə rəisinin yuxarıda dediklərini və qanunun tələblərini, eyni zamanda avtomobilin mərhum A.Acalova məxsus olduğunu, həmçinin icazəsiz təlimin onun tərəfindən keçildiyini nəzərə alsaq, belə deyə bilərik ki, əslində Nigar Yaqublunun məsuliyyəti ağır olmamalıdır. Çünki mərhum Aydın Acalov Nigar Yaqubluya təlimi qanunazidd olaraq keçirmiş. Onun özünün və avtomobilinin sürmə təlimi vermək hüququna dair sənədi olmayıb. Bundan başqa maşının üzərində «Təlim nəqliyyat vasitəsi» tanınma nişanı da olmayıb.

Bakı-Şamaxı yolu isə sürmə təlimi üçün icazə verilən yol hesab edilmir.