Kürd Gənclər Təşkilatının rəhbəri: “Onların bizə sahib çıxmasını istəyirik”

Bakıda bu yaxınlarda yaradılmış Kürd Gənclər Təşkilatının rəhbəri Diyarbəkirdə (Türkiyə) fəaliyyət göstərən kürd portalına müsahibə verərək “Azərbaycanda kürdlərə qarşı assimilyasiyadan” şikayətlənib.
Məlumata görə, Azərbaycan Kürd Gənclər Təşkilatının rəhbəri Nicat Cəbrayılov haberdiyarbakir.com saytına müsahibəsində bu təşkilatın yaranmasının məqsədlərindən və planlarından danışıb. O deyib ki, “təşkilatın yaranmasında məqsəd Azərbaycanda kürdlərə qarşı assimilyasiya siyasətinə dur deməkdir”.

Rojhat Dərnəyi adı ilə təşkilatlanan Kürd Gənclər Təşkilatı 2011-ci ilin iyununda yaranıb. N.Cəbrayılov deyib ki, onların məqsədi “kürdlərin assimilyasiyaya məruz qalmasına imkan verməmək üçün kürd mədəniyyətinə və dilinə saib çıxmaq”dır: “Kürd siyasi hərəkatlarının genişləndiyi bir vaxtda bizim təşkilatın yaranması əhəmiyyətli oldu. Lakin bizim siyasi məqsədimiz yoxdur, ancaq mədəni və sosial fəaliyyətlər göstərmək istəyirik”.

N.Cəbrayılov iddia edib ki, Azərbaycanda kürdlər ən çox assimilyasiyaya məruz qalan etnik qrupdur. Onun sözlərinə görə, hazırda Azərbaycanda hər 100 kürd gəncindən ancaq 5-i kürd dilində danışa bilir.

“Kürd gəncləri tarixlərini bilmirlər, mədəniyyətlərindən uzaqlaşırlar. Kürdlər Azərbaycandan köçəndən sonra dünyanın dörd bir tərəfinə dağıldılar. Azərbaycanda kürdlərin kompakt yaşadığı yer yoxdur. Üç ailə bir yerdə, beşi başqa yerdə yaşayır, bərabərliyimiz və birliyimiz yoxdur. Bu səbəbdən assimilyasiya bizə daha çox təsir edir” - deyə kürd təşkilatının rəhbəri bildirib.

N.Cəbrayılov deyib ki, onlar İraqın şimalındakı “Kürdüstan”ın təşkilatlarının təcrübəsindən yararlanmaq istəyirlər. O, Azərbaycan kürdlərinin “Kürdüstanda yaşayan kürdlər tərəfindən unudulduğunu” düşündüklərini deyib: “Onların bizə sahib çıxmasını istəyirik, bizə qucaq açmasını istəyirik. Hələ Azərbaycanda nə qədər kürdün yaşadığını da bilən yoxdur. Bu da bizim üçün çətinlik yaradır, biz də kürdük və ana torpaqlarda yaşayan kürdlər bizə sahib çıxmalıdır”.

N.Cəbrayılov həmçinin kürd mediasının onlara daha çox yer ayırmasını da istəyib.