Hacı İbrahim: “Rüstəm İbrahimbəyov gəlsə də heç nəyə nail ola bilməyəcəklər; müxalifətdə parçalanmalar görürəm”

...Əvvəlcədən planlaşdırmışdıq, onunla məişətdən tutmuş Azərbaycanı gözləyən hadisələrədək bir çox mövzulardan söhbət edəcəkdik. Amma doğrusu, o, bizi təəccübləndirdi. Ölkədə baş verən hadisələri, ictimai-siyasi prosesləri bu qədər yaxından izlədiyini gözləmirdik.
Ekstrasens, parapsixoloq, falçı, öncəgörən - özlərini nə adlandırmalarından asılı olmayaraq onlara münasibət həmişə fərqli olub. Müsahibimiz də özünün falçı, öncəgörən, görücü adlandırılmasını sevmir. Ona görə də onu beləcə təqdim edirik - sadəcə Hacı İbrahim.

Beləliklə, şəklinin çəkilməsinə israrla icazə verməyən bu maraqlı adamla müsahibəni təqdim edirik.

- Hacı və falçılıq...

- Mən ənənəvi falçı deyiləm, yalnız dualarla işləyirəm. Azərbaycanda bir-iki nəfərik, ad və təvəllüdlə insanın taleyini oxuya bilirik. Mən yalnız ruzi-bərəkət duaları yazıram, insanların yolunu təmizləyirəm, bəxt yollarını açıram. Fikir verin, “insanların taleyini dəyişirəm” demirəm, amma Allahın köməyi ilə vasitəçi oluram.

- Yəni ağ magiya ilə məşğulsunuz, qarası ilə yox...

- Mən nə qara, nə də ağ magiya tanımıram. Cadu elə bəd əməldir. Onun nə ağı, nə qarası?! Bəziləri ölü dırnağına, qəbiristanlıq torpağına, alt paltarına cadu-əməl edirlər, adını isə qara magiya qoyurlar. Əslində bunun bir adı var - şeytan əməli. Bir insan ki yazdığı duanın qəbiristanlıqda basdırılmasını tələb edir, onun rənginin nə fərqi var?!

- Ölü dırnağı?

- Hə, ölü dırnağı, toyuğun dırnağı, əyilmiş mismar, çarpaz dayanmış iynələr, düyünlər xoş niyyətlə edilmir. İnsan ya paxıllıqdan, ya da düşmənçilikdən bu yola əl ata bilər. Bəzən qadınlar ərlərini sevgilisindən ayırmaq, bəzən də sevgilisi oturub-durduğu kişinin ailəsini dağıtmaq üçün şeytan əməli ilə məşğul olanların yanına gedirlər.

- Bəs sizin yanınıza nə üçün gəlirlər?

- Əsasən dil-ağız bağlatdırmaq üçün gələnlər olur. Bayaq yanımdan çıxan qadın ərinə ev aldırmaq istəyirmiş, əri razılaşmırmış. Kömək elədim, əri ev almağa razı oldu. İndi də maşınlarını satdırmaq üçün gəliblər. Oğlanın anasının dilini-ağzını bağlatdıran qızlar var. Qaynanalar gəlir, dua yazdırırlar ki, ailədə sözləri keçsin. Gəlinlər də gəlirlər. Amma mən heç kimin ailəsini dağıtmıram. Hətta elələri olur ki, məhkəmədən geri dönürlər, barışırlar. Bizim rayonda bir hakim vardı, boşanmaq istəyənlərin çoxunu yanıma göndərirdi. İndi də vəzifədə olan dostlarımın çoxu yanıma adam göndərir.

- Faizlə işləyirsiniz?

- Yox. Nə faiz? Vəzifədə olan hər kəsin bir mollası, ya falçısı olur. Bizim zonanın mollası da, falçısı da ələ düşmür (söhbət cənub bölgəsindən gedir-red.). Masallıda, Cəlilabadda elə mollalar var ki, duası daşdan keçir. Biləsuvarda da savadlı görücülər var. Amma o zonada Qurana baxmaq adı ilə cadu ilə məşğul olanlar çoxdur. Məsələn, Biləsuvarda eləsi vardı ki, rəhmətlik insan həyatını gözündən oxuyurdu.

- Bu, Allah vergisidir?

- O da var, amma baxıcılıq bir elmdir. Gərək hesab-kitabı biləsən, məntiqdən, riyaziyyatdan başın çıxsın. Təbii ki, kartla, kofe ilə fala baxanları demirəm, çünki onları heç falçı adlandırmaq da düzgün deyil. Mənim müəllimim 93 yaşında öldü. Həmişə deyirdi ki, pula aldanıb insan taleyi ilə oynama. Bir də əvvəldən oğurluqla bağlı baxmağımızı istəmirdi, heç özü də buna baxmırdı.



- Yanınıza gələnlərin arasında tanınmışlar, sənət, siyasət adamları olurmu?

- Bunu yadında saxla, qızım. Kim deyirsə ki falçıya, baxıcıya getmirəm, buna inanma, yalan danışır. Amma təkcə müğənnilərin adını hallandırmaq düz deyil. Təkcə onlar gəlmir ki... Bizneslə məşğul olanlar da, vəzifə sahibləri də gəlirlər. İndi həyatda uğur qazananların hamısının yolu bir dəfə də olsa baxıcıdan keçib.

- Onlar niyə gəlirlər ki?

- Toya gedən müğənnilərin əksəriyyətində ceyran dərisinə yazılmış dua, bir də gülləkeçirməz var. O dua elədir ki, nə bədnəzər, nə də cadu təsir etmir. Yanıma bəzən də vəzifə sahibləri gəlirlər. Çoxunun kabinetində dua, ya da nə bilim, işlənmiş nəsə olur. Keçən il bir cərrah gəlmişdi, baş həkim işləyib, sonra işdən çıxarılıb. Əvvəllər dostluq etdiyi bir xanım xristian əməli eləyib kabinetinin girəcəyinə qoymuşdu. Mən onu təmizləyəndən sonra başqa bir işə, özü də daha böyük vəzifəyə təyin elədilər. O cadunu mənimlə birgə kilsədə də təmizlədilər. Çünki evin, kabinetin, ya hara olursa olsun, girəcəyinə basdırılan əməl uzun müddət davam edir.

- Niyə?

- Çünki onu hər gün tapdayıb keçirsən, təsiri bütün otaqlara yayılır. Bəzən işçilər müdirlərinə çarpazlanmış iynə ilə əməl etdirirlər, yəni daim üstünlük onlarda olsun.

- Bəs dediyiniz ceyran dərisi, gülləkeçirməz neçəyə başa gəlir?

- Baxır adamına. Eləsi var ki, istədikləri 2 min manata başa gəlir. Bəzən hətta 5-6 minə başa gələn də var. Çünki duanın yazılması üçün, müəyyən işlər üçün tələb olunan şeyləri “qara bazar”dan alırlar. Bəziləri insanın maddi durumundan istifadə edirlər. Amma yaxşı əməl sahibi elə dua ilə kifayətlənir.

- Bu il seçki ilidir. Azərbaycanı nə gözləyir?

- Mən ilin əvvəlindən demişəm ki, Azərbaycanı Allah qoruyur. Terror, zəlzələ, ya hansısa insan ölümü ilə nəticələnəcək bəla görmürəm. Əksinə, ölkəmiz üçün xeyirli bir sənədin imzalanacağını olacağını görürəm. Prezident seçkiləri ərəfəsində toplantılar, qarşıdurmalar görünür, amma ölüm-itim, qan-qada yoxdur.

- Hakimiyyət dəyişikliyi olacaqmı?

- Mən siyasətdən proqnozlar vermək istəmirəm, amma deyim ki, hakimiyyət dəyişikliyi olmayacaq. Sadəcə seçkidən sonra bir neçə məmurun aşağı yuvarlandığını görürəm.

- Bəs Milli Şuranın taleyi? Rüstəm İbrahimbəyov ölkəyə qayıdacaqmı?

- Milli Şura vahid namizədin müəyyənləşdirə bildimi? (gülür)

- Siyasi prosesləri də izləyirsiniz deyəsən...

- Hə, vahid namizəd kimi hələlik o kinorejissoru təklif edirlər. Amma namizədlərin sayı artacaq, buna özünüz də şahid olacaqsınız. Rüstəm İbrahimbəyov gəlsə belə heç nəyə nail ola bilməyəcəklər. Mən İsa Qəmbərin də, Əli Kərimlinin də Rüstəm İbrahimbəyova münasibətini bilirəm. Xüsusilə İsa Qəmbərin öz planları var. Bundan başqa, Müsavat Partiyasında fikir ayrılıqları olacaq, vəziyyət hətta bəzi istefalara qədər gedib çıxacaq.

- Bunu siyasəti izləyən hər kəs iddia edə bilər. Dediklərinizi necə əsaslandırardınız?

- Yox, gözləntilər çoxdur. Rüstəm İbrahimbəyovun arxasında Rusiyanın və Qərbin müəyyən qüvvələri dayanıb. Amma Rüstəm İbrahimbəyov müxalifət düşərgəsində istənilən namizəd qədər şanslıdır. Birlikdə toplansalar da daxildə narazılıq artacaq.

- Bəs sonra?

- Milli Şura da əvvəlki illərdə yaradılan birliklərin taleyini yaşayacaq. Yenə deyirəm, müxalifət düşərgəsində daxili parçalanmalar görürəm.



- İki xalq artisti - İlhamə ilə Nazpəri “vuruşur”. Onların münasibətlərinin gələcəyinə baxmısınız?

- İlhamə xanım olduqca iddialı qadındır və sözünün üstündə duracaq. Bu “soyuq müharibə” hələ uzun müddət davam edəcək. Bircə onu deyə bilərəm ki, şou əhli arasında iki tanınmış simanın qaranlığa qərq olduğunu görürəm.

- Gəncdirlər, ya qoca?

- Biri gənc, biri isə orta yaşlı olacaq.

- Səmimi deyin, proqnozlarınızın səhv çıxdığı çoxmu olur?

- Soruşardın ki, səhv çıxdığı olurmu heç ( gülür). Bəlkə bir-iki dəfə yanılaram, amma həm dediklərimin, həm də elədiyimin arxasında dayanıram.

- Bəs niyə ünvanınızı yazmağa, şəklinizi çəkməyimizə icazə vermirsiniz?

- Bax, qızım, fərqi yoxdur, falçı, ya ekstrasens, hər kəsin arxasında kimlərsə var. Amma mən istəmirəm. Başımız bəzən heç nədən çox ağrıyır.

- Amma axı son vaxtlar falçılıq edənlərin sayı çox elə artıb. Çoxları reklam olunmaq üçün sıraya düzülüb...

- Bax, onlar televizora çıxıb ağıllarına gələni danışırlar. Elə birinci sözlərindən qarşılarında əyləşənlərin psixologiyasına təsir edə bilirlər. Falçıların yanına, xüsusilə cadu ilə məşğul olanların yanına psixologiyası zəif olanlar gedirlər. Onları “bəxtin bağlıdır”, “işin düz gətirmir” kimi sözlərlə təsirə salmaq asan olur. Çünki ağıllarında saxlamaqla öz işlərini düyünə salırlar.

- Bəs siz də bayaq mənə dediniz ki, tilsimdəyəm, cadu ediblər mənə...

- Gördüyümü söyləyirəm, amma indi yenə təkrarlayıram, oxuduğum dualar, namaz dadıma çatır. Bir evdən ki Quran sədası gəlir, ruzi də, bərəkət də birinci o evə paylanır. İstənilən şəxs dualarla yad qüvvələri özündən uzaqlaşdıra bilər.

- Başqa nə etmək lazımdır?

- Heç vaxt özünə söymək, qarğış etmək olmaz. Bəziləri başqasına “bəxtəvər”, özünə “yazıq” deyir. Yaxşı sözlə başqasının aurasını təmizlədiyin kimi pis söz də öz aurasını korlayırsan. Əksinə, “bütün işlərim yaxşıdır” deyin, şükür edin. Bir də üzərlik, sirkə və şam həm evin, həm də öz auranın təmizlənməsinə yardım edir. Çalışın hər gün şam yandırasınız. Bir də yaxınlarınıza, övladınıza ad qoyarkən fikirləşin. Hər bir insan öz adının taleyini yaşayır. Dini adların böyük yükü var. Vay o kəsin halına ki, adı İlahə, Samirə, Pəridir. Minayə uğurlu addır. Fatimə, Zəhra, Gülsüm, Məhəmməd kimi adların böyük ağırlığı var.