"Mən heç bir siyasi işlə məşğul deyiləm. Nə edirlərsə, etsinlər. Hüquqi yolla haqqımı sonuna qədər tələb edəcəm"
Dünən İTV-nin əməkdaşı Esmira Qasımovanın telekanal rəhbərliyi tərəfindən təzyiqə məruz qaldığı barədə "Qafqazinfo"da xəbər yayımlanmışdı. Teleaparıcı "Facebook" hesabında məsələni belə şərh etmişdi:
“Hörmətli dostlarım! Ən yaxın saatlarda ölkə prezidenti İlham Əliyevə açıq məktubumun mətniylə tanış olacaqsınız. Məzuniyyətdə olduğum dövrdə tanımadığım bir profil tərəfindən prezidentin kollajına tag edilməyim ucbatından ciddi siyasi təpkilərə məruz qalmışam. Bəyənmədiyim, hətta şərh belə yazmadığım bu kollajı yayan profil sahibini dərhal blok edərək işarələnmədən çıxmışam. Amma buna baxmayaraq iyulun 9-dan etibarən hər gün işdən könüllü getməyimlə bağlı ərizə istənilir. Qeyd edim ki, bu məsələdə İTV-nin direktor müavini Oqtay Bayramov canfəşanlıq və fəallıq göstərir. Seçki ilində qəsdən ölkədə destabilizasiya yaratmaq istəyənləri ifşa eləmək niyyətindəyəm. Sizlərin hər birinizin başına gələ biləcək bu məsələdə mənə dəstək olmağınızı xahiş edirəm”.

Sözügedən hadisədə ittiham olunan İTV-nin direktor müavini Oqtay Bayramov “Yeni Müsavat”a açıqlamasında Esmira Qasımovanın işdən çıxarıldığını bildirib: “Mən heç kimi hədələməmişəm. O xanım artıq burada işləmir. O, heç bir iş görmürdü, gəlib çayxanada oturub gedirdi. O, özü əmək kitabçasını gətirər, işdən nə səbəbə çıxarıldığına baxarsınız. Onun barəsində akt tərtib edilib, işlədiyi departamentin direktoru onun işləməsinə etiraz edib. O xanım indi bizi bu cür danışıqla şantaj edir”.

Bu gün isə İTV ilə əlaqə saxlayan virtualaz.org saytının əməkdaşı Esmira Qasımovanın işdən çıxarılmadığını öyrənib. Saat 9:00-da işdə olduğunu deyən Esmira Qasımova Oqtay Bayramovla da görüşdüyünü dedi: “İş vaxtı başlayandan işdəyəm. Oqtay Bayramovla da rastlaşdıq. Əvvəllər mənə salam vermirdi. Amma bu gün səhər salamlaşdıq. İşdən çıxarılmağımla bağlı mənə bir söz deyilməyib”.

E.Qasımova O.Bayramovun dediyi kimi, heç bir işlə məşğul olmamasını isə belə izah etdi: “İyulun 9-da məzuniyyətdə olarkən facebookda hansısa bir məlumata “tag” edilməyimlə bağlı təcili olaraq işə çağırılmışam. Dedilər ki, ərizəni yaz və elə bu gün işdən çıx. Məzuniyyətdə olan şəxs işdən çıxarılması ilə bağlı ərizə yaza bilməz. Mən də yazmadım. İyulun 22-də məzuniyyətdən qayıtmışam. Gələn gündən mənə “təhlükəli qadındır” deyib iş vermirlər. Məzuniyyətdən qayıdandan bəri redaktor olaraq heç bir iş görmürəm. Amma işə vaxtında gəlib-gedirəm. Bu, mənim günahım deyil. Iş görməməyimi onlar istəmir. Mənə könüllü olaraq ərizə yazdıra bilmədilər. Dünən eşitdim ki, təqdimat yazıb məni işdən çıxaracaqlar. Bundan sonra öz facebook səhifəmdə həmin statusu yazdım. Onlara təqdimatda facebookda “tag” edildiyimə görə işdən çıxarıldığımı qeyd etmələrini söylədim. Mən heç bir siyasi işlə məşğul deyiləm. Nə edirlərsə, etsinlər. Hüquqi yolla haqqımı sonuna qədər tələb edəcəm. İki gündür jurnalist həmkarlarım mənə ciddi şəkildə dəstək olurlar. Hər kəsə təşəkkür edirəm”.

Esmira Qasımova bu gün prezidentə məktub göndərəcəyini də bildirib.