Səhiyyə Nazirliyi Elmi-Tədqiqat Pediatriya İnstitutunun direktoru, Azərbaycanın baş pediatrı Nəsib Quliyev ölkədə fəaliyyət göstərən özəl klinikaları sərt tənqid edib.

Virtualaz.org-un verdiyi xəbərə görə, N.Quliyev sosial şəbəkədə vətəndaşların suallarını cavablandırarkən deyib ki,

bəzi özəl tibb müəssisələri Səhiyyə Nazirliyinə təqdim etdikləri nizamnamələrini kobud şəkildə pozur, qanunsuz hərəkətlərə yol verirlər: “Özəl tibb müəssisələri əhali arasında narazılıq yaradırlar. Buna görə də həmin tibb müəssisələrinə mənfi münasibətim var”.

Baş pediatr deyib ki, tibb biznesi ən çətin və daha çox vaxt tələb edən spesifik bir biznes sahəsidir: “Təəssüf ki, bəzi özəl tibb müəssisələri yaradılandan çox az müddət keçməsinə baxmayaraq bir çox sahələrə sponsorluq, baş sponsorluq etməyə başlayırlar. Həmçinin əsassız reklamlara yol verirlər. Onların bəziləri özünü klinik xəstəxanalar kimi reklam edir və bununla da əhali arasında haqlı narazılıq yaradırlar”.