Evlərinin sökülməsinə etiraz edən sakinlər traktorların şüşələrini sındırdı; fəhlələrlə sakinlər arasındakı davaya polis müdaxilə etdi

Bakıda “Xutor” qəsəbəsində söküntü işləri avqustun 6-da da davam edib. Səttar Bəhlulzadə küçəsində davam edən söküntü işləri yenə də narazılığa səbəb olub. Evlərinin sökülməsinə icazə verməyən sakinlər traktorları daşa basıblar. Traktor sürücülərinə ciddi xəsarət yetirilib. Eyni zamanda evləri sökən fəhlələrlə sakinlər arasında qarşıdurma olub. Kütləvi davada bir neçə nəfər yaralanıb. Polis tərəfləri ayıraraq davaya müdaxilə edib.

Özlərini traktorun qabağına verən “Xutor” sakinlərindən biri traktorun tırtılı altında qalmaq təhlükəsi ilə üzləşib. Evinin sökülməsinə icazə verməyən yaşlı qadın ayağını tırtılın qabağına verərək etiraz edib. Sürücünün bir anlıq səhvi az qalsın yaşlı qadını həyatını itirməsinə səbəb olacaqmış. Fəhlələr yaşlı qadının cəld traktorun qabağından çəkərək faciəni baş verməsinin qarşısını alıblar.

Sakinlər mənzillərinin kvadratına görə verilən 1000 manat kompensasiya ilə heç vaxt razılaşmayacaqlarını və evləri uğrunda axıra kimi mübarizə aparacaqlaqlarını söyləyiblər.

Bütün bunlara baxmayaraq əraziyə çağırılan polis əməkdaşları sakinləri söküntü ərazisindən uzaqlaşdırıb. Plana düşə daha 13 ev sökülərək yerlə-yeksan edilib.

Qeyd edək ki, rəsmi məlumatda “Xutor” qəsəbəsindəki evlərin yolun genişləndirilməsi məqsədi ilə söküldüyü qeyd olunur. Sakinlər isə iddia edir ki, evləri yaxınlıqdakı prezident iqamətgahına görə, sökülür. Ağ Evi xatırladan yeni iqamətgahın haradasa 50 hektar ərazisi var. Hazırda sarayın ətrafına eni 1, hündürlüyü 4 metr olan hasar çəkilib. İqamətgah 4 binadan ibarətdir. Bura dövlət başçısı üçün həm iş yeri, həm də ofis rolunu oynayacaq. Məlumatlara görə, xarici qonaqlar da orada qəbul ediləcək. Sakinlər bildirir ki, sarayın Azadlıq prospekti istiqamətində süni göl hazırlanır. O biri tərəfdə isə buz meydançası düzəldilir.

Diqqətə çatdıraq ki, iqamətgahın inşasını “DİA Holdinq” həyata keçirir. Xatırladaq ki, bu şirkət Heydər Əliyev Mərkəzi, “Alov qüllələri” və bir neçə meqa projenin tikintisini həyata keçirib