Fazil Mustafa: “Sözügedən tədbirlərlə insanların əxlaqlarını deformasiyaya uğradırlar və bunlar məqsədyönlü şəkildə həyata keçirilir”; Eldəniz Quliyev: “Məqsəd isə insanları öz kökündən, mənəvi əxlaqından və dəyərlərindən ayırmaqdır”

Dünən Bakının Bilgəh çimərliyinə yerləşən malikanələrin birində "Eleven & Wild Rusty - Private Pool Party" adlı parti keçirilib. Partidə Ukrayna və Rusiyadan gətirilmiş 40-a yaxın striptiz şou göstərən qız iştirak edib. Səhərə kimi davam edən partiyə gələnlərin bahalı maşın, geyim və aksessuarları ilə fərqləndiyi bildirilir. Partiyə giriş qiyməti isə bir nəfər üçün 500 manat olub. Limitsiz içki və əyləncənin olduğunu partidə, ukraynalı porno ulduzlardan ibarət "SP" adlı rəqs qrupunun açıq hava şousu olub.

Artıq demək olar ki, hər il Müqəddəs Ramazan ayında Azərbaycanda bu cür şouların təşkili adi bir hala çevrilib. Lakin həmişə şouların müqəddəs aylarda keçirilməsinin isə təsadüf kimi qiymətləndirilməsi ən azından sadəlövhlük olardı. Bu dəfə ki, şou isə əvvəlki illərdə baş verənlərin üzünü ağ elədi. Torpaqlarının 20%-dən çoxunun işğalda olan, şəhidlik və vətənpərvərlik ruhiyyəsinin su və hava kimi vacib olduğu bir məmləkətdə çılpaq qadınların şou göstərməsi və bir qrup gənclərin buna meyl etməsi sadəcə dəhşət doğurur. Maraqlıdır ki, təqaüdçüsünün 150 manat pensiya aldığı bir ölkədə bir nəfərin girişi 500 manata olan əxlaqsız partilərin təşkili hansı insani dəyərlərlə ölçülür? Baş verənlərlə bağlı FaktXeber.com-a açıqlama verən millət vəkili Fazil Mustafa və Ziyalılar Birliyinin sədri Eldəniz Quliyev maraqlı və diqqət çəkən məqamlara toxundular.

Millət vəkili Fazil Mustafa bildirdi ki, bu cür tədbirlərin təşkilini normal qəbul edir. Azərbaycanda mənəvi dəyərlərin təbliğinə yönəlmiş hansısa tədbirin təşkil edilməsinin təəccüb doğura biləcəyini söyləyən millət vəkili, “əgər Ramazan ayı ərəfəsində ölkə telekanallarında insanların cəhalətdən uzaqlaşması, bir-birilərinə qarşı əxlaqi münasibətlərin formalaşması, cəmiyyətin sağlam həyat tərzinə meylləndirilməsi, narkotikə və başqa neqativ yollardan uzaqlaşdırılması ilə bağlı bir dənə də olsun proqram yayımlanmadığı halda, onda nə baş verməli idi? “, - deyə bildirdi: “Bunun müqabilində təbii ki, striptiz və digər şoular keçirilməlidirlər. Ona görə baş verənlər gözlənilən bir mənzərə idi və Azərbaycanda əslində belə bir girdabın içindədir. Bu hələ yayımlanan videodur və kifayət qədər yayımlanmayan tədbirlər var. Sözü gedən tədbirlərlə insanların əxlaqlarını deformasiyaya uğradırlar və bunlar məqsədyönlü şəkildə həyata keçirilir. Kifayət qədərə üzücü bir haldır və hansısa formada izahını verməyə çətinlik çəkirəm. Ölkədə stimullaşdırılan budur və nəticə də belə olmalı idi.”

Fazil bəy onu da bildirdi ki, bu cür əxlaqsızlıqları yalnız ürək ağrısı ilə seyr etmək mümkündür: “Tədbirlə bağlı yayımlanan video minlərlə tədbirlərdən biridir və bunlar cəmiyyətin gözü qarşısında baş verir. Bu cür hallar dünya ölkələrində daha qapalı və məhdud məkanlarda keçirilir. Lakin bunu cəmiyyət üçün ictimailəşdirmək olduqca acınacaqlı bir məsələdir. Baş verənlər onu göstərir ki, cəmiyyətin gələcəklə bağlı sağlam düşünməsinin qarşısı məqsədyönlü siyasətlə alınır.”

Ziyalılar Birliyinin sədri Eldəniz Quliyev baş verənləri Azərbaycan hakimiyyətinin xalqın dəyərlərini və xüsusilə mənəvi dəyərlər sistemini tapdalaması kimi qiymətləndirdi: “Bu siyasət həmişə Azərbaycan hakimiyyətinin prioritetlərindən olub. Məqsəd isə insanları öz kökündən, mənəvi əxlaqından və dəyərlərindən ayırmaqdır. Baş verənlər yalnız təəssüf doğurur və bu qaranlığa aparan bir yoldur”