TQDK sədrinin rəqibi Elşad Abdullayev kartından istifadə etməyə hazırlaşır

Bir müddət bundan əvvəl ölkənin Təhsil naziri postuna Mikayıl Cabbarovun təyinatı bu vəzifə uğrunda həm aşkar, həm də gizli mübaizə aparan tərəflərin ambisiyalarına müəyyən mənada zərbə vurmuş oldu. Digər tərəfən isə “iddiaçılar” artıq müəyyən bir müddətə bu mübarizəni durduraraq bilavasitə öz vəzifə borclarının icrası ilə, həm daha artıq səylə məşğul olmaq məcburiyyətində qalmış oldular. Belə ki, müşahidə olunan uğursuzluqlara görə artıq Təhsil Nazirliyinin rəhbərliyini ən azından bir müddət təqsirləndirmək mümkün olmayacaq. Əksinə, təhsil sahəsindəki neqativ halların aradan qaldırılması istiqamətində yeni nazirin hər hansı bir qurumun fəaliyyətinə qarşı bildirəcəyi iradlar yeni nəzər və obyektiv qiymətləndirmə kimi qəbul oluna bilər.
Məlum olduğu kimi Təhsil Nazirliyi ilə mütəmadi fikir ayrılıqları, qarşılıqlı ittihamlar və digər ziddiyyətləri ilə daima cəmiyyətin diqqətini cəlb edən əsas qurum Tələbə Qəbulu üzrə Dövlət Komitəsi (TQDK) olub. Eyni zamanda da artıq uzun müddətdir ki, cəmiyyətdə TQDK sədri Məleykə Abbaszadənin olkənin Təhsil naziri postuna olan iddiaları və eləcə də onun bu vəzifəyə olan şansları müzkirə olunmaqda idi. Əlbəttə ki, M.Cabbarovun təyinatı bu şansların dəqiq qiymətləndirilməsində son nöqtəni qoymuş oldu. Lakin təyinatdan sonra baş verən hadisələr, daha doğrusu yayılan müəyyən məlumatlar komitədə yaşanan bəzi problemlər fonunda bu qurumun gələcək fəaliyyətinə dair hələ də bəzi sualların açıq qaldığını diqqət mərkəzinə çəkdi.
Məsələ ilə bağlı dərc etdiyimiz son materialda biz qeyd etmişdik ki, fəaliyyəti dayandırılmış Azərbaycan Beynəlxalq Universitetinin sabiq rektoru Elşad Abdullayevin yaydığı növbəti videomateriallarda Gülər Əhmədova bir neçə yerdə Məleykə adını çəkir və Elşad Abdullayevə xəbərdarlıq edir ki, bundan sonra onunla işləməyəcəksən. Təbii ki, burada söhbətin hansı Məleykədən getdiyi və Elşad Abdullayevin onunla nə işbirliyinin olması mətbuatın marağını doğurmaya bilməzdi.
Mövzunun müzakirəsinə başlayan bəzi informasiya vasitələri isə ilk növbədə qeyd etmişdilər ki, Gülər Əhmədovanın bir neçə dəfə adını çəkdiyi Məleykənin kim olmasını tam əminliklə söyləmək çətin olsa da, Azərbaycanın təhsil sahəsində olan səlahiyyət sahibləri içərisində Məleykə adlı yeganə şəxs Tələbə Qəbulu Üzrə Dövlət Komissiyasının (TQDK) sədri Məleykə Abbaszadədir. Məhz elə bu baxımdan da ehtimal etmək olar ki, söhbət Məleykə Abbaszadədən gedir. Digər tərəfdən isə bu xüsusda redaksiyamıza daxil olan məlumatlarda TQDK sədrinin istənilən halda Elşad Abdullayevlə sıx işgüzar əlaqələrinin olduğu iddia edilir. Həm də qeyd olunur ki, bu işgüzar əlaqələr səmimi dostluq münasibətləri ilə də təmin olunublar.
Məlumata görə, ABU-ya qəbul, buradan digər universitetlərə tələbə transferləri və digər bu kimi məsələlərin həllində vasitəçilik və maliyyə vəsaitlərinin ötürülməsi işləri TQDK-nın sektor müdiri Afiqə Batıyeva tərəfindən həyata keçirilirmiş. Biz artıq qeyd etmişdik ki, A.Batıyevanın bacısı Labidə Batıyeva əvvəllər Ağstafa Rayon Təhsil Şöbəsinin müdiri vəzifəsində işləmiş, lakin sonradan işində ciddi nöqsanlara yol verdiyinə görə tutduğu vəzifədən azad edilmişdi. Bu məqam isə Məleykə Abbaszadə ilə sabiq Təhsil naziri Misir Mərdanov arasında münasibətlərin bir az da gərginləşməsinə yol açmışdı. Belə ki, mənbələr TQDK sədrinin M.Mərdanovdan L.Batıyevaya “toxunmamağı” xahiş etdiyini söyləyirlər. Bu xahişin müqabilində isə sabiq nazir nəinki Batıyevanı işdən çıxarmış, hətta onun fəaliyyətinin korrupsiya ilə mübarizə idarəsi tərəfindən təftiş olunması tələbini də irəli sürmüşdü. Bundan sonra isə M.Abbaszadə nazirə qarşı “mübarizəsini” daha da şiddətləndirmiş və elə bu işdə də Elşad Abdullayev TQDK sədrinin ən yaxın köməkçilərindən birinə çevrilmişdi. Daxil olan məlumatlarda qeyd olunur ki, E.Abdullayevin əlində Afiqə Batıyevanın da “işgüzar fəaliyyətinə” dair videomateriallar vardır. Lakin bu süjetlər bir başa TQDK sədrinin ifşasına səbəb ola biləcəyindən onların yayımı qeyri-müəyyən müddətə təxirə salınıb.
Tural