Vəkil Cavad Cavadov: “Ekspertizanın rəyi Cinayət Prosessual Məcəlləsinə, “Dövlət Məhkəmə Ekspertizası haqqında” Qanuna zidd olsa belə onun nəticəsi Taleh Bağırova əlavə ittiham verməyə əsas yaratmır”
İlahiyyatçı Taleh Bağırovun işi ilə bağlı dinşünaslıq ekspertizasının nəticələri açıqlanıb. İlahiyyatçının vəkili Cavad Cavadov “Yeni Müsavat”a bildirib ki, ekspertizanın nəticələri ilə Bakı İstintaq Təcridxanasında tanış olublar. Vəkilin sözlərinə görə ekspertiza rəyi Taleh Bağırova əlavə ittiham verilməsinə əsas yaratmır: “Taleh Bağırovun işi üzrə məhkəmə linqvistik-dinşunaslıq ekspertizasının rəyi ilə Bakı İstintaq Təcridxanasında tanış olduq. Rəy bütünlükdə Dini Qurumlarla İş üzrə Dövlət Komitəsinin ekspertləri tərəfindən tərtib olunub. Ekspertizanın rəyi Cinayət Prosessual Məcəlləsinə, “Dövlət Məhkəmə Ekspertizası haqqında” Qanuna zidd olsa belə onun nəticəsi Taleh Bağırova əlavə ittiham verməyə əsas vermir”.
Cavad Cavadov deyir ki, rəyin nəticə hissəsində T.Bağirovun çıxışlarında dövlət əleyhinə bəzi müddəaların olduğu qeyd olunub. Ancaq ümumilikdə vəkilin fikrincə, rəydə xeyli boşluqlar var: “Rəyə əsasən Taleh Bağırovun bəzi çıxışlarında dini pərdə arxasında dövlət əleyhinə yönələn bəzi fikirlər (bəli məhz fikirlər) vardır. Yəni ekspertiza özü qəbul edir ki, xətib kimi o öz fikirlərini ifadə edib. Misal üçün: ekspertlərin qənaətinə görə “Zülm qarşısında susmaq, sükut etmək olmaz, sükut edənlər zalımla birlikdə cəhənnəmdə eyni qapıdan keçəcək” bu qəbildən olan fikirlərdir. Halbuki bu fikri hamı səsləndirir və ekspertlərin məntiqinə görə bu dövlət əleyhinə siyasi fikirdisə, bunu söyləmək olmazsa deməli dövlət özü zülm dövlətidir. Hesab edirəm ki, çox gülməli vəziyyət yaradıblar. Ola bilər ki, ekspertlərin dövlət və hakimiyyət anlayışlarını ayıra bilməyiblər. Taleh Bağırovun çıxışları məmurlara qarşı sərt kəskin tənqiddən ibarətdir. Bu rəylə tam təsdiq olundu ki, Hacı Taleh məhz çıxışlarına, söz və ifadə azadlığına görə həbs olunub. Bizim vəsatətlərimiz vardır və onları istintaqa təqdim edəcəyik. Hal hazırda Taleh Bağırova yeni ittihamlar elan edilməsi müzakirə olunur”.
Xatırladaq ki, ilahiyyatçı Tale Bağırov bu il martln 31-də Sabunçu polisi tərəfindən saxlanılıb. Aprelin 2-də Sabunçu məhkəməsi ilahiyyatçı haqqında iki aylıq həbs-qətimkan tədbiri seçib. O, Cinayət Məcəlləsinin 234.1-ci maddəsi ilə (satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) ittiham olunur. Hazırda Bakı İstintaq Təcridxanasında saxlanılan ilahiyyatçının işi Baş Mütəşəkkil Cinayətkarlıqla Mübarizə İdarəsi tərəfindən aparılır.