“Dəbdəbəli villanın sahibi işıqpulunu ödəməsə, xəbərdarlıq olunur, elektrik təchizatı dayandırılır”. Bu barədə Modern.az saytına açıqlamasında “Bakıelektrikşəbəkə” ASC-nin mətbuat xidmətinin rəhbəri Tanrıverdi Mustafayev böyük malikanələrdə yaşayan imkanlı şəxslərin işıqpulu ödəməməsi ilə bağlı fikirləri şərh edərkən bildirib.

“Əgər dəbdəbəli villalar varsa, villa sahibinin işıqpulunu ödəməyə imkanı da var”-deyən T.Mustafayevin sözlərinə görə, onlar abunəçilərə eyni münasibət bəsləyirlər.

“İşıqpulunu ödəməsə, istər “Xruşşovka”, istər “Leninqrad” proyektli bina, istərsə də yeni tikilən göydələnin sakini olsun, bütün abunəçilərə eyni gözlə baxılır. Abunəçinin borcu varsa, xəbərdarlıq olunur, elektrik təchizatı dayandırılır, borcu yoxdursa, təşəkkür edilir və 24 saat fasiləsiz dayanıqlı enerji təchizatı verilir”-deyə o vurğulayıb.

Bakıda 800 minə yaxın abunəçinin olduğunu deyən mətbuat xidmətinin rəhbərinin sözlərinə görə, əhalinin işıqpulunu ödəməsində son illər ciddi irəliləyişlər var. “Son 5-6 il ərzində abunəçilərimiz işlətdiyi elektrik enerjisi ödəyirlər”.

“Paytaxt Bakıdan fərqli olaraq, bölgələrdə elektron idarə olunan sayğacların quraşdırılması başa çatmaq üzrədir. Bakıda isə CSR tipli sayğaclar yox səviyyəsindədir”-deyən Tanrıverdi Mustafayev artıq paytaxtın bir neçə rayonunda bu cür sayğacların quraşdırılmasına başlandığını bildirib.

“Bununla bağlı Bakının bir neçə rayonunda pilot layihə gerçəkləşdirilir. Elektron idarə olunan sayğaclar artıq Nəsimi, Xətai, Nizami, Binəqədi, Nərimanov, Səbail rayonlarında var. Belə sayğacların quraşdırılmasına mərkəz rayonlardan başlamışıq. Çünki şəhərin mərkəzi inkişaf edir, dəyişdirilir. Orada təkcə sayğacı qurmaqdan söhbət getmir. Sistemi ümumi yerləşdirmək lazımdır”.

Mətbuat xidməti rəhbərinin sözlərinə görə, bloklarda olan elektrik xətlərini dəyişmək, elektrik sisteminin sürətlə işləməsi üçün abunəçinin mənzilinə qədər olan xətlərin, dayaqların təzələnməsi kimi işlərin görülməsi vaxt tələb edir.

“Bu işə artıq start verilib. İndi abunəçilərimizin 30-40%-i ödəməni elektron vasitəylə həyata keçirir. İstər evdə, istərsə də işdə oturaraq öz ödəmələrini yerinə yetirir.

Elektrik sayğaclarının quraşdırılmasının nə vaxt yekunlaşacağını demək olmaz. Çünki hər gün abunəçilərimizin sayı artır. Kimsə kənddən şəhərə köçür, kimsə yeni ev tikir”-deyə T.Mustafayev sonda vurğulayıb.