Regionlardakı “balaca padişahlar”ın iş fəaliyyəti yalnız özləri üçündür.
Yeraltı və yerüstü sərvətləri ilə dünyada bəxti gətirən ölkələrdən biri də Azərbaycandır. Onun Avropaya inteqrasiyası da bunula bağlıdır. Alimlərimizin hesablamalarına görə yaxın zamanlarda bu sərvətlər də tükənəcək. Çünki bu varlıqla Azərbaycandan çox xarici ölkələr sərmayələnirlər. Özümüzə qalsa, hələ sərvətlərin tükənməsindən danışmaq 100 ildən də tezdir. Amerika kimi dövlət böyük neft yataqlarının ağzına “möhür” vuraraq onu gələcək nəsillər üçün miras saxlayır. Bəs Azərbaycan? Bunun nəticəsidir ki, ölkədə hədsiz var-dövlət ola-ola əhalinin pensiya və əməkhaqqıları 2-3 ildən bir qram-qram artırılır. Bu da haqqını başa düşənlərin haqlı narazılıqlarına səbəb olur. Açıq-açığına ölkədə korrupsiya, rüşvətxorluq və qanunsuzluq baş alıb getməkdədir. Əhalinin haqq səsi boğulmaqla ərizə və şikayətlərə tam baxımsızlıqdır. Regionlardakı “balaca padişahlar”ın iş fəaliyyəti yalnız özləri ilə bağlıdır. Onların əhaliyə bir qara qəpik də köməkliləri yoxdur. Son illər yerlərdə inşa edilən muzeylər, olmpiya kompleksləri, zavodlar və mərkəzlərin istifadəsindən yerli əhali tam kənarda qalıb.
Dəyişməz kadrlar
Nəsə bu ölkədə icra strukturundan tutmuş təşkilat rəhbərlərinə kimi kadr dəyişikliyi aparılmır. Kadr cinayət tərkibli hadisə törətsə belə ört-basdır edilir. Bu da yuxarı dairələrə etimadsızlıqla nəticələnir. Yeri gəlmişkən bu ilin avqust ayının 31-də səhər saatlarında Qazax Müalicə Diaqnostika Mərkəzində baş verən bıçaqlanma hadisəsi ictimaiyyət tərəfindən heç də yaxşı hal kimi qarşılanmadı. Diaqnostikanın poliklinika şöbəsinin müdiri, terapevt Şahin Həsənov iş yoldaşı, diaqnostikada cərrahiyyə şöbəsinin müdiri, tibb elmləri namizədi Vasif Pirvəliyevə naməlum səbəb üzündən bıçaqla ağır bədən xəsarəti yetirdi. Xəstə həmin an elə mərkəzə yerləşdirilərək tanınmış cərrah Cəbrayıl Vəlizadənin uğurlu əməliyytı ilə həyata qaytarıldı. Xəsarət yetirən Şahin Həsənov isə özü maddi sübutla polisə təslim oldu. Bu bir yana... Məsələ isə bununla bitmir. Həkim Şahin Nəsənov Qazax Rayon İcra Hakimiyyəti Başçısının humanitar məsələlər üzrə müavini, 10 ilə yaxındır ki, bu vəzifədə yarı əyri, yarı düz işləyən Gülayə Həsənovanın qardaşıdır. Həkim ən azındann bu hərəkəti bacısına görə etməməliydi.Şahin Həsənovun sonrakı taleyi bizim işimiz deyil.Yəqin ki, həmişə tərəzinin ağır gözü aşağı əyilər. Özləri bilər, qanunların ətəyindən tutan hüquq-mühafizə orqanları bilər. Lakin, Qazax kimi bir ziyalı rayonun ictimai-siyasi fəaliyyətində rəhbər vəzifə tutan bir qadının ailə üzvünün belə hərəkəti hansı məssəvə uyğundur? İndən sonra rəhbər qadın rayon əhalisinə hansı doğru yolun seçilməsində yardımçı ola bilər? Aidiyyəti olmasa da qadın müavinin həyat yoldaşı Natiq Məmmədov da rayon icra hakimiyyətində məsləhətçi vəzifəsində işləyir.
Qazax İcra Hakimimiyyətində saxtakarlıq
Qeyd etdiyimiz kimi İcra hakimiyyəti başçısının müavini Gülayə Həsənovanın həyat yoldaşı Natiq Məmmədov icra hakimiyyətinin məsləhətçisidir. Sabiq icra başçısı Rauf Hüseynovun saxladığı bal arısına baxırdı. O, vaxtilə Qazax Təhsil Şöbəsinin nəzdindəki gənc texniklər stansiyasında çalışarkən stansiyanın direktoru Rafiq Eminov onu əmək qanunları məcəlləsinin 70-ci maddəsinə əsasən işdən kənarlaşdırmışdır. Bəs necə olur ki, həmin maddə ilə qovulan şəxs icra hakimiyyətinə işə götürülüb? Natiq Məmmədov həmin əmək kitabçası ilə dövlət qulluğunda işləyə bilərmi? Bundan əlavə, dövlət qulluğu haqqında qanuna əsasən ərlə arvadın bir yerdə işləməsi yolverilməzdir. Gülayə Həsənovanin sürücüsü də Nizami adlı şəxs özünün dayısı oğludur. Əmək haqqı onun adına yazılsa da o, işdə çətin tapılanlardandır. İcra hakimiyyətinə “cığala”nın içərisində verilmiş 35 AA 005 markalı minik avtomobilini qanunsuz şəkildə Nizami Məmmədov idarə edir. Bu nədir? Etibarnamə neçə adamın adınadır? Ökə başçısı İlham Əliyevin yerlərdə etibar etdiyi icra strukturlarında ailə ansamblı nə vaxtdan qanuni qüvvədədir? Prezidentin etimad göstərdiyi Qazax Rayon İcra Hakimiyyətinin Başçısı Ayaz Əsgərov belə kadrlar üçün son sözü nə vaxt deyəcək? Əlbəttə, hansısa idarə, müəssisə və təşkilatlarda bu cür hadisələrin baş verməsini yenə ört-basdır etmək mümkündür. Lakin, hamının imdad gözlədiyi, hər həftənin 4-cü günləri axın-axın şikayətçilərin axınaşdığı böyük dövlət idarəsində belə qanun pozuntuları yolverilməzdir! Rayon icra hakimiyyəti başçısının aparata müəyyən səbəblər üzündən yığılmış təsadüfı kadrlara yerini göstərməyin artıq vaxtı da çatmışdır.
Səbəbkarlar
Müstəqil ölkənin müstəqil kadrının olması pis qiymətləndirilmir. Lakin kadrın yerində olması daha gözəldir. Hərçənd ki, Qazax Rayon İcra Hakimiyyətinin Başçısı Ayaz Əsgərov Qazaxda “parfümeriya” alverçisi Elçin Nəsibovdan başqa aparata elə bir adam da götürmədi. Oradakı kadrların əksəriyyəti isə sabiq icra başçısı Rauf Hüseynovun müəyyən səbəb üzündən ona yaxın olan kadrlardır. Bu gün aparatda çalışan elə dövlət qulluqçusu da var ki, sərbəst bizneslə məşğuldur. Hətta, aralarında qızıl alverçisi də var. Bunun nəticəsidir ki, onlar dəbdəbəli mülk və çox yüksək qiymətli minik avtomobili sahibləridir. Şəxsi mənafeyini dövlət mənafeyindən üstün tutanlar nə vaxtdan əhaliyə yardımçı olublar? Yenə heç də postsovet təcrübəsini təərifləmək fikrində deyilik. Ümumiyyətlə, hər cəmiyyətin yaxşı təcrübəsi olub.O dövrlər yüksək dairəyə çəkilən kadrın həyat və fəaliyyəti öyrənilər, geniş tərcümeyi-halı tələb olunardı, biliyi, bacarıği yoxlanılardı. Adamın indiki dövrdə dövlət, məhkəmə və ya digər qulluqlara işə götürmək üçün keçirilən imtahanlara da inanmağı gəlmir. Demək olar ki, əksəriyyəti formal xarakter daşımaqla gözdən pərdə asmaq üçündür. “Arxası” və pulu olanlar hazırkı cəmiyyətdə iş tapa bilirlər. Səbəbkar olmadan heç nə etmək mümkün deyil. Hər şey real həllini tapsa yaşamaq da asan olar.
Tənqid çox, baxan yox! Tənqid var yerli, tənqid var yersiz. Əgər tənqid yerində olub baxılmırsa demək cəmiyyətin özündə qüsur var. Bu hansısa məmurun məhz, elə hökumətə sayğısıslığıdır. Bir də ki, necə baxsın. Özü nöqsan yaradan hansı analizi verə bilər? Necə ki, Qazax Rayon İcra Hakimiyyətində olduğu kimi. Hər halda biz bildiklərimizi və eşitdiklərimizi az da olsa vərəqə köçürə bildik. Yəqin ki, bilməyənlər biləcək, eşitməyənlər də eşidəcək. Sonrası babaların boynuna.
Elşad