Sumqayıt Şəhidlər Xiyabanı xarabalığa çevrilib; Obyektlər üçün satmağa ərazi axtaran şəhər rəhbərliyi müqəddəs ziyarətgahı yaddan çıxarıb

Vətən uğrunda şəhid olmaq ilahi bir zirvəyə yüksəlməkdir. Şəhidlər xiyabani bu ilahi zirvəyə yüksəlmiş insanların əbədi məkanıdır. Sumqayıt şəhərinin də özünün qəhrəman oğullarının uyuduğu Şəhidlər xiyabanı var. Qeyd edək ki, Sumqayıtdakı Şəhidlər xiyabani 1988-ci ildə yaradılmışdır. Xiyabanda yerləşən 20 Yanvar abidəsi 1990-cı ildə, Ulduzlar abidəsi isə 1992-ci ildə qoyulmuşdur. Bəs görəsən, bu məkan bizim müstəqilliyimiz, azadlığımız uğrunda canını qurban vermiş insanlar üçün ən azından onların adına layiq bir şəkildə qorunurmu..? Elə bu düşüncə ilə də Sumqayıt Şəhidlər Xiyabanını ziyarət etmək qərarına gəldik.
Gördüklərimiz heç də ürəkaçan olmadı. Xiyabana payızın şəhərimizə yenicə qədəm qoyduğu bir vaxtda getmişdik. Elə buna görə də yağışın burada yaratdığı görüntü doğrusu acınacaqlı idi. Şəhidlər xiyabanının baxımsız lövhəsi və axşamdan yağan yağışın əmələ gətirdiyi xoşagəlməz mənzərə fonunda iki baxımsız bulaq dediklərimizə bir sübüt ola bilər. Bu hələ xiyabana daxil olmadan rastlaşdığımız mənzərə idi. Girişdə qoyulmuş bu bulaqların isə heç birindən su gəlmirdi. Aidiyətti qurumların buraya diqqətsizliyi sayəsində ilk baxışdan onların bulaq olub olmaması da adamda şübhə oyadırdı. Lakin kranların birində olan pas izləri onun əvvəl bulaq olduğunu deməyə əsas verirdi. Ümumiyyətlə, ətrafdakı insanlardan maraqlanandan sonra bəlli oldu ki, xiyabanın giriş hissəsindəki bulaq bir neçə ildir ki, "bulaq statusu”nu itirib...
Ulduzlar abidəsinin qarşısında olan məşəl isə neçə müddətdir ki, yanmır. Hələ abidənin böyür-başına yazılan sayt, çat adlarını demirik. Elə bu yazılardan da bir daha məlum olur ki, bura baxımsızlıqdan ciddi şəkildə əziyyət çəkir. Xiyabanın giriş hissəsində zibil üçün 2 ədəd qab qoyulsa da, yerdə asanlıqla zibillərə rast gəlmək mümkün idi. Görünür, ərazinin təmizliyinə cavabdeh qurumlar da buranı tamamən unudublar... Bundan əlavə, xiyaban boyunca ağaclar arasına yerləşdirilmiş və uzaqdan heç də xoş təsir bağışlamayan plastik su butulkalarını da görmək olar. Bu su qablarının məzarların yanında və ya ağacların arasında niyə bu formada qalmasının isə, bizcə, məntiqi izahı ola bilməz. Qəbir daşlarının üst hissəsi yağışın burada yaratdığı palçıq, toz-torpaq ilə səliqəsiz hala düşmüşdü. Xiyabanın içərisində süni olaraq çəkilən su şlanqı isə buraya estetik cəhətdən xoşagəlməz görüntü verməklə yanaşı, əlavə su sərfiyyatına da yol açmış olurdu.
Bütün bunlar bir tərəfə, ən qəribə və xoşagəlməz məqamlardan biri də budur ki, Sumqayıtın Şəhidlər xiyabanında bayraq yoxdur. Aydındır ki, belə bir müqəddəs, qürur mənbəyimiz olan məkanda mütləq üçrəngli bayrağımız dalğalanmalıdır, lakin... Yeri gəlmişkən, gözəldir ki, Sumqayıt şəhərində Bayraq meydanı salınıb, meydanda 75 metr hündürlüyündə dirək quraşdırılıb və orada Azərbaycan bayrağı dalğalanır. Amma nədənsə Sumqayıt Şəhidlər xiyabanında heç 5 metr hündürlükdə də bayraq yoxdur. Niyəsə unudulub...
Şəhidlər xiyabanındakı vəziyyət dəfələrlə mediada işıqlanıdırlıb. Hətta 2 il bundan öncə şəhərin bir qrup gənci tərəfindən Sumqayıt Şəhər İcra Hakimiyyətinə də müraciət edilib (Aşağıda sözügedən müraciət sorğusunun sürəti verilib). Problemlərin aradan qaldırılacağı ilə bağlı vədlər verilsə də, vəziyyət əvvəlki kimi qalır.
Bax belə, bu sadaladıqlarımız Sumqayıtdakı Şəhidlər xiyabanının problemlərinin hələ yarı faizindən də azdır. Ümidvarıq ki, problem tezliklə həllini tapacaq və daha sumqayıtlılar, həmçinin, şəhərimizə gələn qonaqlar bu biabırçılığın şahidi olmayacaqlar.
Mövzunu diqqətdə saxlayacağıq. Aidiyyəti qurumların da mövqeyini işıqlandırmağa hazırıq.

Ləyaqət Malikqızı

P.S. İnanırıq ki, "...budurmu Sumqayıtda Milli qəhrəmanlarımıza, şəhidlərimizə, verdiyimiz qiymət?!” gileyini tezliklə unudacağıq