Partiya funksionerləri onlara rəsmi xəbərdarlıq olunmadığını açıqladılar; yaxınlıqda göydələn tikilir
Müsavat Partiyasının Mərkəzi İcra Aparatının rəhbəri Arif Hacılı bu xəbəri əsassız informasiya hesab edir. O, Musavat.com-a açıqlamasında dedi ki, hakimiyyət seçkidən sonra Müsavata təzyiqləri artırmaq üçün bu cür şayiələr yayır: “Müsavat Partiyası şəhərin mərkəzindəki qərargahından məhkəmə qərarı olmadan yararsız bir binaya köçürülüb. Yəqin ki, hakimiyyəti təzyiq məqsədi ilə yayılmış xəbərdir. Heç bir əsası yoxdur”.

Partiyanın Divan üzvü Tural Abbaslı da yayılan xəbəri şayiə adlandırdı. Onun sözlərinə görə, partiyaya nə Binəqədi rayon, nə də Bakı şəhər icra hakimiyyətlərindən xəbərdarlıq olunub: “Müsavatın yerləşdiyi bina dövlətin balansındadır və icarəyə götürülüb. Yaxınlıqda göydələn inşa olunur. Ancaq binanın hər hansı bağlılığı yoxdur və məncə, yayılan xəbər şayiədir. Hətta əsaslıdırsa da bizə rəsmi məlumat verilməyib”.

Qeyd edək ki, Müsavat Partiyasının qərargahı Binəqədi rayonu, 7-ci mikrorayon ərazisində yerləşir.

***

11.26

Mətbuatda Müsavat Partiyasının qərargahının söküləcəyi barədə məlumatlar yayılır. Teleqraf.com-un məlumatına görə, Müsavatın qərargahının yerləşdiyi ərazinin arxa hissəsində və sol tərəfindən yeni binalar tikilib. Yeni tikililərdən biri qərargahın 10 metrliyindədir. İddialara görə, yaxın bir neçə ayda partiyanın yerləşdiyi bina söküləcək, onun yerində də yeni bina tikiləcək.

Müsavat Partiyası sədrinin müavini Gülağa Aslanlı da Hafta.az-a açıqlamasında mətbuatda yayımlanan partiya qərargahının sökülməsi haqda danışıb: “Müsavat Partiyası qərargahının sökülməsi və yerində göydələnin tikilməsi haqda nə rəsmi, nə də qeyri-rəsmi məlumat yoxdu. Sadəcə, qərargahın yerləşdiyi binanın yanxınlığında yeni bina tikilir. Həmin binanın da hansı məqsədlə tikildiyi haqda məlumat yoxdu. Tikilən binanın partiyanın yerləşdiyi qərargaha heç bir aidiyyatı yoxdu”.

Başqa bir məlumata görə, Müsavat Partiyasının qərargahının yerləşdiyi bina sökülməsi üçün artıq lahiyəyə düşüb. Sadəcə lahiyənin nə vaxt gerçəkləşdiriləcəyi bəlli deyil.