Moskvanın Biryulevo rayonunda 25 yaşlı rus gənci Yeqor Şerbakovu öldürməkdə ittiham edilən Azərbaycan vətəndaşı Orxan Zeynalovu həbs edən SOBR xüsusi təyinatlı dəstəsinin döyüşçüləri məhkəməyə verilir.

Virtualaz.org saytı Rusiya qaynaqlarına istinadən xəbər verir ki, rusiyalı insan haqları müdafiəçiləri SOBR döyüşçülərinin O.Zeynalovu həbs edərkən onunla “sərt davrandıqlarına görə” cəzalandırılmasını tələb edir.

SOBR döyüşçülərinə qarşı məhkəmə iddiasını “Obşestvenniy verdikt” fondundan hüquq müdafiəçiləri qaldırıb. İnsan haqları müdafiəçiləri müvafiq ərizə ilə bu gün məhkəməyə müraciət etməyə hazırlaşırlar.

İddia ərizəsində məhkəmədən SOBR döyüşçülərinin Moskva ətarfındakı Kolomna şəhərində qətldə ittiham olunan Azərbaycan vətəndaşının saxlanılması zamanı yol verdikləri hərəkətlərə hüquqi qiymət verilməsi istənilir.

Hüquq müdafiəçiləri əllərinə qandal keçirilmiş Zeynalovun yerə yıxılmasını və təpiklənməsini insan haqlarının pozulması kimi qiymətləndirir. Rusiyalı hüquq müdafiəçiləri bildirir ki, Zeynalovun vertolyotun döşəməsində aparılması, meşədə vəkilin iştirakı olmadan dindirilməsi, ona güclü ağrı verən hərəkətlər hüquq-mühafizə orqanları üçün yolverilməzdir. Xüsusən də Daxili İşlər Nazirliyində islahatların davam etdiyi bir vaxtda...

“Saxlanılmış şəxsə qarşı hüquq-mühafizə orqanlarının əməkdaşları tərəfindən hədsiz və əsası olmayan güc tətbiqinin televiziyalarda açıq-aşkar nümayiş etdirilməsi bu cür hərəkətləri legitimləşdirir, həm vətəndaşlar, həm polis bölmələri üçün “tətiyin çəkilməsi” kimi qəbul olunur. Əgər federal Daxili İşlər Nazirliyi bu cür həərkətlərə yol verirsə və onu peşəkarlıq nümunəsi kimi qiymətləndirirsə, təəssüf ki, bu, polis əməkdaşları üçün icazə verilmiş iş standartı kimi qəbul oluna bilər” - deyə hüquq müdafiəçiləri bildirir.

“Moskovskiy komsomolets” qəzeti isə rusiyalı hüquq müdafiəçilərinin bu addımnı tənqid edir, onları “Orxan fan-klubu”nun üzvləri adlandırır. Qəzet xatırladır ki, Azərbaycanda da artıq 25 yaşlı gənci öldürən qatilin müdafiəsi kampaniyası başlayıb.

“Bir az da keçsə, Azərbaycan bu personajı almaq üçün Rusiyaya pul təklif edəcək, onu vətəndə milli qəhrəmana çevirəcək və müxtəlif imtiyazlar verəcək” - deyə qəzet yazır.

Müəllif bildirir ki, hamının başı O.Zeynalovun müdafiəsinə qarışsa da onun ürəyindən bıçaqlayaraq öldürdüyü Yeqor Şerbakovun ailəsinin acılarına şərik çıxan, nişanlısı Kseniyanın məhv olmuş həyatı ilə maraqlanan yoxdur.

Qəzet rusiyalı insan haqları müdafiəçilərini ABŞ polisinin təhlükəli cinayətkarları yaxalayarkən necə davrandığına, onların azacıq da olsa müqavimət göstərməyə, qaçmağa cəhd edən cinayətkarı güllələyib deşik-deşik etdiyinə nəzər salmağa çağırıb.

* * *

“Hələ də müvəkkilim Orxan Zeynalovla görüşə bilməmişəm”.

Bunu APA-nın Moskva müxbirinə açıqlamasında Rusiya paytaxtında 25 yaşlı Yeqor Şerbakovu qətlər yetirməkdə şübhəli bilinən Orxan Zeynalovun vəkili Viktor Anikuşkin bildirib.

Onun sözlərinə görə, istintaq orqanları hələ də Orxan Zeynalovla görüşünə icazə verməyiblər.

Vəkil bu gün Presnenski Rayon Məhkəməsinin Orxan Zeynalov barəsində həbs-qətimkan tədbiri seçilməsi qərarından apelyasiya şikayəti verdiyini də bildirib: “Bu gün şikayətimi Moskva Şəhər Məhkəməsinə təqdim etdim”.

V.Anikuşkin Rusiya İstintaq Komitəsinin sədri Aleksandr Bastrıkin və Rusiya Federasiyanın baş prokuroru Yuri Çaykaya şikayət məktubu yazdığını da söyləyib: “Şikayət məktubu Orxan Zeynalov saxlanılan zaman hüquq-mühafizə orqanları tərəfindən ona qarşı göstərilən təzyiqlərlə bağlıdır. O, saxlanılan zaman təqsirsizlik prezumpsiyasının tələbləri ciddi şəkildə pozulub”.

Vəkil Orxan Zeynalovun ilkin ifadələri haqqında da danışıb. Onun sözlərinə görə, Orxan Zeynalov ilkin ifadəsində qətli özünü müdafiə etmək məqsədilə törətdiyini bildirib: “Orxan bildirdi ki, özünü müdafiə edib. Şerbakovu öldürmək fikri olmayıb”.

Virtualaz.org