Seçki bitsə də, Masallıda müxalifətçilərə təzyiqlər səngimir...
Masallıda 9 oktyabr seçki tamaşası arxada qalsa da, hələ də bölgələrdə seçkilərdən dolayı müxalifətçilərə təzyiqlər edilməsi barədə xəbərlər gəlir. Belə bölgələrdən biri də Masallıdır.

Bu mövzuda qəzetimizə danışan Müsavat Partiyası Masallı rayon təşkilatının sədri Xasay Səfəroğlunun sözlərinə görə, 9 oktyabrda Milli Şuranın müşahidəçisi olmuş şəxslərə müxtəlif şirnikləndirici təkliflər edilir, bu alınmayanda isə təzyiqlərə əl atırlar: “Yəni nə yolla olur-olsun, rayonda saxtalaşdırılmış seçkilər haqda demokratik rəy yaratmağa cəhdlər edilir. Hazırda Milli Şuranın müşahidəçilərinə şirnikləndirici vədlər verib seçkinin demokratik olması ilə bağlı danışmalarını tələb edirlər. Bu alınmayanda isə təzyiq göstərməyə başlayırlar. Bəzən heç Milli Şuranın müşahidəçisi olmayan insanları televiziyaya çıxarıb danışdırmaq, onlardan istifadə etməyə çalışırlar. Bununla da göstərmək istəyirlər ki, guya bu şəxslər Milli Şuranın müşahidəçiləridir. Son bir neçə gündə belə hallar intensivləşməyə başlayıb. Bəzi saytlar isə Milli Şuranın müşahidəçiləri olmuş şəxslərin adından saxta bəyanatlar verirlər”.

RT sədrinin dediyinə görə, hətta Müsavat Partiyası təəssübkeşlərindən müşahidəçi olmuş şəxslərin bəziləri qeyri-rəsmi polis şöbələrinə də çağırılıb: “Hesab edirik ki, bu təzyiqlər ancaq seçkilərlə bağlıdır. Çünki insanların polisə çağırılması üçün başqa heç bir əsas yoxdur. Bizdə dəqiq bilgilər var ki, hakimiyyət nümayəndələri Milli Şuraya öyrədilmiş adamları müşahidəçi qismində salmaq istəyib. Hətta bundan ötrü qabaqcadan 100 manat pul da vəd edilib. Lakin biz bu kimi halları hiss etdiyimizdən o adamlara rədd cavabı verdik”.