Bəhruz Quliyev: “Fredeem House”un hesabatları Böyük Britaniya, Almaniya və digər qərb dövlətlərinin “siyasi mətbəx”lərində hazırlanır”

“Fredeem House” beynəlxalq təşkilatının yaydığı hesabatlar Böyük Britaniya, Almaniya və digər qərb dövlətlərinin “siyasi mətbəx”lərində hazırlanır. Təşkilatın ölkəmizə qarşı qərəzli münasibətinin arxasında da adıçəkilən dövlətlərin Azərbaycana təzyiq etmək etməklə, iqtisadi maraqlarını həyata keçirmək niyyəti dayanır”. Bu sözləri Editor.az-a açıqlamasında “Səs” qəzetinin və eyniadlı informasiya agentliyinin rəhbəri Bəhruz Quliyev söyləyib.

Onun sözlərinə görə, özünü dünyanın hegemon dövlətləri sayan bir sıra qərb ölkələri öz iqtisadi imperiyalarını möhkəmləndirmək və müxtəlif dövlətlərə təzyiq rıçaqlarını əlində saxlamaq niyyətilə bir sıra beynəlxalq təşkilatlar təsis ediblər: “Fredeem House” təşkilatı da bu qəbildəndir. Bu təşkilat böyük dövlətlərin əlində alətə çevrilib və heç bir fakta söykənməyən, qeyri-dəqiq və qeyri-peşəkar hesabatlar yaymaqla məşğuldur. Əksər hallarda isə sözün əsl mənasında qeyri-demokratik mühitin hökm sürdüyü ölkələri deyil, inkişafın qeydə alındığı dövlətləri hədəf seçir. Ölkəmizə qarşı da oxşar münasibət hökm sürür. Bunun da əsas səbəbi Azərbaycanın heç bir dövlətin daxili işlərimizə qarışmasına imkan verməməsi ilə bağlıdır”.

Qurumun yaydığı hesabatda əksini tapan faktlara gəlincə, həmsöhbətimiz bunu həm də onların qeyri-peşəkarlığı ilə əlaqələndirir: “Onlar öz araşdırmalarına ciddi yanaşmırlar. Azərbaycanda fəaliyyət göstərən və müxalif mövqeli qeyri-hökumət təşkilatlarının hazırladıqları hesabatı üzündən köçürməklə, guya ciddi araşdırma apardıqlarını ortaya qoymaq istəyirlər. Bu isə öz növbəsində onların heç də iddia etdikləri kimi, peşəkar insan haqları təşkilatı yox, bəzi dövlətlərinin əlinə oynayan bir biznes şirkəti olduğunu bir daha ortaya qoyur”.