Sabirabad rayonunun Qaraqaşlı kəndinin bir qrup sakini “Yeni Müsavat”a müraciət edib. “Biz kəndimizə qarşı edilən haqsızlığa dözməyib bu məlumatı veririk” yazan sabirabadlılar bildirib ki, yaşadıqları kənd Sabirabad rayonunun tabeliyində olsa da, ərazi baxımından Hacıqabul rayonuna yaxındır:

“Hacıqabul rayonunun Qarasu kəndindən öz kənd əhalimizin köməyi ilə qaz xətti çəkdirmişdik. Elə oldu ki, Hacıqabul rayonu öz ərazisinə yeni qaz xətti çəkdirdiyinə görə bizim kəndə verilən qazın nəqli dayandırıldı. İndi bizə bu barədə qərarın kim tərəfindən verildiyi məlum deyil”. Kənd sakini daha sonra yazır: “Bizim kəndə gələn qaz xətti Hacıqabul Qaz İstismar İdarəsinin müdirinin göstərişi ilə qaz idarəsinin işçiləri tərəfindən kəsilərək, Hacıqabul Qaz İstismar İdarəsinin həyətinə daşınır. Biz bu yaxınlarda işçilərdən qaz borularını haraya daşıdıqlarını soruşanda cavabları belə oldu ki, sizin bələdiyyənin xəbəri var. Biz onlara başa salmağa çalışdıq ki, bu qaz xətti kənd əhalisinin maliyyəsi ilə çəkilib və kənd əhalisinə məxsusdur. Ancaq onlar hər hansı arqument gətirə bilmədilər”. Qaraqaşlı sakinləri boruların doğranıldıqdan sonra avto-kran vasitəsilə 90 JN 474 nömrə nişanlı avtomaşına yüklənilərək aparıldığını da yazıblar. “Sizdən xahiş edirik ki, payız-qış mövsümünün başlandığı bir vaxtda üzləşdiyimiz qaz probleminin həll olunmasına köməklik göstərəsiniz” deyə, müraciətdə bildirilib.

Qeyd edək ki, müraciətə kəsilərək daşınan və adıçəkilən idarənin həyətinə yığılan qaz borularının şəkilləri də əlavə olunub. Ümid edirik ki, müvafiq təşkilatlar qazsız qoyulmaqla bərabər əmlakına qəsd edilən Qaraqaşlı sakinlərinin müraciətini araşdıracaqlar.

Adıçəkilən qurum rəsmilərinin də mövqeyini dərc etməyə hazırıq.

M.HÜSEYNLİ