Xatırlayırsınızsa, qəzetimizin ötən saylarında dərc olunmuş və ekstrasens Zirəddin Rzayevin ifşasına yönəldilmiş materiallardan birində qeyd olunmuşdu ki, bu gün onun şəxsi müraciətlərə əsasən keçirdiyi baxıçılıq və öncəgörmə seanslarına düşmək üçün bir neçə ay əvvəlcədən növbəyə durmaq və azı 2000 manat məbləğində pul ödəmək lazımdır.
Həmçinin materialda qeyd olunmuşdu ki, ölkəmizin bəzi yüksək vəzifəli şəxsləri, onların ailə üzvləri tanınmış ekstrasensin müəyyən seansları müqabilində 50000-100000 manat civarında pul və ya həmin məbləğə müvafiq bahalı hədiyyələr verirlər.
Yeni aldığımız məlumatda isə Z.Rzayevə növbəti belə bir hədiyyənin bu yaxınlarda Azərbaycan Sahibkarlar Konfederasiyasının (ASK) prezidenti Məmməd Musayevin ailəsindən təqdim olunduğu bildirilir.Maraqlıdır ki, bir müddət əvvəl biz həmçinin M.Musayevin ASK prezidenti vəzifəsinə gətirilməsinin bəzi təfərrüatları və bu təyinatdan doğan müxtəlif problemləri də qəzetimizdə işıqlandırmışdıq.

Həmin materialda qeyd olunmuşdu ki, əksər mənbələrin rəyinə görə 2009-cu ildə İqtisadi İnkişaf naziri Şahin Mustafayevin birbaşa dəstəyi ilə konfederasiyanın prezidenti postuna gətirilən Məmməd Musayev, bu vəzifənin verdiyi imtiyaz və səlahiyyətlərdən daha çox şəxsi biznesinin çiçəklənməsi üçün faydalanır. Təyinat zamanı isə diqqəti çəkən əsas cəhətlərdən biri də bu idi ki, ölkənin ən iri və nüfuzlu iş adamlarının təmsil olunduğu qurumun rəhbərliyinə gələrkən M.Musayev burada bir çox etirazlarla rastlaşmalı olmuşdu. Məsələ bundadır ki, ölkə qanunları və beynəlxalq razılaşmalar əsasında fəaliyyət göstərən iri sahibkarlar Məmməd Musayevin tətbiq etdiyi idarəçilik üsullarını, daha çox “şapka” üsuluna istinad edən iqtisadi mexanizmini qəbul etmək istəmirdilər. Lakin, həmin vaxt nüfuzlu himayədarların patronajlığı son sözü demiş oldu. Digər tərəfdən isə bu patronajın kim tərəfindən göstərildiyi barədə də ölkə mətbuatında müxtəlif versiyalar irəli sürülmüşdü. Məsələn, belə məlumatlardan birində göstərilirdi ki, konfederasiyanın rəhbərliyinə gətirilmə ərəfəsində M.Musayevin vəziyyəti o qədər də ürəkaçan deyildi. Belə ki, həmin vaxt onun “Muğanbank”da olan payının əlindən alınması, özünün həyata keçirdiyi bir sıra maxinasiyaların nəticəsi olaraq digər kommersiya obyektlərinin də ağır duruma düşməsi bu vəziyyəti daha da gərginləşdirirdi. Məhz belə bir məqamda, 2008-ci ilin dekabr ayında Şahin Mustafayevin İqtisadi İnkişaf naziri təyin olunması isə vəziyyəti radikal şəkildə dəyişmiş oldu. Nazirlə olan qohumluq əlaqələrindən yararlanan M.Musayev tez bir zamanda biznesinə yeni nəfəs verə bildi. Mətbuatda qeyd olunurdu ki, bu əməkdaşlıq Ş.Mustafayev üçün də faydalı idi. Belə ki, nazir də Məmməd Musayevin timsalında öz biznesinin idarə olunmasını etibar edə iləcək bir şəxs görmüşdü. Beləliklə, qarşılıqlı maraqlar bu iki şəxsi birləşdirdi və az sonra M.Musayev ASK-nın prezidenti postuna yiyələndi. Daha sonra məlumatlarda “Aqrarkredit” Səhmdar Kredit Təşkilatının İdarə Heyətinin sədri olmaqla yanaşı, Məmməd Musayevin “Turan Bank”, “Azər-Türk Bank”, “Başak-İnam” sığorta şirkəti kimi iri maliyyə qurumlarında, bir neçə böyük tikinti şirkətlərində də payı olduğu bildirilirdi...

Yeni aldığımız məlumatda isə Musayevlər ailəsinin öz kommersiya imperiyalarını bu yaxınlarda daha bir tibb müəssisəi açmaqla genişləndirdikləri bildirilir. Göstərilir ki, Məmməd Musayev öz qızı üçün Badamdar qəsəbəsi ərazisində özəl klinika açmışdır. Ən maraqlısı isə budur ki, mənbə məhz bu münasibətlə M.Musayevin həyat yoldaşı tərəfindən ekstrasens Zirəddin Rzayevə “Mercedes Gelenvagen” markalı avtomobilin hədiyyə olunduğunu iddia edir. Lakin bu jest heç də Musayevlərin səxavətinin göstəricisi kimi qəbul edilməməlidir. Ən azından Məmməd Musayevin keçmiş kürəkəni (qızının birinci həyat yoldaşı) Natiq bununla razılaşa bilməz. Belə ki, M.Musayevin qızı ilə boşandıqdan sonra evinin əlindən alındığını iddia edən Natiq, bu gün də ona qarşı törədilmiş haqsızlıqdan şikayətçidir. M.Musayevin “səxavətini” ən dürüst qiymətləndirə biləcək insanlar isə, onun sahib olduğu müxtəlif müəssisələrdə çalışan və bu gün də məvaciblərinin 50 manat artırılması xəyalı ilə yaşayan əməkdaşlar ola bilərlər...