“Onun barəsində pis heç nə deyə bilmərəm”
“Xalam nə deyib, özü bilər...”
Sabiq deputat Gülər Əhmədova ilə bağlı məhkəmənin son iclasında məlum “mandat qalmaqalı”nın tərəflərindən biri, ötən ilin 26 dekabrında dünyasını dəyişən Sevinc Babayevanın xalası və bacısı ilginc ifadələr verdilər. Onlar bildirdilər ki, İstanbulda S.Babayevanı himayə edən türkiyəli iş adamı Səlcuq Ağlayan ona pis münasibət göstərib. S.Ağlayanın S.Babayevanı ac saxladığını, onu silahla qorxutduğunu, telefon danışıqlarını daim nəzarətdə saxladığını deyən şahidlər sonuncunun G.Əhmədovanın adamı kimi təqdim ediblər.

“Yeni Müsavat”ın ötən saylarında S.Ağlayan bu ittihamlara cavab verərək, S.Babayevanın bacısı və xalasının yalan danışdığını deyib. “Sevinc sağ olsaydı, onların cavabını verərdi” deyən, S.Ağlayan mərhuməyə hər zaman bacısı kimi yanaşdığını və yardım əlini uzatdığını da vurğulayıb.

S.Babayevanın oğlu Ayxan Məmmədov da xalasının və anasının S.Ağlayanla bağlı dediklərinə qatılmadığını bildirdi. “Yeni Müsavat”a açıqlamasında A.Məmmədov türkiyəli iş adamı barədə pis heç nə deyə bilməyəcəyini vurğuladı: “Xalam bircə onu düz deyir ki, biz İstanbula gedəndə anamın yaşadığı evdə yeməyə heç nə yox idi. Biz getdik və bazarlıq elədik. Amma onun anamı ac saxladığını deyə bilmərəm. Anam hər zaman mənə deyirdi ki, Səlcuq Ağlayan pis adam deyil. Münasibətləri də yaxşı idi, bir-biri ilə mehriban idilər”.
Müsahibimiz S.Ağlayanın S.Babayevanı silahla qorxutması ilə bağlı iddiaları da yalanladı. Onun sözlərinə görə, belə bir silah səhnəsini görməyib və bu haqda hər hansı məlumatı yoxdur: “Mən sizə bir şey deyim ki. Səlcuq Ağlayan anama heç bir pislik etməyib. Əksinə, məni ölkədən buraxmırdılar. Amma o, çətin vaxtlarda yardım əlini bizə və anama uzadıb”.
A.Məmmədov xalası və anasının xalası ilə bu ifadələrlə bağlı danışmadığını dedi: “O da onların öz fikridir, nə deyə bilərəm ki? Amma xalam məhkəmədə dediklərini mənim özümə də deyib. Mən ancaq gözümlə gördüyüm şeyləri danışıram. Səlcuq Ağlayanın anama hər hansı pis münasibətini görməmişəm. Görsəm, deyərdim”.

“Yeni Müsavat”ın çapını dayandırdığı vaxt musavat.com saytında G.Əhmədovanın istintaqını aparan müstəntiq Emzar Qocayev barədə yazmışdıq. Həmin yazıda qeyd olunmuşdu ki, sabiq deputatın məhkəməsi yeni başlasa da, artıq şahidlərin işi aparan müstəntiq Emzar Qocayevdən şikayətləri, sonuncunun onlara göstərdiyi mənəvi təzyiq üsulları diqqət çəkir. Məlum olub ki, müstəntiq işi istədiyi istiqamətə yönləndirmək üçün şahidlərin ibtidai istintaqa verdiyi ifadələrinə onların adından müəyyən əlavələr edib.
Məsələn, G.Əhmədovanın deputat kimi köməkçisi, “Mərkəz” qəzetində isə katibəsi işləmiş Adilə Əlihüseynli məhkəməyə ifadəsində bildirmişdi ki, ibtidai istintaqda ifadə verən zaman müstəntiq ona təzyiq edib. Müstəntiq Emzar Qocayevin “onsuz da səndən əvvəl ifadə verənlər hər şeyi təsdiqləyiblər” deyib: “Müstəntiq deyirdi ki, onsuz da Gülər içəridədir. Başın ağrıyacaq sənin. Mən də iki aylıq körpəmlə getmişdim ora. Uşağım gözümün qabağına gəldi və dediklərini elədim”.

Adilə Əlihüseynlinin bacısı Günay Vəliyeva da ibtidai istintaqa təzyiq altında ifadə verdiyini bildirmişdi. Onun sözlərinə görə, ifadə zamanı müstəntiq E.Qocayev tez-tez otağa girərək “bunu hələ tutmamısınız”, “səni ”Sultan" restoranında Sevinc Babayeva ilı birgə görüblər" deyərək ona psixoloji təzyiq göstərirmiş.

Daha bir şahid Rüfət Hüseynovun ibtidai istintaqa ifadəsində isə göstərilmişdi ki, mərhum Sevinc Babayevaya bileti G.Əhmədovun oğlu Toğrul Əhmədovun göstərişi ilə alıb. Ancaq şahid məhkəmədə bunu təsdiq etmədi və bildirdi ki, bu barədə zamanında müstəntiq Emzar Qocayevə də bildirib: “O da dedi ki, gələcəkdə bunu bildirərsən. Amma bu dəyişiklik edilmədi. Mən buna etirazımı ərizə yazaraq bildirdim”.

Tavat Şirinova adlı şahid isə ifadəsində ciddi dəyişiklik edildiyini, məhkəmədən çıxan kimi işi aparan müstəntiq Emzar Qocayevin yanına gedib bunun hesabını soruşacağını demişdi.

G.Əhmədova elə həmin şahidin dediklərinə replika verərək, “müstəntiq mənim kimi 3 dəfə deputat olmuş bir şəxsin ifadəsini belə təhrif edibsə, bunlara da edərdi” bildirmişdi.
Sonuncu prosesdə sabiq deputat həmçinin E.Qocayevə hiddətlənərək, məhkəmə vasitəsilə “Emzar Qocayev, adam kişi olar” mesajını yollamışdı. Sabiq deputatın görə, müstəntiq onun dostcasına dediyi bəzi sözləri şahid ifadələrinə əlavə edib.
Yazı yayımlanan gün ona saytda şərh yazanlardan biri də Səlcuq Ağlayan oldu. Türkiyəli iş adamı bildirdi ki, E.Qocayev İstanbula gəlib onu dindirəndə təzyiq göstərməyə çalışıb: “Türkiyədə də mənə təzyiq göstərib, müəyyən mesajlar göndərməyə çalışdı. Mən də ona "burada demokratiya var, öz ölkənlə qarışdırma dedim".

S.Ağlayan gələcəkdə istintaqdan ona yeni bir təzyiq gələrsə, ona qarşı olan ədalətsizlikləri detalları ilə açıqlayacağını bildirib.