Ziya Məmmədovun işçisinin qisas əməliyyatı
DYP-nin cərimələdiyi NN-in İntellektual İdarəetmə Mərkəzinin rəisi işıqforların fəaliyyətini iflic etdirərək Bakıda böyük tıxaclar yaradır; Elnur Abdullayevin bu əməllərindən ölkə rəhbərliyinə şikayət oluna bilər

Nəqliyyat Nazirliyinin əməkdaşları ilə Baş Dövlət Yol Polisi İdarəsinin (BDYPİ) işçiləri arasında zaman-zaman ciddi münaqişələrin baş verməsi və problemlərin olması barədə indiyədək müxtəlif xəbərlər yayılıb. Həmin məlumatlarda bu qurumların əməkdaşlarının bir-birinə rəqib, bəzən isə düşmən gözü ilə baxdıqları iddia olunur. Bu problem Bakıda daha ciddidi.



Aldığımız son məlumatlarda isə vəziyyətin daha da kəskinləşdiyi və Nəqliyyat Nazirliyi əməkdaşlarının artıq BDYPİ-ni şantaj etdiyi ortaya qoyulur.

Bu barədə əməkdaşımıza baş verən hadisələr barədə kifayət qədər bilgisi olan şəxs məlumat verib. Onun sözlərinə görə, bir müddət əvvəl Bakıda yol polisinin əməkdaşları yol hərəkəti qaydalarını kobud şəkildə pozan bir avtomobili saxlayıblar. Həmin avtomobilin sürücüsü “QAİ” əməkdaşları ilə kobud davranıb və faktiki olaraq onlara tabe olmayıb, BDYPİ işçilərini təhqir edib. Həmin şəxs Nəqliyyat Nazirliyinin nəzdində fəaliyyət göstərən Nəqliyyatın İntellektual İdarəetmə Mərkəzinin baş direktoru Elnur Abdullayevin sürücüsü olduğunu deyərək, onun idarə etdiyi avtomobilin saxlanılmasının “QAİ”yə baha başa gələcəyini bildirib. BDYPİ əməkdaşları isə nəzərdə tutulan qaydada ona cərimə balı və pul cəriməsi yazıblar. Məhz bu hadisədən sonra Nəqliyyat Nazirliyinin əməkdaşları ilə BDYPİ işçiləri arasında münasibətlər daha da gərginləşib.



Hazırda işıqforların tənzimlənməsinə nəzarəti həyata keçirən Nəqliyyat Nazirliyinin İntellektual İdaretmə Mərkəzinin rəhbəri günün müxtəlif saatlarında şəhərin ayrı-ayrı yerlərindəki işıqforların fəaliyyətinin pozulması barədə göstəriş verib. Bu barədə məlumatlı şəxsin bildirdiyinə görə, E.Abdullayevin bu göstərişindən sonra zaman-zaman şəhərin müxtəlif yerlərində işıqforlarda problemlər yaranır və onlara nəzarət Nəqliyyatın İntellektual İdarəetmə Mərkəzinin səlahiyyətində olduğundan yol polisləri buna müdaxilə edə bilmirlər. Nəticədə saatlarla sürən uzun tıxaclar yaranır və yol polisləri problemi aradan qaldırmaq üçün uzun müddət əmək sərf etməli olurlar.



Aldığımız məlumatda o da qeyd edilir ki, hər dəfə belə tıxaclar yarananda və xüsusən də ölkə rəhbərliyində təmsil olunan şəxslərdən kimlərsə uzun müddət tıxaclarda qalanda BDYPİ hədəfə gəlir və mütləq kimlərsə cəzalandırılır. Xəbərdə qeyd edilir ki, E.Abdullayevin rəhbəri olduğu idarənin “qisas əməliyyatı” nəticəsində bir neçə dəfə yüksək məmurlardan da tıxacda qalanlar olub və nəticədə BDYPİ-nin məsul işçiləri buna görə danlanıb. İşıqforların tənzimlənməsi səlahiyyəti Nəqliyyatın İntellektual İdarəetmə Mərkəzinin səlahiyyətində olsa da, yol hərəkəti qaydalarının tənzimlənməsinə BDYPİ məsul olduğundan bu sahədə yaranmış problemlərə görə qınaq hədəfinə məhz “DYP” çevrilir.

Bu sahədə baş verənlər barədə bizi məlumatlandıran şəxsin sözlərinə görə, hazırda Nəqliyyat Nazirliyinin nəzdində fəaliyyət göstərən bir idarənin tıxac şantajına görə NN-lə BDYPİ arasındakı problemlər pikk həddə çatıb. E.Abdullayev nəqliyyat nazirinə və digər yüksək vəzifəli məmurlara güvənərək əməllərini davam etdirdiyindən BDYPİ baş verənlərlə bağlı ölkə rəhbərliyinə müraciət etmək qərarına gəlib.



Qeyd edək ki, bu arada millət vəkili Çingiz Qənizadə də bu iki qurum arasında yaranmış problem barədə danışıb. Ç.Qənizadə avropa.info-ya bildirib ki, o özü də belə faktlarla rastlaşıb: “Mən dəfələrlə bunun şahidiyəm və məsələ ilə bağlı yol polsi ilə əlaqə saxlamışam. Onlar da bildiriblər ki, işıqforlarda yaranmış problem nəticəsində tıxacları aradan qaldıra bilmirlər. Yaranmış vəziyyətlə bağlı Nəqliyyatın İntellektual İdarəetmə Mərkəzinə müraciət etmişəm də 2-3 saat ərzində tıxacları aradan qaldırmaq mümkün olmayıb. İşıqforlarda problemin aradan qaldırılmasına polis müdaxilə edə bilmədyindən bu məsələdə çətinlik çəkirlər”.

Ç.Qənizadə deyib ki, bu məsələ ilə bağlı nəqliyyat və daxili işlər nazirlərinə müraciət edəcək: “Əgər onlar öz aralarında problemin həlli yolunu tapa bilməzsə və səlahiyyət uğrunda mübarizə davam edərsə, o zaman prezidentə və baş nazirə müraciət edəcəyəm”.

Onun fikrincə, bu səlahiyyət yol polisinə verilməlidir: “Çünki məntiq də bunu tələb edir. Yol hərəkət qaydaları ilə yol polisi məşğul olur və səlahiyyət bu quruma verilərsə daha məqsədəuyğun olardı”.

Məsələ ilə bağlı qarşı tərəfin mövqeyini dərc etməyə hazırıq