"Gülərgeyt" Olayı Nə Zaman Açılacaq?Noyabrın 18-də Bakı Ağır Cinayətlər Məhkəməsində hakim Əlisultan Osmanovun sədrliyi ilə sabiq millət vəkili Gülər Əhmədovanın cinayət işi üzrə məhkəmə prosesi işini davam etdirib.

Sabiq millət vəkili Gülər Əhmədovanın cinayət işi üzrə aparılan məhkəmə prosesi sona çatmaqdadır. Dövlət ittihamçısı Gülər Əhmədovanın 4 il müdətinə azadlıqdan məhrum edilməsini istəyib. Videogörüntülərdə adıçəkilən Ramiz Mehdiyev bu və ya digər şəkildə məhkəməyə cəlb edilmədi.

Noyabrın 18-də Bakı Ağır Cinayətlər Məhkəməsində hakim Əlisultan Osmanovun sədrliyi ilə sabiq millət vəkili Gülər Əhmədovanın cinayət işi üzrə məhkəmə prosesi işini davam etdirib. Hakim bildirib ki, ötən prosesdə bir çox sənədlər tədqiq olunub və cinayət işinə aid olan videomateriallara baxış keçirilməsi qalıb. Videolara hamının baxdığını deyən hakim bununla bağlı tərəflərin fikirlərini soruşub. Gülər Əhmədova işin içində olan videoların orginal olmadığını, hamısının montaj edildiyini söyləyib.

Daha sonra G.Əhmədovanın vəkili Əfsər Talıbov ekspert rəyi ilə bağlı fikirlərini bildirib.

“Elşad Abdullayev qaynatası Hüseyn Əhmədova məxsus ofisdən qeyri-qanuni istifadə edib. Elşada məxsus olduğu deyilən “Era” hüquq firması əslində Şamil Hüseynov adlı şəxsin adına sənədləşdirilib. Deyirlər "həmin ofisə gizli kameranı təhlükəsizlik məqsədilə qoyublar". Əslində, Elşad Abdullayev həmin videogörüntüləri şantaj məqsədilə istifadə etmək üçün planlaşdırılmış şəkildə çəkdirib”, - deyən vəkil Elşad Abdullayevə cinayət işi açılmasını istəyib.

Dövlət ittihamçısı Eldar Həmzəyev videolarla bağlı vəsatətin təmin oluna bilməyəcəyini vurğulayıb: "Çünki həmin məsələ ilə bağlı cinayət işinin başladılması istintaq orqanı tərəfindən rədd olunub".

Çıxış edən Gülər Əhmədova Elşad Abdullayevin bacısı oğlundan dayısının videoların tam versiyasını göndərməsini xahiş etdiyini söyləyib: “Lakin o göndərməyib. Dünyanın heç bir ölkəsində məhkəmə əsli olmayan sənəd qəbul etmir. Ekspert isə original olmayan, üzərində dəfələrlə müxtəlif əməliyyatlar keçirilmiş, formatı dəyişdirilmiş, montaj edilmiş videolara rəy vermir. İstintaq bunu sübut kimi istifadə edə bilməz".

Dövlət ittihamçısı Eldar Həmzəyev videoçəkilişlərdə əks olunan məlumatlar əsasında toplanmış material üzrə Bakı şəhər prokurorluğunda Cinayət Məcəlləsinin 178.3.2-ci maddəsi ilə cinayət işi başlandığını deyib:
"İstintaqla müəyyən edilib ki, G.Əhmədova külli miqdarda özgə əmlakını ələ keçirmək məqsədi ilə 2005-ci ilin oktyabr-noyabr aylarında tanışı Sevinc Babayeva ilə qabaqcadan əlbir olub bir qrup şəxs halında cinayət əlaqəsinə girməklə sonuncunun vasitəsi ilə Azərbaycan Beynəlxalq Universitetinin rektoru vəzifəsində işləmiş E.Abdullayevlə görüşərək ona qarşı olan etibarından sui-istifadə etməklə E.Abdullayevə deputat seçilməsinə köməklik edəcəyi barədə yalan vədlər verib. Elşad Abdullayevi aldadaraq 1.000.000 ABŞ dollarını ələ keçirməklə dələduzluq edib".

Dövlət ittihamçısı Gülər Əhmədovaya qarşı irəli sürülmüş ittihamların istintaqla tam sübuta yetirildiyini hesab edir. O qeyd edib ki, Gülər Əhmədova hər iki ittihamı qəbul etməyərək özünü təqsirli bilmədiyini desə də, bu təqsirləndirilən şəxsin müdafiə taktikasıdır.

Sonda dövlət ittihamçısı Gülər Əhmədovanın himayəsində azyaşlı uşağın olmasını, onun 3 dəfə Milli Məclisə deputat seçilməsini və s. nəzərə alaraq cəza təyin edilərkən Cinayət Məcəlləsinin 62-ci maddəsinin tətbiq edilməsini mümkün hesab edib. 178.3.2 maddəsi üzrə 3 il 6 ay, 307.2-ci maddə üzrə isə 2 il azadlıqdan məhrum edilməsini, cəzaların toplanması və Cinayət Məcəlləsinin 62-ci maddəsi tətbiq olunmaqla Gülər Əhmədovanın 4 il müddətinə azadlıqdan məhrum edilmə cəzasına məhkum olunmasını istəyib.

Növbəti proses 21 noyabr saat 10.30-da olacaq.

Beləcə, mətbuatda dövlətin önəmli adlarının çəkildiyi, ciddi dövləti cinayətlərin açıla biləcəyi "Gülərgeyt" olayı dələduzluq adı ilə arxivə göndərilməkdədir. Elşad Abdullayevin internet vasitəsi ilə yayımladığı videolarda deputat kürsüsünün alınıb satılmasında birbaşa prezidentin, Prezident Administrasiyasının rəhbəri Ramiz Mehdiyevin adları çəkilirdi. Videogörüntülərdə Gülər Əhmədova Ramiz Mehdiyeva pulu şəxsən verdiyini deyirdi. Belə bir videogörüntünün üzərində qurulan məhkəmənin predmeti isə yalnız bir deputatla bir rektor arasındakı dələduzluğun araşdırılmasına yönəldilərək dövləti cinayətlərin üstü ört-basdır edildi.

Hardadır 1. 000. 000 dollar? Gülər Əhmədova bu pulları kimə verib? Nə üçün videolarda adı dəfələrlə açıq-aşkar çəkilən Ramiz Mehdiyev məhkəmə prosesinə bu və digər qismdə cəlb edilmədi? Nə üçün videolarda Gülər Əhmədovanın pulları Administrasiyanın başçısına verdiyini dediyi halda məhkəmə bu epizodların üstündən susqunluqla keçdi?

Bu proses "Gülərgeyt" olayını araşdırmadı, suallar cavabsız qaldı. Deməli, bu cinayət də qaldı gələcəyin məhkəməsinə. Beləcə, 1. 000.000 dolları mənimsəməklə dələduzluqda ittiham olunan Gülər Əhmədova isə cəmi-cümlə 4 il müddətinə azadlığını itirəcək.