Ağır Cinayətlər Məhkəməsində həbsdə olan sabiq deputat Gülər Əhmədovanın cinayət işi üzrə məhkəmə prosesi günün ikinci yarısında davam etdirilib.
APA-nın məlumatına görə, hakim Əlisultan Osmanovun sədrliyi ilə keçirilən prosesdə Gülər Əhmədovanın vəkili Əfsər Talıbov çıxışını davam etdirib. Əfsər Talıbov bildirib ki, Gülər Əhmədovanın əməlində cinayət tərkibi yoxdur. Vəkil xahiş edib ki, cinayət işinə xitam verilsin və G. Əhmədova barəsində bəraət hökmü çıxarılsın.

Daha sonra son söz demək üçün söz G. Əhmədovaya verilib. Təqsirləndirilən şəxs çıxışa hazır olmadığını bildirib: “Məhkəmə prosesləri tez-tez təyin olunur. Mən özümü yaxşı hiss etmirəm. Təcridxanada isə yaxşı həkim yoxdur. Prosesə gələndə dərman içib, gəlirəm. Xahiş edirəm ki, yaxşı bir həkimin məni müayinə etməsinə köməklik göstərəsiniz. Həmçinin prosesdə vəkilimin yanında oturmağıma icazə vermənizi xahiş edidrəm. Bu, iztirablardan bir qədər azad olmağıma kömək edər”.

G. Əhmədova məhkəmədən çıxış üçün vaxt istəyib.

Hakim isə deyib ki, həkim məsələsi məhkəmənin səlahiyyətində deyil. Məhkəmə G. Əhmədovaya çıxış üçün vaxt verib.

Proses dekabrın 2-də davam etdiriləcək.

Xatırladaq ki, fəaliyyəti dayandırılmış Azərbaycan Beynəlxalq Universitetinin sabiq rektoru Elşad Abdullayevin ötən ilin sentyabrında yaydığı qalmaqallı videodan sonra Gülər Əhmədova mandatından imtina edib. Fevralın 13-də isə G. Əhmədova barəsində həbs-qətimkan tədbiri seçilib. Bundan sonra həmin müddət iki dəfə artırılıb.

G. Əhmədova Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) və 307.2-ci (qabaqcadan vəd etmədən ağır cinayəti gizlətmə) maddələri ilə təqsirləndirilir.