İntihar edən iş adamının anasından şok ittihamlar


Bu ilin aprel ayında intihar edən azərbaycanlı iş adamı Bəxtiyar Məmmədovla bağlı son günlər mətbuatda gedən iddialara iş adamının ailəsi də reaksiya verib. Məsələyə aydınlıq gətirmək üçün “Qafqazinfo”ya müraciət edən Bəxtiyar Məmmədovun anası və qardaşları mətbuata özünü Bəxtiyarın həyat yoldaşı kimi təqdim edən Arzu Salahovanın iddilarını təkzib ediblər.

Xatırladaq ki, Arzu Salahova mətbuata açıqlamasında bildirmişdi ki, Fövqəladə hallar nazirinin müavini Orucəli Hacıyevin bacısı oğlu Sunay Əliyev dayısının adından yalan vədlər verərək Bəxtiyar Məmmədovun külli miqdarda pulunu mənimsəyib. Salahovanın sözlərinə görə, Sunay Əliyev 2011-2012-ci illərdə respublikaya klinker gətirilməsinin Orucəli Hacıyevin nəzarətində olduğunu deyərək klinker alqı-satqısının həyat yoldaşıma veriləcəyi vədi ilə aldadıb və şəxsən ondan bunun üçün 1 milyon alıb.

Bəxtiyarın anası və qardaşları isə “Qafqazinfo”ya müraciət edərək, heç vaxt Arzu Salahova adlı gəlinlərinin olmadığını və əllərində bunu təsdiq edə biləcək rəsmi sənədlərin olduğunu bildiriblər.

İş adamının anası Şəfiqə Məmmədova sözlərinə görə, Fövqəladə hallar nazirinin müavini Orucəli Hacıyevin bacısı oğlunun Bəxtiyarın küllü miqdarda pulunu mənimsəməsi ilə bağlı həmin qadının mətbuatda səsləndirdiyi fikirlər tamamilə yalandır: “Qadının kim olduğunu bilmirəm, mənim gəlinim var, ZAQS kağızı, uşaqları var. Oğlum küçədə kiməsə salam verirsə, həyat yoldaşı olur?”.

Ş. Məmmədova oğlu Bəxtiyarın ölümündə “Amrahbank” da baş mühasib işləyən Arzu Salahova və onun vasitəsilə tanış olduğu Daxili İşlər Nazirliyinin Tikinti və Quraşdırma İdarəsinin rəisi Adil Ağayevin əli olduğunu iddia edir. “Özünə qəsd etmədən öncə gecə saat 2-3-də qadının vasitəsilə banka çağırdılar. Oğlum gecə 3-4 saat telefonla danışıb. Nə danışdığını bilmirik. Bəxtiyar səhər saat 7-də banka gedib, oradan çıxanda qanı qara idi. Axşam saat 6-da mənə zəng edib, dedi ki, “ana sən səbrli, dözümlüsən. 15 il uşaqlara baxarsan”. Ona dedim ki, başa düşmədim, oğlum, sən nə deyirsən. Bəxtiyar mənə telefonda söylədi ki, mən “maşennik” deyiləm, bu adı üstümə götürə bilmərəm. Mən şəhərdən ora gedib çatana qədər, o artıq intihar etmişdi.

Guya Bəxtiyar Arzu Salahovadan aldığı pulları Orucəli Hacıyevin bacısı oğlanlarına verib. Orucəli müəllimin bu işdən xəbəri yoxdur. Bəxtiyarın isə heç vaxt kimsəyə borcu olmayıb”.

Bəxtiyar Məmmədovun qardaşı bildirir ki, onun bütün pul köçürmələri “Amrahbank” vasitəsilə olub. Arzu adlı qadınla tanış olduqdan sonra qardaşının pul köçürmələri həmin qadının əlində olub. Onu DİN-də Tikinti Quraşdırma İdarəsinin rəisi Adil Ağayevlə də Arzu tanış edib: “Bəxtiyar Məmmədov 2009-dan, 2013-ə kimi Adillə işləyir. Xırdalanda bina tikmək üçün qardaşımın hesabına 1 milyona torpaq sahəsi alınır.

Sonra Binəqədidə 450 min manata Adillə şərikli torpaq alırlar. 2012-də DİN-də tikinti rəisi olmaq üçün qardaşımdan 1 milyon 500 min alır, onu Qasımın yerinə qoyacağını deyir. Həmin şəxsin təqaüdə gedəcəyini, onun isə bu yerə layiq namizəd olduğunu deyir. İndi də hər ikisi birləşib qardaşımın dostlarını şantaj edirlər. Guya Bəxtiyar -onlardan aldığı 1 milyondan çox pulu Orucəli Hacıyevin bacısı oğlanlarına verib. Bizə dəfələrlə gəlin, birləşib onlardan pulu alaq, deyiblər biz isə əsla razı olmadıq, çünki belə bir borc yoxdur”.

Xatırladaq ki, bu ilin aprelində Bakı-Şamaxı yolunun 50-ci kilometrliyində Abşeron sakini, 1974-cü il təvəllüdlü Bəxtiyar Barat oğlu Məmmədov “Audi Q7" markalı, 90 RA 353 dövlət nömrə nişanlı avtomobildə ”Vinçestr" markalı silahdan atəş açaraq özünü öldürmüşdü. Abşeron Rayon Polis Şöbəsindən isə bildirilmişdi ki, sement biznesi ilə məşğul olan Bəxtiyar Məmmədov külli miqdarda borcu olduğuna görə intihar edib.