Xədicə İsmayıl Rauf Arifoğlunu “yıxıb sürüyüb”. Əcəb eləyib. Son vaxtlar ən əfəl jurnalistlər belə Rauf bəyi divara dirəməkdən ləzzət alırlar. Nə gizlədim, hərdən mənim də əlim gicişir. İstəyirəm ki, bəyin top atəşindən viran qalmış bağına mən də bir daş tolazlayım. Amma elə ki, daşı əlimə alıram... 61 nəfər qələm sahibinin qaranlıqlara qərq ola biləcək gələcəyini düşünəndə... “sınır qol-qanadım yanıma düşür”...
Xədicə xanım hazırda “Azadlıq” radiosunda sülalə rejiminin ifşası istiqamətində ağlasığmaz işlər görür. Və bu istiqamətdə onun əldə etdiyi uğurlar beynəlxalq səviyyədə mükafatlandırılır. Əlbəttə, həmkarımızın bu uğuruna sevinməmək olmaz. Əminəm ki, onun istedadı, şantaj qarşısında dəyanət və ləyaqətlə duruş gətirməsi çoxlarına nümunə olacaq.
Bu məqamı da vurğulamaqda fayda var. Bəli, bu gün “Azadlıq” radiosu İlham Əliyevin əleyhinə (müəllif başqa ifadə işlədib-musavat.com) hazırlanan materiallara geniş yer verir. Və belə materialların dünya çapında tirajlanmasına geniş imkanlar yaradır.
Amma... biz onu da yaxşı bilirik ki, “Azadlıq” radiosunun əfsanəvi rəhbəri (Azərbaycan redaksiyası) Mirzə Xəzər bir vaxtlar məhz Əliyevlər iqtidarının təkidi ilə yayımdan uzaqlaşdırıldı. O da sirr deyil ki, “Azadlıq” radiosu ABŞ-ın maraqlarının müdafiəçisidir. Və məhz həmin maraqlara görə bir zaman gəlib çatdı ki, “Azadlıq” radiosu “Səs” qəzeti səviyyəsində, yəni son dərəcə primitiv formada İlham Əliyevi müdafiə edən materialları efirə buraxmağa başladı. Bu proses bir müddət davam etdi...Yeri gəlmişkən o zamanlar “Yeni Müsavat” ən ağır şərtlər altında rejimin qarşısında qürurla dayanmışdı...
Bütün bunlara baxmayaraq, İlham Əliyev “Azadlıq” radiosuna Azərbaycan məkanında istifadə etmək üçün radio-tezlik vermədi. ABŞ-ın bütün təzyiqlərinə rəğmən bu sevda baş tutmadı. Çünki İlham Əliyev yaxşı bilirdi ki, bu radio, Amerikanın maraqları tələb edəcəyi anda, onun ən qatı düşməninə çevriləcək. Təxminən bu günkü kimi...
Sözümün canı o ki... bu dünyada hər şey maraqlara söykənir. Bu gün “Azadlıq” radiosu İlham Əliyevi hədəfə alıb. Amma sabah ABŞ-ın maraqları tələb etsə, prezident yenidən mələk qismində Azərbaycan dinləyicisinə təqdim olunacaq. Təbii ki, onda Xədicə İsmayılın gözünün yaşına baxmadan “Azadlıq” radiosundan kənara atacaqlar, necə ki, Mirzə Xəzərə qarşı elə tərbiyəsizlik etməkdən çəkinməmişdilər...
Yəni bu gün “Azadlıq” radiosuna lazımdır ki, İlham Əliyev söyülsün. Eyni zamanda bu gün Rauf Arifoğluna lazımdır ki, “Yeni Müsavat” və “Minval.az” saytı ayaqda qalsın, 61 nəfərlik kollektiv dağılmasın...
Böyük Britaniyanın baş naziri olmuş Uinston Çörçil necə demişdi: “İngiltərənin əbədi dostları yoxdur, əbədi maraqları var”. Azərbaycanda da hər kəs bu və ya digər hadisəyə öz maraqları prizmasından baxır.
İdealda isə biz hamımız siyasi proseslərə Azərbaycan xalqının və dövlətinin maraqları müstəvisində qiymət verməliyik. Amma reallıq başqa şeydir...

Musavat.com-dan: Müəllif bu yazını Facebookda paylaşıb. Yazıya Mirzə Xəzərin reaksiyası maraqlıdır: “Sağ ol, Elbəyi! Əhsən!”