Goranboy rayonunda film kimi ailə dramı yaşanır. Rayonun Kəpənəkli kəndində yaşayan bir iş adamı əlil olan keçmiş həyat yoldaşından... aliment tələb edib. Və onun bu tələbi məhkəmə qaydası ilə yerinə yetirilib.

Tərəflərin uşaqlara himayədarlıq üstündə gedən mübahisəsi uşaqların anadan alınaraq ataya verilməsi ilə nəticələnib. Belə ki, Goranboy Rayon Məhkəməsi qadının 40 manat aliment ödəməsinə dair qərar çıxarıb.

Bu barədə virtualaz.org saytına qadın özü - Elnarə Mustafa qızı Həsənova məlumat verib.

Şikayətçi uşaqlarının geri qaytarılması üçün kömək istəyir: “17 yaşında ailə qurmuşam. Lakin ailəmizdə daim söz-söhbət, münaqişə olub. Həyat yoldaşım, yəni indi artıq keçmiş olan ərim üzərimə ağ neft tökərək məni yandırdı. Amma mənə nə arxa-dayaq duran, nə də geri qayıtmağa yolum olmadı. Buna görə də polisdə qəza nəticəsində yandığıma dair izahat yazdım”.

Üzündən və bədəninin müxtəli yerlərindən yanıq xəsarəti alan E.Həsənova uzun illər çadrada gəzib.

“Heydər Əliyev Fondunun dəstəyi ilə əməliyyat olunmuşam. Amma yenə də əvvəlki görkəmimə qayıtmağım mümkün olmadı. Bu hadisənin təsirindən günlərlə koma vəziyyətində qalmışam. Məni həyata bağlayan şey yalnız o iki uşağım olub. Döyülsəm də, təhqir edilsəm də uşaqlarımdan ayrı qalmamaq üçün dözmüşəm” - deyə ana bildirdi.

Şikayətçinin sözlərinə görə, Goranboy Rayon İcra Hakimiyyətinin qəyyumluq şöbəsi uşaqları ananın himayəsinə verib: “Sonra məhkəmə oldu. Uşaqlar məhkəmədə atalarının qorxusundan onunla qalmaq istədiklərini dedilər. Məhkəmə də uşaqları atalarının himayəsinə verdi. Məni inandırdılar ki, istədiyim zaman uşaqlarla danışa, qala bilərəm. Məhkəmədən sonra keçmiş həyat yoldaşım uşaqların mənimlə görüşünü yasaqladı. Bir evin içərisində uşaqlarla danışmadan, onları kənardan izləməklə yaşayıram. Uşaqların mənimlə adi ünsiyyəti atalarının qəzəbinə səbəb olur. Mən öz balalarımı kənardan izləmək məcburiyyətindəyəm”.

Keçmiş həyat yoldaşının fermer olduğunu deyən Elnarə Həsənova onun tərəfindən bir neçə dəfə polisə verildiyini dedi: “Keçmiş həyat yoldaşım onu döydüyümü iddia etdi. Buna görə mənə cərimə də tətbiq edilib. Halbuki onu və məni görən bunun fiziki cəhətdən mümkün olmadığını bilərdilər”.

Qadına qarşı daha bir ittiham onun narkotik qəbul etməsi iddiası olub: “Yoxlamadan keçdim və heç bir vaxt narkotik qəbul etmədiyimi rəsmən təsdiqlədim. Sonra mənə ruhi xəstə damğası vuruldu. Bunun da doğru olmadığını həkim arayışı ilə sübut etdim. Növbəti ittiham AİDS virusuna yoluxmağımla bağlı oldu. Amma bu da təsdiqini tapmadım”.

E.Həsənova keçmiş həyat yoldaşının uşaqlarla kobud rəftar etdiyini iddia edir: “Mən əlaqədar qurumlara müraciət edərək evə gizli kamera quraşdırılmasını xahiş etdim. Beləliklə, uşaqlara qarşı təzyiqlər edildiyini sübut etmək mümkün idi. Məndə onun uşaqlarla necə rəıftar etdiyinə dair sübutlar var. Amma kömək edən, balalarıma qovuşmağıma yardımçı ola yoxdur”.

Şikayətçi qeyd etdi ki, hazırda keçmiş həyat yoldaşı ilə məhkəmə prosesi davam edir.



Qeyd edək ki, qadına “Təmas” Regional İctimai Birliyi yardım edir. Bu barədə virtualaz.org saytına təşkilatın rəhbəri Südabə Məmmədova məlumat verdi: “Bizim sığınacaq bu ilin may ayında Əmək və Əhalinin Sosial Müdafiəsi Nazirliyinin təşəbbüsü ilə yaradılıb. Zorakılığa məruz qalan, o cümlədən insan alveri qurbanlarını sığınacaqda yerləşdiririk. Lakin maliyyə imkanlarımız olmadığından köməksiz qadınlara əlavə yardımlar edə bilmirik. Buna baxmayaraq həmin qadının problemlərinin həllinə kömək etməyə çalışırıq”.

Yazıda səslənən fikirlərlə bağlı qarşı tərəfin də mövqeyini dərc etməyə hazırıq.