Milli Qəhrəman atası Qurban Məmmədov: «Emin Əliyev mənə dedi ki, oğlunun ağlı olsaydı, gedib döyüşüb ölməzdi»

Milli Qəhrəman Səfəralı Məmmədovun atası Qurban Məmmədov ölkə mətbuatı vasitəsi ilə DİN başçısı Ramil Usubova müraciət ünvanlayıb. O müraciətində qeyd edib ki, belə bir addım atmaq məcburiyyəti şəxsinin timsalında bütün şəhid atalarının DYP əməkdaşları tərəfindən təhqir edilməsindən irəli gəlib.

Q.Məmmədov JAM.AZ-a etdiyi müraciətində bildirib ki, noyabrın 24-də saat 12 radələrində onu Xırdalan şəhərinə aparan Fəyyaz və Rusif adlı yaxınlarının idarə etdiyi «Şevrolet Aveo» markalı maşını 10 YP 631 dövlət nömrə nişanlı maşının ekipaj üzvləri saxlayıblar. Serjant Emin Əliyev başında papaq və yaxasında nömrə nişanı olmadığına rəğmən, Milli Qəhrəmanın atasının əyləşdiyi maşina yaxınlaşaraq, onların qırmızı işıqdan keçdiklərini iddia edib. «Emin Əliyevə yaşıl işıq yanıb-söndükdə işıqforu keçdiyimizi desək də, bunu qəbul etmədi. Hətta zəmin işıqforun yanında təhlükəsizlik kameraları var ki, onlar vasitəsi ilə bunu dəqiqləşdirmək olar. Amma bütün bunlara baxmayaraq, DYP işçisi bizə protokol yazacağını söylədi».

Şəhid atası daha sonra bildirir ki, həmin protokolun yazılmaması üçün xahiş etdikdə Emin Əliyev bunu 100 manat müqabilində edə biləcəyini söyləyib və istəyinə də çatıb. «Bizdən 100 manat pul istədi və protokol yazmayacağını bildirdi. Ona Milli Qəhrəman atası olduğumu söylədim və güzəşt etməsini istədim. Mənə verdiyi cavab isə təkcə şəxsimin deyil, bütün şəhid atalarının təhqir olunmasına bərabərdir. Təsəvvür edin ki, DYP işçisinə kimliyi dedikdən sonra birbaşa cavab verdi ki, «Oğlunuzun ağlı olaydı, gediş döyüşüb ölməzdi». Bu cür ədəbsiz, ədalətsiz və tərbiyyəsiz şəkildə məsələyə yanaşan birinin polisə necə işə düzəldiyi hələ də mənim üçün sual olaraq qalır. Və həmin hadisədən sonra hələ də özümə gələ bilmirəm».

Qurban Məmmədov sonda DİN başçısı Ramil Usubova müraciət edərək bildirib ki, Emin Əliyev kimi polislərin davranışları Azərbaycan polisinə başucalığı gətirmir. Milli Qəhrəmanın atası əmindir ki, belə polis işççilərinin hüquq mühafizə orqanlarına təsadüfən düşüblər. « «Cənab nazir, sizcə bir polis əməkdaşının şəhidlərimizə bu cür yanaşması hansı əxlaqa, hansı tərbiyyəyə, hansı iş prinsipinə və vicdana sığır? Mən əminəm ki, belə təsadüfi adamlardan Azərbaycanın şansı polisi təmizlənəcək. Bu ölkə üçün canlarını qoymuş, şəhid olmuş, t orpaqlarımızın azadlığı uğrunda dünyasını dəyişmiş övladlarımıza bu cür saymazyana, ədəbsiz şəkildə yanaşan polisin DİN sistemində qalmayacağına da inanıram. İnanıram ki, Siz bu məsələni araşdırıb, Emin Əliyevi layiqincə cəzalandıracaqsınız».