“Azərbaycan” qəzetinin baş redaktoru, millət vəkili Bəxtiyar Sadıqovun işləkləri haqda yeni faktlar...

Doğrusu bu mövzuya yenidən müraciət etmək istəməzdim. Amma “Azərbaycan” qəzetinin baş redaktoru, millət vəkili Bəxtiyar Sadıqovla bağlı yazım işıq üzü görəndən bəri mənə gələn zənglərin ardı – arası kəsilmir. Kimi mənə yazıma görə, kimisi millət vəkilini xalqa olduğu kimi tanıtdığıma görə təşəkkür edir, kimisi onun YAP-çılara divanından danışır, kimisi də mənimlə görüşüb arxiv materiallarını mənə çatdırır.
Lakin zənglərdən biri məndə böyük maraq oyatdı və son oxuduğum xəbər də məni bu mövzuya yenidən müraciət etməyimə səbəb oldu. Telman adlı şəxs mənə zəng edərək bildirdi ki, “Bəxtiyar Sadıqovu tənqid etmək lazım deyil, onu anlamaq lazımdır. Nədənsə heç kim onu anlamır”. Fikirləşdim ki, yəqin bu səbəbdəndir ki, B.Sadıqovu “anlamayan” 9 nəfər o işə gələn gündən ürək çatışmamazlığı diaqnozu ilə dünyasını dəyişib. Onu “anlamayanlar” işdən uzaqlaşdırılır. Elə Bahar Alimcanova da onu “anlamadığından” toruna düşüb və indi: “Mən Bəxtiyarın günahı ucbatından oğlumu Moskvadan Azərbaycana gətirə bilmirəm” – deyir. Ağdamlılar da Bəxtiyar Sadıqovu “anlamadıqları” üçün: “deputatım hardadır”? – deyə hələ də ümidlə onu axtarır və gözləyirlər. Amma əslində Bəxtiyar Sadıqovun məqalələri, müsahibələri və “Azərbaycan” qəzetinin manşetinə belə çıxardığı yazılarla tanış olduqda onu “anlamaq” heç də çətin deyil.

“Azərbaycan” qəzetinə dövlət yardım etmir

Bu fikirləri oxuduğunuz məqalənin müəllifi yox, Bəxtiyar Sadıqov deyib. Bildirib ki, adı çəkilən qəzet özü – özünü maliyyələşdirir. Bu məqamda deyilən şərə adam söz tapa bilmir. Belə ki, hörmətli Bəxtiyar müəllim unudur ki, 2008-ci ildən dövlət başçısı “Azərbaycan”, “Bakinski raboçiy”, “Xalq” qəzetlərinin maddi bazasını gücləndirmək məqsədilə dövlət büdcəsindən hər il adları çəkilən hər qəzet üçün 250 min manat pul ayırır. Görəsən, Bəxtiyar Sadıqovun belə fikir söyləməsinə səbəb nədir? Əslində, bu fikrə də təəccüblənmək lazım deyil. Belə ki, bizlər onun belə fikirlər söyləməsinə artıq bir növ adət etmişik. Amma qəzetin öz – özünə maliyyələşməsi məsələsi lap gülüş doğurur axı....
Qeyd edək ki, “Azərbaycan” qəzeti hər il dövlət büdcəsindən maliyyələşir. Bundan başqa bu qəzetə abunə məcburidir və bütün dövlət orqanları adıçəkilən qəzetə məcburi qaydada abunəyə cəlb olunur. Həmçinin qəzetin hər sayında ən azı 10-a yaxın başsağlığı verilir ki, bu başsağlıqlarının hərəsi 20 manatdır. Qəzetin “maliyyə suyu” bununla da məhdudlaşmır. Belə ki, bura verilən bir çox məqalələr də pulludur. Şəxsən mən bir xeyriyyəçi insanın Azərbaycanda gördüyü xeyriyyə işləri haqqında yazını dərc olunmaq üçün ora aparanda həmin xeyriyyəçiyə bildirmişdilər ki, bu yazı reklam xarakterlidir və məzənnəsi 1000 dollardır. Hazırda deyilənə görə bu rəqəm 1000 manat olub. Elə Elşad Abdullayev də bildirmişdi ki, 2005-ci il seçkiləri zamanı o, “Azərbaycan” qəzetində reklam olunmaq üçün Bəxtiyar Sadıqova çoxlu pul verib. Onun baş redaktorla bağlı 40 dəqiqəlik video görüntüsü belə var.
Gəlin görək, “Azərbaycan” qəzetinin baş redaktorunun ətrafında kimlər var? Onlar siyasi oriyentasiya baxımından biri müsavatçı, digəri quliyevçi, üçüncüsü cəbhəçidir. Onları isə bir amal birləşdirir: ermənipərəst simpatiyaları ilə müşayiət olunan potoloji anti - əliyevçilik simptomu. Bu potologiyanın nəticəsi idi ki, baş redaktor kürsüsünə əyləşən kimi o, sınanmış və sadiq əliyevçiləri kütləvi şəkildə işdən qovdu.

Ağdamlı deputatın erməni sevgisi

Bunun üçün gəlin arxiv materiallarına müraciət edək. “Azərbaycan” qəzetinin 2 aprel 2001-ci il sayının manşet yazısı: “Qarabağ münaqişəsi Azərbaycanın su ehtiyatlarının ekoloji təhlükəsizliyini dəfələrlə artırıb”. Manşetdəki yazını oxuyanda belə zənn etmək olar ki, bu qəzet Azərbaycanda yox, Ermənistanda nəşr olunub. Fikirləşirəm ki, hər seçki sonrası ağdamlılar Ağdamın suyunu içib, əppəyini yeyib, oradan da deputat seçilən Bəxtiyar Sadıqovu axtarırlar. Bəlkə belə yazılara görə o, seçicilərinin gözünə görünmür? Millət vəkilinin sözündən belə çıxır ki, biz ermənilərə minnətdar olmalıyıq ki, torpaqlarımızı zəbt ediblər, qız – gəlinlərimizi zorlayıblar, bizləri Qarabağsız qoyublar. Əgər ermənilər olmasaydı Azərbaycanın su ehtiyatının ekoloji təhlükəsizliyi təhlükə altında qalardı. İndi mənə deyin görüm Bəxtiyar Sadıqovun bu fikirləri qəzetin manşetində verməsindən sonra onu necə anlamaq olar?
“Azərbaycan” qəzetini 27 noyabr 2002-ci il tarixli sayını nəzərdən keçirin: “ABŞ-ın Milli Demokratiya İnstitutu prezident seçkilərində müxalifəti dəstəkləyəcək və bu məqsədlə 10 milyon dollar vəsait ayırıb”. İfadə tərzi, tərtibi “Yeni Müsavat”ın stilinə tam uyğun gəlir. Görəsən, bu yazını verməklə Bəxtiyar Sadıqov hansı məqsədləri güdürdü?
27 fevral 2003-cü il tarixli “Azərbaycan” qəzetində “Dövlət quruculuğu nədir?” yazısında isə yenə də, Heydər Əliyev əleyhinə fikirlər söylənilmişdir. Bəxtiyar Sadıqovun əməllərini izlədikcə məlum olur ki, o, iqtidaryönlü mətbuatın başında dursa da, müxalifətin gizli havadarıdır. 03 sentyabr “Hürriyyət” və “Yeni Müsavat” qəzetlərində Bəxtiyar Sadıqov H.Əliyevin dünyasını dəyişməsi ilə bağlı yalan məlumat yaymışdır.
Qəribədir, hansı məmur belə bir söz deyərsə, onu vətən xaini edər, elə “Azərbaycan” qəzetinin manşetində belə verərlər. Amma Bəxtiyar Sadıqov hələ də “Azərbaycan” qəzetinin baş redaktoru, millət vəkilidir. Onun bir çox fikirləri internetlə yayılsa, vallah, bu, ermənilər üçün göydəndüşmə olar. Ermənilər gecə tumanlarını başlarına çəkib bütün dünyaya deyərlər ki, bu fikirləri biz yox, elə azərilərin özü deyir, həm də bir millət vəkili, dövlət qəzetinin başçısı.

Bəxtiyar Sadıqovun qohumları

Bizlər Bəxtiyar müəllimin yalnız bir qohumu haqqında məlumat verəcəyik. Əgər onun vəzifəyə qoyduğu qohumlarının tam siyahısını versək, onda görərsiniz ki, bunun üçün qəzetin neçə sayı lazımdır. Bəxtiyar Sadıqov yaxın qohumlarını yaxşı vəzifələrdə oturdura bilib. Bunu biz yox, bizə zəng edənlər deyirlər. Məsələn, onun bacısının əri Gəncə Dövlət Universitetinin tarix kafedrasının müdiridir. Onun Əlikram Hümbətovla sıx əlaqələrinin olduğu, onunla birgə ölkəni tərk etdikləri, sonradan isə Bəxtiyar Sadıqovun sayəsində Vətənə qayıtması söylənilir. Millət vəkilinin bacısı Rəfiqə Sadıqova “Gəncənin səsi” qəzetinin baş redaktorudur. Gəncənin icra başçısı Elmar Vəliyev onu bu vəzifədən uzaqlaşdırmaq istəsə də, mümkün olmayıb. Rəfiqə xanımın oğlu isə hərbi sahədə vəzifədədir.

Son söz əvəzi...
Bəxtiyar Sadıqovun hansı məzhəbə qulluq etməsi hamıya məlumdur. Onun “dövlət bizə yardım etmir” palavrası da gülməlidir. Adını jurnalist qoyub, jurnalistlərə qarşı normal etik davranış göstərməyən, dediyi sözlərin məsuliyyətinə varmayan deputat və baş redaktor. O, özündən yuxarıların tapşırığını yerinə yetirən, aşağıdakıları əzən adi qulluqçudan başqa heç kim deyil.
Çinarə Vüqar