Təhsil nazirliyi, ingilis bayrağı, geydirmə araq, saxta müəllim və...Əlahəzrət Fakt
Qeyd edək ki, bir müddət öncə Təhsil Nazirliyi tərəfindən saxta diplomlarla bağlı aparılan apaşdırmalar zamanı Cəncədə məşhur kombinator Ostap Benderin belə həsəd aparacağı bir fırıldağa rast gəlinmişdi.Yoxlamalar zamanı bu şəhərdə saxta diplomlu müəllimlər aşkarlanmışdı. Sual oluna, həm də haqlı sual oluna bilər ki, biz saxta ərzaq məhsullarının, pal-paltarın, bir sözlə, gündəlik tələbat mallarının saxtasının olduğunu, siqaretin, arağın geydirməsinin satıldığını bilirdik, əcəba, bu saxta, geydirmə müəllim nə olan şeydir?
Səbrinizi basın, izah edim. İmkan verin bir sual da mən verim: Bəs siz hər gün televiziyadan analoqu olmayan inkişaf, analoqu olmayan tikili, analoqu olmayan hadisə, analoqu olmayan tədbir, analoqu olmayan daha nə bilim nə, nə, nə eşidəndə heç fikirləşdinizmi və ya kimsəyə sordunuzmu ki, bəradər, bu “analoqu olmayan” nə deməkdir? Onda o iki kəlməni necə qəbul etmişdinizsə, bunu da eləcə sinirin: bu da həmən o “analoqu olmayan” nəsnələrdən biri, onun oxşarı, bir az da dəqiqləşdirsək, hətta o “analoqu olmayan”ları kölgədə qoyan ANALOQSUZ hadisə. Bəs necə, diplomları saxta olan müəllimlərə harda rast gəlinib? Lap konkret desək, saxta diplomlarla çalışan müəllimlərə dünyanın hansı geridə qalmış ölkəsində rast gəlmək olar? Hələ onu demirik ki, saxta diplomlu müəlliminin olması bir xalq, bir cəmiyyət üçün bədbəxtlikdirsə, o saxta diplomlu “müəllimin” sinifə, auditoriyaya girməsi artıq o xalq üçün faciədir. Bax biz bu gün bədbəxt günlərimizi geridə qoyub bu faciəni yaşayırıq.
Yuxarıda haqqında bəhs etdiyimiz yoxlamalar zamanı Gəncənin 40 saylı tam orta məktəbində bir neçə saxta diplom aşkarlanıb. “Gündəm xəbər” bildirir ki, bu haqda massmedia.az saytında məlumatlar dərc olunub. Həmin məlumatlarda qeyd olunur ki, həmin məktəbdə aşkarlanan saxta diplomlardan biri məktəbin Azərbaycan dili və ədəbiyyatı müəllimi Lalə Müzəffər qızı Həsəncanovaya məxsus olub.
Araşdırma zamanı aşkar olunub ki, Lalə Həsəncanova Azərbaycan
Müəllimlər İnstitunun Gəncə filialının ibtidai sinfin metodikası fakultəsində 2005-ci ildə qiyabi baza təhsili alıb. Daha sonra isə yenidən hazırlanma kursları əyani olduğu halda, o, işdən ayrılmadan çalışdığı tədris ocağına guya həmin kursu keçməsi haqqında diplom təqdim edərək Azərbaycan dili və ədəbiyyatdan dərs deməyə başlayıb.
Ancaq... Azərbaycan Müəllimlər İnstitutunda, eləcə də onun filiallarında yenidən hazırlanma kursları əyani olduğundan və onun orada kurs keçmədiyi təsbit edildiyindən L.Həsəncanovanın diplomu saxta sayılaraq işdən azad edilmişdir.
Biz isə əlavə araşdırma apararkən Gəncə Müəllimlər İnstitutundan öyrəndik ki, Lalə Müzəffər qızı Həsəncanovanın işlədiyi tədris müəssisəsinə yenidən hazırlanma kursu keçdiyi haqqında təqdim etdiyi diplom... Nərmiyə Şəmil qızı Kərimovaya məxsusdur. Belədə isə ortaya Əlahəzrət Fakt çıxır ki, L.Həsəncanovanın iş yerinə təqdim etdiyi Seriya YB N 002959 nişanlı yenidən hazırlanma haqqında kurs diplomunun iki sahibi var. Başqa cür desək, bir diplomun iki adaxlısı var. Hələ bunlar nədir ki?.. Daha maraqlısı odur ki, bu diplomla bağlı 04.02 2013-cü ildə Təhsil Nazirliyinin adından o vaxt Təhsil Nazirliyinin Aparat rəhbəri, indi isə yeni təhsil nazirinin müşaviri olan İlham Pirməmmədov Gəncə Müəllimlər İnstitutunun Kərimova Nərmiyə Şəmil qızının adına verdiyi diplomun Lalə Həsəncanovaya məxsus olduğunu təstiqləyib.(?!) Sual olunur: Yoxlama zamanı sözügedən diplomun saxta olduğunu təsdiqləyən Təhsil Nazirliyi sonradan necə oldu ki, fikrini dəyişdi? Onları buna, necə deyərlər, ingilis bayrağı kimi gah bu, gah da digər tərəfə əsməyə kim və başlıcası da nə vadar etdi? Yeri gəlmişkən qeyd edək ki, bu kimi saxta diplomu olanlar və haqlı olaraq işdən çıxarılanlar geriyə-iş yerinə qaytarılmasalar da, nədənsə adı gedən müəllimə məktəbdəki işinə qayıtmağı bacarıb- nə qədər müəmmalı olsa da, işləmək üçün əlində əsas tutduğu diplom başqasının olmasına baxmayaraq.
Gerçək isə budur ki, bu kimi maxinasiyalara nəfsinə qul olub qol qoyanlar, yəni ki, o diplomu verənlər, o diplomu alanlar, o saxtakarlığın qarşısına durmaq əvəzinə maddi marağı səbəbindən ona hamilik edib rəvac verənlər məsuliyyətə cəlb edilməli halda... gördüyünüz kimi, hoqqabazlıqlarını sürdürməkdədirlər. Nə vaxta kimi? Təzə təhsil nazirinə nə vaxt “təzə” deməyəcəyik, o vaxta qədərmi? Bizə, bütün bunlara rəğmən bircə söz demək qalır: Allah heç səbr verməsin!


Mehriban Əzizqızı