Yazıçılar Birliyinin sədri Anar və baş katib Fikrət Qocanın tikinti şirkətinin rəhbəri ilə görüşündən sonra yazıçıların mənzil problemi həll olunmaq üzrədir.

AYB sədrinin müşaviri və mənzil məsələləri üzrə rəhbər Rauf Aslanovun modern.az-a verdiyi məlumata əsasən, artıq yazıçılar özlərinə məxsus mənzilləri satmaqda heç bir maneəyə rast gəlmir. Yazıçılar müştəri tapılandan sonra mənzilləri rahatlıqla sata bilərlər: “Anar müəllim və Fikrət Qoca tikinti şirkətinin rəhbərliyi ilə görüşəndən sonra mənzil komissiyasının sədri kimi növbədə olanlar mənə yaxınlaşıb söhbət etdilər. Biz həm onları, həm də mətbuatı məlumatlandırdıq ki, bu günə qədər mənzillərin satışına nə mane olubsa, hamısı aradan qalxacaq. Yazıçılar artıq öz alıcıları ilə rahat işləyə bilərlər. Əvvəl bizim yazıçılar ora alıcı apara bilmirdilər. Maneələrlə rastlaşırdılar. Bunlar da ziyalı adamdılar, ora gedib pərt olub qayıdırdılar. Nəticədə yazıçılar bu işdən çox soyumuşdular. Çünki hamımız bilirik ki, alıcı tapmaq çox çətindir. Amma bu söhbətdən sonra biz bildirdik ki, artıq heç bir maneə olmayacaq. Onlar alıcıları tapırlar, sərbəst bir şəkildə razılığa gəlirlər. Sonuncu etapda da bizə yaxınlaşırlar. Biz də MTK nümayəndəsini çağırırıq, müqaviləni alıcının adına keçiririk. Allahdan arzu edirik ki, ilk növbədə alıcı tapılsın və ondan sonrakı proseslərdə heç bir maneə olmasın. Ən azı heç olmasa bir-bir satılsın ki, bizim yazıçılar da bu problemini həll etsinlər”.

Qeyd edək ki, “Abidə” MTK-ın Bakıda inşa etdiyi binada prezidentin sərəncamına əsasən 9 mənzil Yazıçılar Birliyinə bağışlanıb. Ümumi razılaşmadan sonra hər mənzil 4 yazar arasında bölüşdürülərək (36 yazar) satılmalı və əldə olunan gəlir bərabər bölüşdürülməli idi. Məlumat üçün deyək ki, artıq həmin 36 yazardan 4-ü dünyasını dəyişib.