Əhali Vaqif Abdullayevin daha işgüzar birisilə əvəzlənməsini tələb edir

Rayon sakinləri problemlərinin həlli məqsədilə dəfələrlə Beyləqan Rayon İcra Hakimiyyətinə müraciət etsələr də, icra başçısı Vaqif İdris oğlu Abdullayevin qəbuluna düşə bilmirlər.
Bu barədə məlumat verən sakinlərin bildirdiyinə görə, onlar nə qədər çalışsalar da, icra başçısını yerində tapa bilmirlər. Ona görə də, çıxılmaz vəziyyətdə qalıblar. Şikayətçilərin sözlərinə görə, icra başçısı əhalinin problemlərilə maraqlanmaq əvəzinə əlində olan səlahiyyətlərdən istifadə edərək məhz öz şəxsi maraqlarını təmin edir: «Beyləqanda işsizlik problemi olduqca ciddidir. Cavanlar işsizlikdən bütün gününü çayxanada keçirir. İş dalınca rayondan çıxmağa da imkan yoxdur. İnsanların böyük əksəriyyəti yoxsulluqdan əziyyət çəkir. İcra başçısı Vaqif Abdullayev və onun tabeçiliyində çalışan şəxslər isə tamam başqa işlərlə məşğudurlar. Yay aylarında mövsümi işlər olsa da, ilin digər fəsillərində, əsasən də qış aylarında əhali cüzi maaşa işləməli olurlar. Rayon camaatı evinə çörək pulu aparmaq üçün olmazın çətinliklərə sinə gəlmək məcburiyyətindədir. İnsanlar olduqca gərgin və narahatdırlar».
Əldə etdiyimiz məlumatlara görə, artıq Beyləqan Rayon İcra Hakimiyyətinin başçısı Vaqif Abdullayevin «vurulması» ilə bağlı yuxarı dairələrdə ciddi müzakirələr aparılır. Bu barədə redaksiyamızı bilgiləndirən məlumatlı şəxs iddia edir ki, icra başçısı Beyləqan rayon camaatı ilə normal rəftar edə, sakinlərin problemlərini yoluna qoya və ən əsası da ölkə başçısının müvafiq tapşırıqlarını lazımi səviyyədə icra edə bilmir.
İcra başçısının yarıtmaz fəaliyyəti artıq Beyləqan camaatını bir sıra ciddi addımlara baş vurmağa sövq edir: «Əhali icra başçısı Vaqif Abdullayevin daha perspektivli və daha işgüzar birisilə əvəzlənməsini, rayonun problemlərinin tez bir zamanda həll olunmasını, eləcə də işsizlik probleminin aradan qaldırılmasını tələb edirlər». Vaqif Abdullayevin adamlarının əhaliyə, əsasən də sahibkarlara göz verib işıq vermədiyini deyən məlumatlı şəxs hesab edir ki, bu vəziyyət çox davam edə bilməz: «Camaatın səbri tükənmək üzrədir. Odur ki, aidiyyəti qurumlar tez bir zamanda məsələyə müdaxilə etməli, yaranmış problemin həlli istiqamətində ciddi işlər görməlidirlər. Əks halda, Beyləqan rayonunda xoşagəlməz hallar yaşana bilər. Bir sözlə, hazırda rayonda özbaşınalıqlar hökm sürür. Bunun yeganə çıxış yolu isə Vaqif Abdullayevin istefasıdır».
Məsələ ilə bağlı qarşı tərəfin də mövqeyini işıqlandırmağa hazırıq.

Cavid Mehdisoy