Gəncə Dövlət Universitetində ağlasığmaz olay; Yadigar Əliyevə məcburən istefa ərizəsi yazdırıldığı iddia olunur
Redaksiyamıza Gəncə Dövlət Universitetindən məktub daxil olub. Məktubda iddia olunur ki, prorektor Yusif Yusifov təhsil müəssisəsinin möhürünü əlinə keçirib və onu rektora təhvil vermir. Məktubda yazılıb: “İllərdir bu elm ocağında təhsil alan tələbələrin arzusunda olduğu şəffaflıq, rüşvətsiz, korrupsiyasız təhsil sistemi yaranan bir vaxtda müəyyən qruplaşma hərəkətə keçib.

Rektor Yadigar Əliyev təhsil ocağında illərdir hökm sürən problemlərin həllinə çalışdığı və buna müəyyən qədər də nail olduğu, zamanın tələbi olan mütərəqqi metodları tətbiq etməyə, islahatlara başladığı bir vaxtda maddi maraqlarını, mənfəətlərini güdən qruplaşma bu prosesi süngü ilə qarşılayır, yumşaq desək, Ostap Benderlik edir. Çox təəssüflər olsun ki, onlar nəticə də əldə ediblər; ”ölçülü-biçili" addımlarla ləkələmə kampaniyasının ilk mərhələsini uğurla başa vurublar..."



Məktubda iddia edilir ki, GDU-da şəffaf təhsil sisteminin qurulmasına mane olan, universitetdə qalmaqal yaranmasına stimul və dəstək verən qrupun məqsədi bu təhsil ocağını ələ keçirmək, ora öz adamlarını rektor təyin etdirmək və “bazar”ın bərpasına nail olmaqdır: “Y.Yusifov Maliyyə Nazirliyinin tabeliyindəki Dövlət Maliyyə Nəzarəti Xidmətinin rəisi olan Cavanşir Yusifovun qardaşıdır. C.Yusifov maliyyə nazirinin müavini Azər Bayramovla dostdurlar. Azər Bayramovun qardaşı Ceyhun Bayramov isə təhsil nazirinin 1-ci müavinidir...”

Məktub-müraciətdə qeyd edilir ki, Y.Yusifov prorektorluğa da qardaşının vasitəsilə yüksəlibmiş: “GDU-nun sabiq rektoru Elman Məmmədovun zamanında universitetdə Maliyyə Nazirliyinin növbəti yoxlaması zamanı külli miqdarda - dörd milyon manatdan çox yeyinti aşkarlanıb. Bu yoxlamanı aparan idarənin rəisi Cavanşir Yusifov rektor qarşısında şərt qoyub: ya qardaşım Yusif Yusifovu prorektor təyin edirsən, bu yeyinti məsələsini öz aramızda həll edirik, ya da materiallar hüquq-mühafizə orqanlarına ötürülür, həbs olunursan. Sabiq rektor şərtin birinci hissəsini fikirləşmədən qəbul edib. Dövlətə dəyən külli miqdarda ziyan ört-basdır olunub, Yusif Yusifov prorektor vəzifəsinə təyin edilib. Yadigar Əliyev bu ilin fevralında rektor təyin olunandan sonra isə Y.Yusifov universitetdə oxuyan tələbələri ”illiyə", “aylığa” buraxmaq, imtahanlar zamanı “haqq” qoymaq kimi əməllərini həyata keçirə bilməyib. Bu, bir sıra dekan və kafedra müdirlərini də qəzəbləndirib. Və avtomatik olaraq Yadigar Əliyevə qarşı kampaniya başlayıb...
Y.Əliyev iki ay öncə məzuniyyətə gedəndən sonra onun səlahiyyətlərini icra edən prorektor Yusif Yusifov universitetdə toplantı çağıraraq bəyan edib ki, rektor birdəfəlik gedib, o, bir daha geri qayıtmayacaq. Eyni zamanda Y.Əliyevin barəsində kompromatlar toplayaraq Təhsil Nazirliyinə yollayıb. Başqa adamların nazirliyə göndərdiyi məktub ünvanına bir neçə günə çatırsa, Yusif Yusifovun yazdıqları həmən çatır. Y.Əliyev məzuniyyətdə olduğu dövrdə yuxarıda sxemi göstərilən “kruq” qəribə bir plan qurub: Məzuniyyət bitəndən sonra işə qayıdan rektoru universitetə buraxmamaq. Hazırda fakt bundan ibarətdir ki, məlum qrup Yadigar Əliyevə universitetdə öz vəzifəsini icra etməyə imkan vermir, prorektor möhürü ona qaytarmır, bütün sənədləri qeyri-qanuni olaraq özü imzalayır. O, iddia edir ki, möhürü Yadigar Əliyevə verməməyi ona nazirlikdən tapşırıblar. Fakt bundan ibarətdir ki, Yadigar müəllim rüşvətə qarşı mübarizə aparırdı, prorektor Yusif Yusifov isə arxasındakı adamlara arxayın olaraq Yadigar Əliyevlə mübarizə aparır. Və artıq rektorluq arzusuna çatdığını da gizlətmir. Əminliklə söyləyir ki, Yadigar Əliyevi ləkələyib istefaya göndərə biləcəklər, dərhal da o özü rektor təyin ediləcək".

Məktubda o da yazılır ki, GDU-nun 8 fakültəsi var, burada 5000 nəfərdən çox tələbə təhsil alır: “Bunların da müəyyən qədəri əvvəlki rektorun vaxtında Yusif Yusifovun qurduğu mexanizm və idarəçilik ilə ”illiyə", “aylığa” buraxılıb, dərslərə gəlmirlər. Dərsə gəlməyənlər hər semestr vaxtı 2500-3000 manat verirlər. Prorektor Yusif Yusifov, kimya-biologiya fakültəsinin dekanı İsfəndiyar Alverdiyev, fizika və texniki fənlər fakültəsinin dekanı İldırım Qasımov (bu şəxs əvvəllər televizor ustası olub, indi isə “Samsung” firmasının Gəncədəki mağazasında çalışmaqla yanaşı, dekanlıq edir) bu prosesdə əlbirdirlər. Yadigar Əliyevə qarşı kampaniyanı da əsasən bu qruplaşma həyata keçirir..."

“Yeni Müsavat”a verilən məlumatda o da bildirilir ki, Yadigar Əliyev faktiki olaraq cinayət xarakterli əməllə üzləşib, universitetin möhürünü prorektor ələ keçirib və ona qaytarmır: “Yadigar Əliyev yaranmış situasiyanı görərək, məcburiyyət qarşısında qalaraq istefa ərizəsi də yazıb. Hansı ki, onu bu vəzifəyə prezident təyin edib, ancaq müəyyən bir qruplaşma rektora bu vəzifədə işləməyə imkan vermir”.

Məktubda qəzet vasitəsi ilə yaranmış durumun prezidentin diqqətinə çatdırılması xahiş olunub.

Müraciət redaksiyamıza bazar günü daxil olduğundan məsələyə dair Təhsil Nazirliyindən mövqe almaq mümkün olmadı.

Yazıda adları keçən hər bir kəsi və qurumu dinləməyə, onların da mövqeyini dərc etməyə hazırıq.