Bu gün Media Hüququ İnstitutunun təşəbbüsü ilə “Park İnn” otelində “dəyirmi masa” keçirilib.
Tədbirdə media və internet azadlığI ilə bağlı qanunvericilik, qanunvericiliyin tətbiqində problemlər, internetdə məzmuna görə təqiblər, xüsusi xidmət orqanları vasitəsilə internet yazışmalarının izlənməsi, Azərbaycan qanunvericiliyinin beynəlxalq sənədlərə uyğunluğu, diffamasiyayanın dekriminallaşdırılmaması diqqət mərkəzində olub. Media Hüququ İnstitutunun direktoru Rəşid Hacılı sensasion bəyanatla çıxış edib. O bildirib ki, xüsusi xidmət orqanlarının vətəndaşların telefon və internetdə şəxsi yazışmalarını izləməsinə hər hansı nəzarət mexanizmi yoxdur və bu orqanlar nə qədər yazışmanı və ya danışığı izləməsi ilə bağlı hesabat vermirlər. İzləmələr isə, onun sözlərinə görə, bir çox hallarda blogerlərə, tənqidçilərə və fəallara qarşı yönəldilir. “Ölkədə hər bir xidmət operatoru xüsusi xidmət orqanları üçün ayrıca otaq ayırmalı, izləmə aparatı yerləşdirməli və trafiki həmin aparata qoşmalıdır”, - o vurğulayıb.

Digər ekspertlər də bildiriblər ki, son zamanlar saytlarda bloklama, sürətin azaldılması halları çoxalıb. Onlar, həmçinin hesab edirlər ki, internet və telefonların izlənməsi ilə bağlı bir nəzarət mexanizminin yaradılması çox vacibdir. : “İzlənmə qanunvericilik və beynəlxalq normalara ziddir. Doğrudur, terrorizmə qarşı mübarizə məsələləri də nəzərə alınmalıdır. Amma bütün hallarda izlənmə məhkəmənin qərarı ilə baş verə bilər. Məmurlar bilməlidirlər ki, onların yazışmaları da yazılıb saxlanılır. Qayda-qanun, nəzarət mexanizmi olmadığından nə vaxtsa hansısa fləş kartda saxlanan şəxsi yazışmalar və ya kiminsə şəxsi həyatı ilə bağlı məlumatlar şəxsi münasibətlər zəminində və ya başqa fonda ictimailəşdirilə bilər. Bunun üçün məsuliyyət də yoxdur”.