Yerli məmurlar rayon camaatına qan uddurur

gundemxeber.az Hər kəsə məlumdur ki, Azərbaycan hakimiyyətinin yeritdiyi siyasətin nəticəsi olaraq bu gün bölgələrdə sosial iqtisadi vəziyyət böhran həddinə çatıb. Neftçalanın da əsas problemləri mövcud hakimiyyətin həyata keçirdiyi yarıtmaz siyasətin nəticələri ilə bağlıdır. Burada da əhali yerli məmurların özbaşınalıqlarından, hüquq-mühafizə orqanlarının qeri-qanuni hərəkətlərindən, işsizlikdən, sosial ədalətsizlikdən, və indiki rejimə xas digər problemlərdən əziyyət çəkir. Buraya dövlət idarələrindəki bürokratiya, vətəndaşlara qarşı süründürməçilik hallarının olmasını da əlavə etsək rayondakı real vəziyyət haqqınada düzgün təsəvvür əldə etmək olar.

Nə sahibkar var, nə də sahibkara kömək edən

Apardığımız araşdırmadan sonra məlum oldu ki, rayonda cəmi bir neçə nəfər sahibkarlıq fəaliyyəti ilə məşğul olur ki, onlar da rayon rəhbərliyinə yaxın olan şəxslərdir. Bunun səbəbləri isə rayonda sahibkarlığın inkişafına yardım edəcək heç bir təşkilatın mövcud olmamasıdır. Burada nə sahibkarlığa yardım fondu, nə də kredit verəcək təşkilatların filialları fəaliyyət göstərir. Yalnız "Kapital Bank"la "Xalq Bank"ın cəmi iki filialı fəaliyyət göstərir. Həmin bankların filiallarında da əhaliyə kredit buraxılmır. Kredit almaq istəyən sakinlər isə qonşu Salyan rayonunda yerləşən müvafiq banklara müraciət edirlər ki, bu da müsbət nəticələnmir.

Xol kəndinin dərdləri

Neftçalanın Xol kəndlərinə 6 kənd-Xəzər, Xolqarabucaq, Xolqaraqaşlı, Qırmızıkənd, Dördlər, Qaçaqkənd, Qazaxbərəsi kəndləri daxildir. Rayon mərkəzindən 50 kilometr uzaqda yerləşən bu kəndlərdə 10 minə qədər əhali yaşayır. Son dövrlər işsizliklə bağlı kənd əhalisinin bir hissəsi Rusiyaya və Bakıya üz tutub. Əhalinin əsas məşğuliyəti əkinçilik və heyvandarlıqdır. Əkinçilikdə əsas yeri pambıq və taxıl tutur. 1996-cı ildə həyata keçirilmiş torpaq islahatının kənddə düzgün aparılmaması sakinlər arasında münaqişəli vəziyyət yaradıb. Belə ki, kənd sakinlərinin bir hissəsinin dövlət aktlarında nəzərdə tutulmuş torpaq mülkiyyətlərini başqaları əkir. Onların pay torpağı isə 2000-ci ildə bələdiyyə sədri, sonradan Sabirabad Rayon İcra Hakimiyyətinin başçısı, 2004-2012-ci illərdə isə İmişli Rayon İcra Hakimiyyətinin başçısı olmuş əslən Neftçaladan olan Əbülfəz Ağayev tərəfindən mənimsənilib.
Neftçalanın Aşağı Qaramanlı kəndində də analoji vəziyyət hökm sürür. Burda bələdiyyə sədri Mirbəşir Ağayev kənddə torpaq mülkiyyətçiləri arasında qarşılıqlı anlaşmanın olmasına əngəl yaradır. Bizimlə söhbət edən kənd sakinlərindən biri bildirdi ki, bələdiyyə sədri icra başçısının aqrar məsələlər üzrə müavini Salman Həziyevlə birləşərək torpaq islahatında yol verilmiş nöqsanların aradan qaldırılmasına mane olurlar.
Digər kənd sakinləri də problemlə bağlı 427 torpaq mülkiyyətçisinin müxtəlif dövlət orqanlarına o cümlədən rayon məhkəməsinə şikayət etdiklərini bildirdilər. Sonra kəndin digər problemlərindən danışan sakinlər əsas çətinliyin su qıtlığı ilə bağlı olduğunu söylədilər.

Bizə bir içim su verin!

"Kəndə su verən kanalın keçdiyi ərazilərdə qeyri-qanuni olaraq suni göllər yaradılıb. Balıq saxlanılması nəzərdə tutulan bu göllərin umumi sahəsi 500 hektara yaxındır ki, bu da kənddə su probleminin yaranmasına səbəb olub. Bundan əlavə kanala nəzərdə tutulmuş limitdən az miqdarda suyun vurulması, elektrik enerjisində yaranan fasilələr su çatışmazlığının yaranmasına səbəb olur. Təsərrüfatlarımız 4 dəfə suvarılmalı olduğu halda cəmi 2 dəfə suvara bilirik. Bu da məhsuldarlığın dəfələrlə aşağı düşməsinə səbəb olur. Tələb edirik ki, suvarma idarələri qanuni fəaliyyət göstərsin və kəndi su ilə təmin edən kanal yenidən qurulsun. Yoxsa bütün təsərrüfatımız məhv olma təhlükəsi qarşısındadır". Sakinlərdən biri isə bildirdi ki, bələdiyyə sədri heç bir dövlət vergisi ödəmədən hər il 200 hektar torpaq sahəsini əkib becərir.

Yuxarı Qaramanlı kəndininin "qoçusu"

Rayonunun Yuxarı Qaramanlı kəndində də sakinlər yerli məmurların yaratdığı problemlərdən əziyyət çəkir. Bizimlə söhbət edən kənd sakinləri kənddə torpaq islahatının düzgün aparılmadığını bildirdilər: "1998-ci ildə islahat başa çatıb. Kəndin yararlı torpaqları bir qrup şəxs tərəfindən mənimsənilib. Digər mülkiyyətçilərə verilmiş torpaqlar isə tam yararsızdır, orada heç nə əkmək mümkün deyil. Buna görə də kənd sakinlərindən bir qrupu dövlət aktlarını almaqdan imtina edib". Daha sonra icra başçısının birinci müavini Dilavər Əliyevin yol verdiyi özbaşınalıqlardan danışan sakinlər bildirdilər ki, o kəndin umumi istifadəsində olan bütün örüş sahələrini mənimsəyib. "Bununla bağlı 45 kənd sakini yerli məhkəməyə müraciət edib. Rayon məhkəməsi də örüş sahələrinin kəndin umumi istifadəsinə qaytarılması ilə bağlı qətnamə çıxarıb. Amma hələ də qətnamə icra olunmayıb. Buna görə də kəndin 1000 başa yaxın mal-qarası həyətlərdə qalıb.
Anoloji problemlə bağlı Qaralı kənd sakinləri də 137 nəfərin imzası ilə müxtəlif dövlət orqanlarına müraciət ediblər. Bununla yanaşı icra başçısının birinci müavini Dilavər Əliyev kəndə məxsus transformatoru zəbt etdiyi örüş sahəsinə aparıb". Daha sonra D.Əliyev Pirəppə kəndindən Qaralı kəndinə qədər içməli su xəttini ekskvatorla qazdırıb çıxarıb. Təxminən 2000 metr su turbasını 15 min manatdan satdırıb. Həmsöhbətimiz bildirdi ki, müavin icra başçısı İsmayıl Vəliyevin mal-qarasını saxlayır və onunla şəxsi münasibətlərindən istifadə edib istədiyi qanunsuzluğu edir.

Arif Rəhimzadədən sakinlərə orjinal cavab

Baş çəkdiyimiz Həsənabad qəsəbəsi də eyni problemlərlə üzbəüzdür. Qəsəbədə yaşayan 7000-ə qədər əhalinin əsas problemləri işsizlik, su, və enerji çatışmazlığı ilə bağlıdır. Sakinlərin bir hisəsi pul qazanmaq üçün MDB ölkələrinə və paytaxta üz tutub. Bizimlə söhbət edən qəsəbə sakinləri bildirdilər ki, içməli su ən böyük problemdir. "Sovet dövründə işləyən və qəsəbəyə su verən motorlardan ancaq birinin işlək vəziyyətdə olması problemin başlıca səbəbidir. Qəsəbə əhalisi evlərinə suyu maşınlarda gətirir və daim onun ehtiyacını çəkir. Sutka ərzində fasilələrlə verilən elektrik enerjisinə görə isə ev başı 20 manatdan pul yığılır. Pul yığılmasını asanlaşdırmaq üçün isə hər ay pensiyalardan həmin məbləğ tutulur. Bu da sakinlərin haqlı narazılığına səbəb olur". Qəsəbə sakinləri yaranmış problemlərlə bağlı Neftçaladan millət vəkili seçilmiş Milli Məclisin regional məsələlər komitəsinin sədri Arif Rəhimzadəyə müracət ediblər. A.Rəhimzadənin kənd sakinlərinə cavabı isə çox orjinal olub. O, "Həsənabad camaatı seçkidə mənə səs verməyib ona görə onların problemləri məni maraqlandırmır" deyib.

Fuad Həsənli