Aslan İsmayılov: “Azərbaycanda əmlakı zorla əldən almaq tendensiyasınım əsasını bu adam qoyub”

Qarabağ qazisi Zaur Həsənovun özünü Azərbaycan Həmkarlar İttifaqları Konfederasiyası (AHİK) önündə yandırması hazırda günün əsas xəbəri və mövzusudur.

Hazırda 5 saylı xəstəxanada ağır vəziyyətdə olan müharibə əlili AHİK sədri, deputat Sətdar Mehbalıyevdən şikayətçi olduğu üçün canına qəsd edib. S.Mehbalıyev isə Qarabağ qazsini şərçi və şantajçı adlandırıb.

Maraqlıdır ki, adə vətəndaşla onun əmlakını qəsb etmək məqsədilə münaqişəyə girməsi ilk dəfə deyil. Bir neçə il əvvəl tanınmış vəkil Aslan İsmayılovun da deputatla belə münaqişəsi olub. Bunu virtualaz.org saytına açıqlamasında A.İsmayılov özü dedi.

Vəkilin sözlərinə görə, AHİK hazırda Səttar Mehbalıyev tərəfindən ata mülkü kimi idarə edilir: “Səttar Mehbalıyev telekanallara müsahibəsində deyib ki, bu məsələ onluq deyil. Bu, tamamilə yalandır. Səttar Mehbalıyellə təxminən iki ilə kimi vuruşan biri kimi deyirəm ki, məsələ yalnız onun öz şəxsi marağı ilə bağlıdır. Səttar Mehbalıyev mənimlə bağlı bütün məhkəmələri Ali Məhkəmənin sədri Ramiz Rzayevin köməkliyi ilə uddu. Bibiheybətdə ev tikirdim, onu dörd tərəfdən mühasirəyə aldı. Onu ifşa edən, qanunsuzluqları sübut edən materialların mətbuat vasitəsilə yaydığıma görə məni sakitləşdirmək üçün hasarı sökdü, istədiyimdən də artıq həyət verdi. Bu gün mənimlə Səttar Mehbalıyevin problemi mənim xeyrimə həll olunub. Ondan nə xahiş, nə də minnət etmişəm. Məndən aldığı həyətyanı sahəmi artıqlaması ilə qaytarıb. Bu gün istəyir getsin o hasarı da, evi də söksün. Bunu məni susdurmaq üçün etmişdi, ancaq Zaurun məsələsindən sonra tüpürürəm o evə də, həyətyanı sahəyə də”.



A.İsmayılov Zaur Həsənovu yaxından tanıdığını və onun tam haqlı olduğunu da qeyd etdi: “Bu torpaq sahəsi onun idi, həmin sahənin nə Səttar Mehbalıyevə, nə də konfederasiyaya heç bir aidiyyəti yoxdur. Məhkəmə qərarları arxasında gizlənən Səttar Mehbalıyev həmin qərarları qanunsuz yolla alıb. Onunla problemim olan dövrdə, məhkəmə çəkişmələri zamanı Apelyasiya Məhkəməsi mənim xeyrimə qərar qəbul etdi. Ancaq Ali Məhkəmənin sədri Ramiz Rzayev Səttar Mehbalıyevin təkidi ilə Apelyasiya Məhkəməsindən mənə rədd cavabının verilməsini tələb edirdi. Ancaq Apelyasiya Məhkəməsi qanuni qərar çıxardı. Səttar Mehbalıyevlə ortaq olan Ramiz Rzayev həmin qərarı ləğv etdirdi. Qarabağ əlilinin isə öz malını əlindən aldılar, özünü də atdılar bayıra. O gəldi, ona heç bir təmənna olmadan, bir Qarabağ əlili kimi bir neçə dəfə cürbəcür ünvanlara ərizə yazdım. Sonra Səttar onu çağırdı yanına və yazdırdı ki, şikayəti özü yox, Aslan İsmayılov və onun kimiləri ona yazdırıb. Mən də bunu bildim, amma Zaurdan heç bir incikliyim olmadı. Çünki bilirdim ki, bunu ondan zorla alıblar. İndi Səttar Mehbalıyev həmin ərizəni ortalığa çıxarıb. Ərizəni alandan sonra Zaura bir ay işləməyə icazə verdi, sonra da yenə əmlakını əlindən aldı”.

A.İsmayılovun sözlərinə görə, vətəndaşların haqqını yeməkdə Səttar Mehbalıyevin şərikləri onun Prezident Administrasiyasının şöbə müdiri olan qudası Əli Həsənov və dostu olan Ali Məhkəmənin sədri Ramiz Rzayevdir: “Bu işlərdə Hacıbala Abutalıbov da onlara kömək edir. Bibiheybət camaatı illərdir orada abadlıq işləri aparıb. Bataqlıq olan ərazini çirkabdan təmizləyiblər. Hər biri o torpaqları alıb, ailələrini dolandırmaq üçün obyekt açıblar. Obyektlər işə başlayan kimi Səttar Mehbalıyev gəlib hamısını əllərindən alıb. Orda bircə nəfər var. Onun da yanında dayısı oğlunu oturdub 50 faizlə işlədir. Qalanların nəyi var hamısını əllərindən alıb”.

Vəkil Azərbaycanda əmlakı zorla əldən almaq tendensiyasının əsasını ilk dəfə Səttar Mehbalıyevin qoyduğunu deyir. Bildirir ki. ilk belə hal 2000-ci illərin əvvəlində baş verib: “2000-ci ilin əvvəllərində yaxşı tanıdığım “Xəyal” holdinqin sahibi, maştağalı, rəhmətlik Fikrət Rəcəbov var idi, sonra özünü öldürdü. Fikrət Rəcəbovun Zuğulba tərəfdə “Xəyal” restoranı var idi, Bakının bir nömrəli restoranı idi. Səttar Mehbalıyev həmin yeri zorla Fikrətin əlindən aldı. Bunu özünə qəsd etməzdən əvvəl mənə Fikrət demişdi. Qəsd etməyinin də səbəbi məhz belə hallar oldu. Onun əlindən əmlaklarını aldılar. Artıq borca düşəndə canına qəsd etdi. Yəni bu, birinci qəsd deyil. Mənim bildiyim qədər, Səttar Mehbalıyevin qəsdə apardığı ikinci adamdır. Əgər prezident bu halların qarşısını almaq istəyirsə, Səttar Mehbalıyevi, Əli Həsənovu, Ramiz Rzayevi dərhal vəzifələrindən azad etməlidir. Biz millət olaraq bunu tələb etməliyik. Əgər bunu tələb etməsək, deməli, yaşamaq haqqımız yoxdur. Çünki həmin o Zaur Həsənov və onun kimilər bizim vətənimizi, namusumuzu qoruyublar. Onlara da münasibət bizim namusumuza, qeyrətimizə, vətənimizə olan münasibətdir”.



A.İsmayılov məcburən yazdığı ərizəyə görə onunla üz-üzə gəlməkdən çəkinən Z.Həsənova baş çəkmək üçün xəstəxanaya getdiyini də bildirdi: “Ərizəni ona məcbur yazdırmışdılar. Ona görə də mənimlə üz-üzə gələndə utandığından qırağa çəkilirdi ki, məni görməsin. Amma mən ondan inciməmişdim. Çünki bilirdim ki, müharibə əlilidir. Beş uşağı var. Borca ailəsinə çörək alan adam idi. İndi bizim vətən uğrunda döyüşənlərin balaları borca çörək yeyir. Amma vətən uğrunda döyüşənlərin əmlakını əlindən alan Səttar Mehbalıyevin oğlu ədliyyə naziri Fikrət Məmmədovun oğlunun çənəsini sındırır, həmin gün Fikrət Məmmədovun müdaxiləsindən sonra dərhal həbs olunur, o biri gün həbsdən azad olunur və işdən çıxarılır. Sonra bölmə rəisi təyin olunur, bu gün isə Pirallahıda polis idarəsinin rəisidir. Bizim hakimiyyətin Azərbaycan xalqına, Qarabağ veteranına münasibəti budur”.