"Elə bilirdi məni satın alacaq, susacam..."

Azərbaycan Həmkarlar İttifaqı Konfederasiyası (AHİK) sədri Səttar Mehbalıyev II qrup Qarabağ əlili Zaur Həsənovla bağlı məsələdən danışarkən tanınmış vəkil Aslan İsmayılovun ünvanına ittihamlar səsləndirib.
O, APA-ya açıqlamasında deyib ki, Z.Həsənovun belə radikal addım atmağa A.İsmayılov sövq edib: “Aslan İsmayılovun özü də həmin ərazidə müəyyən sahəni zəbt edib. Bununla bağlı da hazırda məhkəmə prosesi gedir. Biz məhkəmənin qərarını gözləyirik. Aslan İsmayılov elə dünən də mənim yanıma gələrək, özünün məsələsi ilə bağlı Bakı Şəhər İcra Hakimiyyətinin başçısı Hacıbala Abutalıbovdan xahiş etməyimi istədi. Mən də ona dedim ki, belə işlərlə məşğul olmuram, bu məsələlər mənim səlahiyyətimə aid deyil. O da mənə dedi ki, məsələni onun xeyrinə həll etməsəm, gedib qəzetlərə mənim əleyhimə müsahibə verəcək. Bu gün baxıram ki, doğrudan da mənim əleyhimə müsahibə verib. Bu adamlar şəxsi məqsədləri üçün çalışırlar. Elə Zaur Həsənovu da radikallaşdıran məhz Aslan İsmayılov olub. Dünən də gəlib məni şantaj etmək istədi, lakin alınmadı”.
Aslan İsmayılov Səttar Mehbalıyevin dediklərinə münasibət bildirib. Tanınmış vəkil “Azadlıq”a açıqlamasında bunun yalan olduğunu söyləyib: “Bu cür yalanı danışmağı bacarmaq lazımdır. Az qala məni Zaur Həsənovun özünə qəsd etməsində günahlandırsın. Səttar Mehbalıyev bu dəqiqə təşviş içərisindədir. Bilmirəm, bu işdən özünü necə qurtarsın. Ola bilsin Ramiz Rzayevin, Əli Həsənovun məsləhəti ilə məsələni mənim üstümə yönləndirmək istəyir. Guya Zaur Həsənovu mən radikallaşdırmışam. Hamı bilir ki, hüquqi yardım almaq üçün yanıma yüzlərlə Qarabağ əlili gəlib. Zaurun yanıma gəlməsi mənim Səttar Mehbalıyevlə bağlı verdiyim müsahibədən sonra olub. Yəni, Səttar Mehbalıyevlə aramızda konfilikt vardı. Zaurun sənədləriylə tanış olandan, işin mahiyyətini biləndən sonra işçimə tapşırmışam, o da bu işlə bağlı Zaurun məhkəməsində olub. Zauru ikinci dəfə həmin o obyektinin yanında görmüşəm. O mənə heç salam da vermədi. Təmənna güdmədən ona yardım etmişəm, o isə mənə salam belə vermir. Sonradan öyrəndim ki, Səttar Mehbalıyev Zauru əleyhimə ərizə yazmağa vadar edib. Guya Zaurun ərizə yazmaq, şikayət etmək fikri olmayıb. Zaur bir-iki ay obyekti işlədəndən sonra yenə qamarlayıb əlindən aldılar”.
Aslan İsmayılov Səttar Mehbalıyevin dediyi “torpaq qalmaqalına” da aydınlıq gətirib: “Onun torpaqla bağlı dedikləri də yalandır. Mənə məxsus torpaqla Zaurun obyekti Bibiheybət qəsəbəsinin əks qütblərindədir. Sadəcə Səttar Mehbalıyev Bibiheybəti dədə malı kimi zəbt edib. O, bütün məhkəmələri qanunla yox, dostu Ramiz Rzayev və qudası Əli Həsənovun hesabına udub. O cümlədən, Zaurun, başqa iş adamlarının məhkəməsini. Hamısını tapşırıqla udub. Hələ mən rəhbəri olduğu təşkilatın balansında olan sanatoriyaların ərazisini demirəm. Mənim də həmin qəsəbədə mənə 2,6 sot torpağım var. Onu əlimdən almaq istəyirdi. Məhkəmə yoluyla qarşısında duruş gətirə bilmədiyimi görüb, əlimdə olan faktlarla mətbuatda çıxış etdim. Bundan sonra mənə xəbər göndərdi ki, məhkəmə qərarı çıxarsa da, torpağına hasar çəkməyinə etiraz etmir. Mən də hasarı qanunu mənə çatacaq səddində çəkdim və bir ildən artıq da durur. Xahiş etmədən məcbur etmişəm və torpağı geri almışam”.
Vəkil onu da deyib ki, Zaur Həsənovun özünü yandırmasını mətbuatdan yox, Səttar Mehbalıyevin onun yanına göndərdiyi adamdan eşidib: “Səttar Mehbalıyevin tapşırığıyla gələn adam Zaurun özünə qəsd etdiyini bildirdi. Sonra da Səttar Mehbalıyevin sözünü çatdırdı. Dedi ki, mən bu işə münasibət bildirsəm hasarımı sökdürəcək. Bəlkə də işə bu qədər aktiv qoşulmazdım. Ancaq göndərdiyi bu sifarişi təhqir kimi qəbul etdim. Naharı həmişə Konfradasiyanın yaxınlığında olan kafedə edirəm. Oradan çıxanda Səttar Mehbalıyevin yanına getdim. İnanmırdım ki, məni qəbul edər. Dərhal qəbul etdi. Dedim, mənə ismarış göndərmisən, vaxtında səni xəbərdar etmişdim ki, elədiklərin havayı ötməyəcək. Cavabı bu oldu ki, heç nə etməyib. Bildirdim ki, mənim torpağımı əlimdən almısan Hacıbala Abutalıbov da sizə görə mənə sənəd vermir. Hacıbala Abutalıbov söhbəti ortaya bu cür çıxıb. Ondan Hacıbala Abutalıbovdan xahiş etməyi istəməmişəm”.
Aslan İsmayılov qeyd edib ki, deputat bu əməlinə görə cinayət məsuliyyətinə cəlb olunmalıdır: “Barəsində Cinayət Məcəlləsinin 125-ci maddəsiylə cinayət işi açılmalıdır, vəzifəsindən azad olunmalıdır, deputat mandatına xitam verilməlidir. Dünən (srağagün-red) Zaur Həsənova şantajçı deyən Səttar Mehbalıyev bu gün (dünən-red) prezidentin müdaxiləsi olduğuna görə konfedrasiyanın hesabına ona 100 min manat pul ayırır. Uşaqlarına yardım edir. Zaura daha çox yardım ayrılmalıdır, ancaq konfredasiyanın hesabından yox, Səttar Mehbalıyevin şəxsi vəsaitindən ayrılmalıdır. Niyə şantajçı dediyinə belə qayğı göstərir? Səttar Mehbalıyev elə düşünürdü ki, torpağımı mənə qaytarmaqla satın alacaq, susacam. Bir daha təkrar edirəm, mən mübarizəni sona kimi aparacam”.