Xəbər verdiyimiz kimi, Azərbaycan Həmkarlar İttifaqları Konfederasiyası (AHİK) II qrup Qarabağ əlili Zaur Həsən oğlu Həsənovun ailə üzvlərini himayəyə götürülməsi haqqında qərar qəbul edib.

AHİK-in mətbuat və ictimaiyyətlə əlaqələr şöbəsinin müdiri Nazim Ağamirov APA-ya bildirib ki, Z. Həsənovun işsizliyini, ailə üzvlərinin sayının çox olmasını və maddi durumunun ağır olduğunu nəzərə alaraq, AHİK-in İcraiyyə Komitəsi qərara alıb ki, Z. Həsənovun övladları yetkinlik yaşına çatanadək AHİK tərəfindən himayəyə götürülür və övladların hər birinə 300 (üç yüz) manat məbləğində aylıq yardım verilir.

Z. Həsənovun sökülmüş obyektinə görə dəymiş ziyanı ödəmək üçün ona 100 000 (yüz min) manat məbləğində maddi yardım edilir. Ona ölkə xaricində müalicəyə ehtiyacı olarsa, bütün xərclər AHİK-in hesabına ödəniləcək.

Qərarda deyilir ki Z. Həsənov və onun həyat yoldaşı ehtiyac olduğu halda işlə təmin olunacaq.

Bu gün Qarabağ qazilərinin nümayəndələrinin və atası Həsən Həsənovun AHİK-in sədri, millət vəkili S. Mehbalıyevlə görüşü olub.

* * *

Azərbaycan Həmkarlar İttifaqı Konfederasiyası (AHİK) özünü yandıran II qrup Qarabağ əlili Zaur Həsənovla bağlı qərar qəbul edib.

Konfederasiyanın sədri, millət vəkili Səttar Mehbalıyev APA-ya bildirib ki, qərara əsasən, Z. Həsənovun ailəsinə övladları yetkinlik yaşına çatana qədər AHİK tərəfindən hər ay 1500 manat vəsait ödəniləcək. Bundan başqa, zərurət yaranacağı təqdirdə Z. Həsənovun xaricdə müalicəsini, ailə üzvlərinin işlə təminatını da konfederasiya öz üzərinə götürüb.

Z. Həsənovun müsadirə olunmuş mülkinə gəldikdə, S. Mehbalıyev bildirib ki, həmin işlə bağlı məhkəmə qərarı var: “Biz məhkəmənin qərarına müdaxilə edə, onu dəyişdirə bilmərik”.



* * * 14:10

Səlim Müslümov da Zaura baş çəkəcək

Dekabrın 25-də Azərbaycan Həmkarlar İttifaqları Konfederasiyasının (AHİK) binasının qarşısında özünü yandıran və hazırda 5 saylı klinik xəstəxanada müalicə olunan II qrup Qarabağ əlili Zaur Həsənovla bağlı vəziyyətə dövlət rəhbərliyi səviyyəsində rəsmən reaksiya verilib.

Virtualaz.org saytının hazırda xəstəxanada olan əməkdaşı xəbər verir ki, bunu Z.Həsənovun hüquqlarını müdafiə edən Vətən Müharibəsi Əlilləri İctimai Birliyinin sədri, I qrup Qarabağ əlili Firudun Məmmədov deyib.

F.Məmmədov daha sonra bunları söylədi: “Əmək və əhalinin sosial müdafiəsi naziri Səlim Müslümov da bu gün Zaura baş çəkməyə gələcək. Səlim Müslümov məmur özbaşınalığından bezərək canına qəsd edən Qarabağ əlilinə nə kömək lazımdırsa, edəcəklərini bildirib. Bundan əlavə, səhiyyə naziri Oqtay Şirəliyev Zaurun və uşaqlarının müalicəsinin nəzarətə götürülməsini tapşırıb. Zauru ziyarətə gələn YAP-çı deputat Siyavuş Novruzov da bizimlə görüşündə dövlət rəhbərliyinin tapşırığı ilə gəldiklərini dedi”.

Əməkdaşımız onu da bildirir ki, bu dəqiqələrdə Qarabağ əlilləri ilə AHİK sədri, deputat Səttar Mehbalıyev arasında təkrar görüş olub.

F.Məmmədov dedi ki, S.Mehbalıyev Zaurun bütün problemlərinin həllini öhdəsinə götürüb: “Səttar Mehbalıyev dedi ki, Zaurun durumu nisbətən yaxşılaşandan sonra onu öz hesabına Türkiyəyə müalicəsini davam etdirməyə göndərəcək. Biz çayxananın geri qaytarılamasını, bankın pullarının ödənilməsini tələb etdik. Mehbalıyev bu problemlərin də həll olunacağını vəd etdi”.



* * * 12:28

Dekabrın 25-də Azərbaycan Həmkarlar İttifaqları Konfederasiyasının (AHİK) binasının qarşısında özünü yandıran II qrup Qarabağ əlili Zaur Həsənovun durumu ağırlaşıb.

Virtualaz.org saytının Z.Həsənovun müalicə olunduğu 5 saylı klinik xəstəxanasında olan əməkdaşı xəbər verir ki, Qarabağ əlilinin təzyiqi düşüb, nəfəs alması çətinləşib. Buna görə də o, bu gün səhərə yaxın süni nəfəs aparatına qoşulub.

Zauru müalicə edən həkimlə əlaqə saxlayan atası Həsən Həsənov bildirdi ki, gecədən indiyədək yarasından irinli qan gəlib: “Ağrılara dözmür, iynələrin təsiri bitən kimi kritik vəziyyətə düşür”.

Yaxınlarının sözlərinə görə, Zaur 6 nəfərlik palatada qalır: “Hamısı ağır xəstələrdir. Belə ağır xəstələrin bir yerdə qalması onlara psixoloji cəhətdən də pis təsir edir. Danışa bilməsə də ağrılardan inildəyir. Həkimlər də Zaur üçün 5 gün kritik vəziyyətin olacağını bildirdilər. Bədəninin 75 faizi yanıb. Həyatı üçün təhlükə qalmaqdadır. Deyirlər gözləri tamam yanıb, təki sağ qalsın, balalarının yanında olsun”.

Əməkdaşımız xəbər verir ki, həkimlər səhiyyə naziri Oqtay Şirəliyevin xəstəxanaya gələcəyini bildirdilər: “Təmizlik işlərinə başlanmışdı. İçəriyə heç kim buraxılmırdı. Xəstə yaxınlarının sözlərinə görə, dünən səhiyyə nazirinin gəlişini eşidən xəstə yaxınları arasında nazirlə görüşmək istəyənlər olub. Hətta övladı əməliyyat edilən xəstə anası qışqıraraq nazirə şikayət edəcəyini deyib. Buna görə də xəstə yaxınlarını bu gün palatalardan çıxararaq şikayətlərin qarşısını almağa çalışıblar”.