İşdən çıxarılanlar aksiyaya hazırlaşır

“Dövlət Neft Şirkəti neftçilərə yeni il münasibətilə “hədiyyə” verdi. ARDNŞ-in Kompleks Qazma İşləri Trestində 7 idarə ləğv olundu”.

Bunu virtualaz.org saytına açıqlamasında Neftçilərin Hüquqlarının Müdafiəsi Təşkilatının sədri Mirvari Qəhrəmanlı dedi.

Hüquq müdafiəçisi bildirdi ki, idarə işçilərinə ARDNŞ prezidentinin əmri barədə məlumat verilib: “Ləğv olunan idarələr bunlardır: Abşeron Qazma İşləri İdarəsi,Sahil Qazma İşləri İdarəsi, Neft Daşları Qazma İşləri İdarəsi,Loqistika və Qazma Servisi İdarəsi, Maddi -Texniki Təchizat İdarəsi, Nəqliyyat İdarəsi, Tompanaj İdarəsi.

M.Qəhrəmanlı virtualaz.org saytının ARDNŞ-də 1100 neftçinin ixtisarı ilə bağlı məlumatın təsdiqləndiyini qeyd etdi: “1100-neftçi işsiz qaldı. İdarə əməkdaşları tərəfindən təşkilatımıza daxil olan məlumatda deyilir ki, ləğv olunmuş idarələrin bir qrup əməkdaşları Prezident Administrasiyasının qarşısında etiraz aksiyası keçirmək niyyətindədilər. Çünki trest saxlanılır və peşakar mütəxəssislər ixtisara salınır. Aparılan müşahidələr də onu göstərir ki, mütəxəssislər işdən çıxarıldığı halda idarə rəislərinin yaxın qohumları olan qeyri-peşəkarlar işdə saxlanılır. Neftçilər də ixtisarların ədalətli olmasını, ədalətli seçim aparılmasını tələb edəcəklər”.

Qeyd edək ki, idarələrin ləğv olunacağı və 1100 neftçinin işdən çıxarılacağı ilə bağlı ilk məlumat virtualaz.org saytında verilmişdi. Amma ARDNŞ-in mətbuat xidmətinin rəhbəri Nizaməddin Quliyevin deyilənlərin yalan olduğunu söyləmişdi: “Mən Mirvari Qəhrəmanlı adlı insanın dediklərinə şərh vermirəm”

Ülviyyə Xuduzadə