Peterburqun ən nüfuzlu iş adamlarından olan Vaqif Məmişov Yeni il ərəfəsində müstəntiqlərin görüşünə gedib, onun biznesi ilə bağlı suallar var

Sankt-Peterburqun ən nüfuzlu biznesmenlərindən olan azərbaycanlı milyarder Vaqif Məmişov Yeni il ərəfəsində istintaq idarəsini ziyarət edib.
Bu şəhərdəki Azərbaycan diasporunun da lideri olan Məmişov Rusiya İstintaq Komitəsinin Moyki çayı sahilində yerləşən regional idarəsində olub.

Belə ki, dekabrın 25-də axşam saat 18:00-da Rusiya İstintaq Komitəsinin Peterburq üzrə Baş İstintaq İdarəsinin binasının qarşısında dövlət nömrə nişanı olmayan qara zirehli “Mercedes” dayanıb. Sürücü mühərriki söndürməyib. “Mercedes”dən 51 yaşlı biznesmen-milyarder, Azərbaycan diasporunun lideri Vaqif Məmişov çıxıb. Az sonra arxada mühafizəçilərin qara “cip”i saxlayıb.

Məmişovu istintaq idarəsinin qapısı ağzına kimi üç mühafizəçi və üç mülki şəxs müşayiət edib. Təxminən 10-15 dəqiqə onu qapıdan içəri buraxmayıblar. Bu müddət ərzində Məmişov telefonla kimlərləsə danışıb. Saat 17:45-də biznesmen binanın içərisinə daxil olub və cəmi 15 dəqiqədən sonra - saat 18:00-da çıxıb. Məmişovun qapıdan çıxaraq sürətlə “Mercedes”ə tərəf getdiyi görünüb.

Bütün bunları müşahidə edən fontanka.ru saytının əməkdaşı Məmişovun İstintaq İdarəsinə nədən getdiyi barədə onun mətbuat katibi Rəşad Orucova suallar verib. Orucov isə “şefin” idarəyə gedişi ilə bağlı dərhal informasiya verə bilməyib və məsələni aydınlaşdırmaq üçün vaxt istəyib.



Təxminən bir saat sonra mətbuat katibi açıqlama verib: “Əlbəttə ki, bu, cənab Məmişovun idarəyə səfəri idi və heç bir istintaqa çağırışdan söhbət getmir. O, Peterburq qubernatorunun milli məsələlər üzrə müşaviri qismində və Azərbaycan diasporunun rəhbəri kimi milli muxtaiyyətlərlə hüquq-mühafizə orqanları arasında qarşılıqlı əməkdaşlığı müzakirə etmək üçün getmişdi. Vaqif İmamoviç idarənin rəhbəri ilə əməkdaşlıq məsələlərini müzakirə etmək istəyib. Ancaq idarənin rəisi Smolnıda müşavirədə olduğundan onun müavini ilə söhbətləşib”.

Lakin fontanka.ru araşdırıb ki, Məmişovun gəlişindən cəmi 15 dəqiqə əvvəl İstintaq İdarəsinin rəisi yerində olub. Üstəlik o, harasa getməyə tələsmirmiş və kabinetində üç nəfərlə söhbət edirmiş.



Bəs o zaman milyarder Məmişovun İstintaq İdarəsində 15 dəqiqə çəkən “danışıqları” könüllü olub, yoxsa müstəntiqlərin ona hansısa sualları var?

Sayt yazır ki, bu ilin iyul ayında Məmişovun “Konrad” şirkətlər qrupunun ofisində iki dəfə axtarış aparılıb. Axtarış vergidən yayınma, büdcə vəsaitlərinin mənimsənilməsi və maliyyə fırıldaqları ittihamı ilə qaldırılmış cinayət işi ilə bağlı olub.

Lakin Məmişovun biznesinin bu cinayət işi ilə əlaqəsi barədə hər hansı ittiham yoxdur. Dekabrın 23-də müstəntiqlər bu cinayət işinin istintaqını tamamlayaraq məhkəməyə təqdim ediblər. Cinayət işində adı keçən üç nəfər, o cümlədən bir vergi məmuru onlara qarşı irəli sürülmüş ittihamları qəbul edir. Məmişovun İstintaq İdarəsinə səfəri isə bu cinayət işinin məhkəməyə göndərilməsindən cəmi iki gün sonra baş tutub.