Sərnişinlərdən biri: “Təyyarə daş kimi aşağı düşdü, hamı elə bildi ki, qəzaya uğradıq...”

Bazar günü - yanvarın 6-na keçən gecə Heydər Əliyev Bakı Beynəlxalq Aeroportuna qəza enişi edən “Airbus A380-800” sərnişin təyyarəsində əsl fəlakət yaşanıb.

Virtualaz.org saytı bu barədə Britaniya KİV-lərinə istinadən xəbər verir. Xatırladaq ki, Sinqapur hava yolları şirkətinə aid təyyarə Londondan Sinqapura uçarkən Bakıya məcburi eniş edib. Rəsmi məlumatlarda təyyarənin məcburi eniş etməsinin səbəbi kimi salonda təzyiqin aşağı düşməsi göstərilib.

Bakı Beynəlxalq Aeroportunun texnikləri nasazlığı aradan qaldıra bilmədiyi üçün “Singapour Airlines” şirkəti sərnişinlərin arxasınca yeni təyyarə göndərməli olub.

Qeyd edək ki, “Airbus A380-800” dünyada ən böyük təyyarədir və onun göyərtəsində 467 sərnişin və 27 heyət üzvü olub.

“The Evening Standart” qəzetinin, BBC dünya xidmətinin və digər Britaniya KİV-lərinin bu insident barədəki xəbərlərində deyilir ki, söhbət heç də xırda texniki nasazlıqdan getmir və nəhəng layner qəzaya uğramaqdan son anda xilas ola bilib.

“Singapour Airlines” şirkətindən yayılan rəsmi açıqlamada deyilir ki, “Airbus A380-800” tipli təyyarə SQ-317 reysi ilə uçmaq üçün yanvarın 5-də axşam Londonun Hitrou aeroportundan havaya qalxıb. Uçuş zamanı təyyarənin salonunda çox güman ki, qapının möhkəm bağlanmaması üzündən hava təzyiqi aşağı düşüb və uçuş heyəti qəza enişi barədə qərar qəbul edib. Bort bələdçilərinə öz yerlərini tutmaq barədə təlimat verilib, sərnişinlər üçün oksigen maskaları açılıb. Təyyarə qəza enişinə keçib və təhükəsiz şəkildə Bakı aeroportuna enib. Aviaşirkət baş vermiş insidentə və narahatçılığa görə sərnişinlərindən üzr istəyir.

Lakin təyyarənin sərnişinlərinin bildirdiyinə görə, vəziyyət əslində kifayət qədər dramatik olub. Sərnişinlərdən biri BBC-yə bildirib ki, təyyarə göydən sanki daş kimi yerə düşməyə başladı.



“Mən elə bildim ki, hamımız öləcəyik. Heç bir xəbərdarlıq edilməmişdi, təyyarə sadəcə olaraq kəskin şəkildə idarə edilməyən formada aşağı düşdü, oksigen maskaları avtomatik olaraq açıldı, salonda dəhşətli anlar yaşandı. Hamı avtomatik olaraq düşündü ki, təyyarə qəzaya uğrayır” - deyə sərnişin bildirib.

Digər sərnişin isə “The Strait Times”ə bildirib ki, əslində təyyarədə problem uçuşun 20-ci dəqiqəsindən etibarən meydana çıxmışdı. Lakin heyət və təyyarə komandiri bu barədə sərnişinlərə heç bir xəbərdarlıq etmədi. Sərnişinin bildirdiyinə görə, təyyarə bazar günü London vaxtı ilə saat 11:15-də Hitrou aeroportundan havaya qalxıb. 20 dəqiqədən sonra təyyarənin qapılarının birindən möhkəm səs gəlib, ardınca salona soyuq hava axını daxil olmağa başlayıb. Bu vəziyyət bir neçə saat davam edib. Salonda təzyiq o dərəcədə aşağı düşüb ki, oksigen maskaları avtomatik olaraq açılıb. Oksigen maskaları o zaman avtomatik olaraq açılır ki, təyyarə qəza vəziyyətində olur. Yalnız bundan sonra ekipaj qəza enişi barədə qərar verib və təyyarə yaxınlıqdakı Bakı aeroportuna enib.

Təyyarə Bakıda enəndən sonra sərnişinlər saatlarla aeroportun gözləmə salonunda gözləməli olublar. Terri Mann adlı sərnişin facebook səhifəsində yazıb ki, reyslə uçan sərnişinlərin aqibətinin necə olacağı barədə informasiya verən yoxdur. Onlar Bakı aeroportunda ilişib qalıblar.

Mark Franklin adlı digər sərnişin isə yazıb: “Mən də həmin təyyarədə idim... Yaranmış nasazlıq barədə ekipaj bizə heç bir informasiya vermirdi, yalnız 4 saat sonra bildirildi... Otel yoxdur, bizim də vizamız olmadığından aeroportun terminalının mərtəbələrinin birində gözləməkdəyik. Deyirlər yeni təyyarə üçün hələ 14 saat gözləməliyik”.

Başqa bir sərnişin də təsdiq edir ki, oksigen maskaları təyyarənin salonunda havanın təzyiqinin aşağı düşməyə başlamasından ancaq 4 saat sonra açılıb.

Natan Felps adlı sərnişin isə “Channel News Asia” telekanalına bunları deyib: “Uçuş başlayandan sonra çox keçmədən qapıdan səs gəldi, ardınca salona soyuq hava daxil olmağa başladı. Sanki biz Pakistanın dağlıq ərazilərində gedirdik. Sonra təyyarə qəfildən sözün hərfi mənasında sürətlə yerə düşməyə başladı, çox sürətlə. Önümdəki ekranda görürdüm ki, hündürlük çox sürətlə aşağı düşür. Biz 2 dəqiqə ərzində 20 min fut (təxminən 7 min metr) hündürlük itirdik. Oksigen maskaları avtomatik açıldı, ardınca qəza xəbərdarlığı edildi. Salonda əlbəttə ki, panika var idi, ancaq mən deməzdim ki, böyük panika oldu. Sonra təyyarədə qorxunc sükut hökm sürdü. Komandir elan etdi ki, salonda təzyiq aşağı düşdüyü üçün qəza enişi ediləcək”.