Direktorlar müəllimləri özləri sığorta edib

Lənkəran Rayon Təhsil Şöbəsində rüşvətxorluq, korupsiya halları rekord həddə çatıb. Məlumatı əməkdaşımızla söhbətləşən müəllimlər verib. Təzyiqə məruz qala biləcəklərini nəzərə alaraq, hələlik onların adlarını açıqlamırıq.
Əslində burada kimlərinsə adını çəkməyə də ehtiyac yoxdur, bu barədə rayonda həta təhsil sahəsində işləməyənlər belə məlumatlıdır. Hamıya bəlli olan halların və faktların isə sübuta ehtiyacı yoxdur.
Rayonun təhsil müəssisələrində 4300 nəfərə yaxın pedaqoji işçi çalışır. Müəllimlərin əmək haqqının elə də yüksək olmadığı hər kəsə məlumdur. Deyə bilərsiniz ki, bu, mərkəzi icra hakimiyəti orqanlarından asılı məsələdir, təhsil idarəsinin rəhbəri maaşları artıran deyil ki. Amma olan bu az maaşın da bir hissəsinin müəllimlərin əlindən alınması insafdandırmı?
Müəllimlər deyir ki, rayon təhsil şöbəsinin müdiri Şəhanə Əhmədovanın qeyri-qanuni göstərişinə əsasən məktəb direktorları tabeliyində çalışan müəllim və digər işçilərin hər birinin aylıq əmək haqqından məcburi qaydada 10 manat pul toplayır. “Niyə etiraz, şikayət etmirisniz?” deyə soruşanda, eyni cavabı eşitdik: “Səsimizi çıxarsaq, dərs saatımız azalar, işdən qovula bilərik.” Öyrənirik ki, problem təkcə aylıq tutulan bu 10 manat deyil.
Sığorta pulu adıyla rayon üzrə bütün təhsil işçilərindən ayda 10 manat olmaqla 3 ay müddəti üçün adambaşına 30 manatdan pul yığılıb. Yeri gəlmişkən, belə hal ötən ildə də olmuşdu. Təhsil işçləri toplanılan vəsaitin sığorta təşkilatının hesabına ödənilməsinə şübhə edir: “Bizimlə müqavilə bağlanılmayıb, pulun alınmasına dair qəbz verilməyib.” “Sığorta pulu” bir çox təhsil müəssisələrində pedaqoji kollektivlə direktor arasında mübahisə və narazılıq yaradıb.
Ödənilən məbləğə görə təminatın hüquqi sənədlərlə rəsmləşdirilməsini tələb edən müəllimlərə direktorlar bu təminatı kişi sözü ilə, and-amanla, söyüş qoymaqla veriblər.
Digər problem həmkarlar təşkilatı ilə bağlıdır. Təhsil İşçilərinin Azad Həmkarlar İttifaqının Lənkəran rayonu üzrə də komitəsi fəaliyyət göstərir. Üzvlük azad olsa da, təhsil işçilərinin hamısı zorən bu quruma üzv edilib və onların aylıq əmək haqqının 2 faizi üzvlük haqqı olaraq tutulur.
Həmkarlar ittifaqının illik gəliri 120 min manatdan yuxarıdır. Amma müəllimlər deyir ki, son 5 ildə bu təşkilatın fəaliyyətini hiss etməyiblər, kiməsə yardım göstərməyi barədə eşitməyiblər.
Onlar deyir ki, həmkarlar ittifaqının sədri Qürbətəli Zeynalov futbol matçına canlı baxmaq üçün xarici ölkələrə gedir. Qayıdandan sonra öz təəssüratlarını təhsil işçiləri ilə həvəslə bölüşür.
Rayon təhsil şöbəsini tərəfindən büdcə vəsaitlərindən, yumşaq desək, səmərəsiz istifadə edilir. İlkin araşdırmalarımız bunu deməyə əsas verir ki, malların alınması, iş və xidmətlərin görülməsi üçün tenderlər formal olaraq keçirilib, xeyli məbləğ təşkil edən vəsaitlər kağız üzərində silinib.

Murad