Valideynlərinin çoxsaylı müraciətlərinə, ərizə və şikayətlərinə etinasız yanaşıldığından 8 yaşlı Şəhriyar Əliyev onu və valideynlərini qəbul etmək xahişi ilə səhiyyə naziri Oqtay Şirəliyevə müraciət edib. Bu barədə məlumat Şəhriyarın anası Şəhla Əliyeva tərəfindən verilib.
Xatırladaq ki, Şəhriyar Əliyev 2011-ci ildə səhv həkim müalicəsi nəticəsində ağır vəziyyətə düşüb və hazırda olduqca ağlr durumdadır. Onun müalicəsi yalnız Danimarkada mümkündür.

Müraciətdə deyilir: “Mənim 8 yaşım var. Əvvəllər rəqqas olmaq istəyirdim. Buna görə də rəqs dərslərinə gedirdim.
Bilirəm ki, Siz rəqqaslıqla bağlı işlərə baxmırsız. Rəqqaslıq mənim arzum idi. Problemim isə üzləşdiyim xəstəliklə bağlıdır.
Mən əvvəllər sağlam idim. Hər gün rəqs dərslərinə gedirdim. Amma bir gün xəstələndim və həmin vaxtdan rəqsə gedə bilmirəm.
Xəstəliyim soyuqlama idi. Bizim evlərə baxan həkim Feriyal xala gələrək, məni yoxladı və mənə dərmanlar yazdı. Onun yazdığı dərmanı aldılar və mənə içirməyə, iynə vurmağa başladılar. Amma hər iynəni vurandan sonra vəziyyətim daha da pisləşirdi. Gözüm qaralırdı, titrəmə keçirirdim. Anam bundan narahat olub hər dəfə Feriyal xalaya zəng etdikdə o deyirdi ki, narahat olmayaq, iynələri vurmağa davam edək. Mən ağlasam da, iynəni vurmağa davam edirdilər. Amma bir neçə gün sonra halımın daha da ağırlaşdığını görüb, məni xəstəxanalara apardılar. Daha sonra isə yoxlama üçün başqa ölkəyə getdik. Ancaq bunun da faydası çox az oldu.
Həmin vaxtdan mən evdən bayıra çıxmağa çətinlik çəkirəm. Valideynlərim danışanda eşidirəm ki, mən həkimin səhvindən bu vəziyyətə düşmüşəm və sağalmağım ancaq başqa ölkədə mümkündür. Mənə böyük yaşda uşaqlar üçün nəzərdə tutulan iynə vurulub.
Hörmətli nazir!
Neçə ildir məni çoxlu xəstəxanalara aparırlar. Amma heç bir faydası yoxdur. Siz isə valideynlərimin şikayətinə baxmırsız. Onlar Sizə çoxlu məktub yazıblar. Siz o məktubların heç birinə cavab vermirsiz.
Mən də başqa uşaqlar kimi həyətdə oynamaq, məktəbə getmək, oxumaq istəyirəm. Daha rəqqas olmaq istəmirəm. İndi yaxşı həkim olmaq istəyirəm. Elə bir həkim ki, uşaqları xəstələndirməsin və onları tez sağaltsın. Amma bu arzuma çatmağım üçün Sizin köməyinizə ehtiyacım var.
Xahiş edirəm, məni valideynlərimlə birlikdə qəbul edib dinləyəsiz”.