Fermerlər Allahın ümidinə buraxılıb

Qəzetimizin ötən saylarında Neftçala Suvarma Sistemləri İdarəsinin fəaliyyətində yer almış çeşidli nöqsanlara dair rayondakı mənbələrdən aldığımız məlumatlar əsasında hazırlanmış tənqidi materiallar dərc olunmuşdu. Həmin məlumatlarda yerli fermerlər Neftçala Suvarma Sistemləri İdarəsinin fəaliyyətində çoxsaylı nöqsanların olduğundan, idarənin rəisi Elçin Əsədov tərəfindən ciddi qanun pozuntularına yol verildiyindən şikayətlənirlər. Qeyd olunur ki, melioratorlar tərəfindən bir çox vacib suvarma tədbirləri vaxtında həyata keçirilmir, görülən işlər isə keyfiyyətsiz və az effektli olur.
Suvarma kanallarında, kollektor-drenaj şəbəkəsində lildən təmizləmə işləri də yarımçıq görülür. Fermerlər, şəxsi təsərrüfat sahibləri iddia edirlər ki, idarənin əməkdaşları tərəfindən yerlərdə verilən suyun qənaətlə işlədilməsi və bərabər qaydada paylanmasına nəzarət adı altında özbaşnalıqlara yol verilir. Bunun nəticəsində isə ayrı-ayrı əkin sahələri, bütov təsərrüfatlar susuz qalırlar.Məlum olduğu kimi Neftçala rayonunda iqtisadiyyatın əsasını məhz kənd təsərrüfatı təşkil edir. Məhz elə bu səbəbdən də rayon iqtisadiyyatının inkişafı üçün Neftçala Suvarma Sistemləri İdarəsinin fəaliyyəti xüsusi əhəmiyyət kəsb edir.
Rəsmi məlumatlara görə hazırda rayonun suvarma şəbəkəsində 40 nasos stansiyasında 96 nasos aqreqatı və bunlara xidmət edən 40-a yaxın vakuum nasosları fəaliyyət göstərir. Mənbələr xüsusi olaraq vurğulayırlar ki, hələ bu yaxınlara qədər idarə rayonda 2600 hektar pambıq, 23789 hektar taxıl, 10120 hektar yonca, 1400 hektar həyətyanı sahələrin, 12 hektar bostan-tərəvəz sahələrinin və 34123 nəfərə verilmiş pay torpaqlarının suvarılmasını böyük zəhmət bahasına da olsa vaxtlı-vaxtında həyata keçirirdi. Ərazilərdəki əkinlərin suvarılması işini həyata keçirən Sudan İstifadə Birliklərinin fəaliyyətini də Suvarma Sistemləri İdarəsi daima nəzarətdə saxlayır, hər zaman lazım olan köməkliyi göstərirdi.
Təəssüflər olsun ki, həmin illərdə suvarma idarəsinin rəis müavini işləmiş E.Əsədov, özü rəhbərliyə gəldikdən sonra bu idarənin ənənələrini yaşada bilməmişdir. Suvarma idarəsinin fəaliyyəti ketdikcə tənəzzülə uğramış, bu isə yerli sakinlərin işlərinə olduqca mənfi təsir göstərmişdir. Bu gün isə narazı fermerlər hətta iddia edirlər ki, idarənin maddi-texniki bazasının möhkəmləndirilməsi, işin keyfiyyətinin yüksəldilməsi məqsədi ilə ayrılan dövlət vəsaitlərinin mənimsənilməsi hallarına da rəhbərlik tərəfindən geniş yer verilir. İdarənin balansında olan texnika, avadanlıq və mexanizmlərin köhnəlməsi adı ilə onların balansdan çıxarılaraq satılması nəticəsində külli-miqdarda pul əldə olunur.
Güc transformatorlarının, elektrik mühərriklərinin, nasos aqreqatlarının əsaslı təmiri adı altında külli miqdarda dövlət maliyyəsi hesabdan çıxarılaraq xərclənsə də, əslində bu avadanlıqlara texnik xidmət də çox aşağı səviyyədədir. Texnikanın nasaz vəziyyətdə saxlanması səbəbindən daşqın və selə qarşı mübarizə məqsədilə çay məcralarının təmizlənməsi və daş bəndlərin qurulması işlərində onların köməyinə də bel bağlamaq olmur. Bunu da qeyd etməliyik ki, Neftçala Suvarma Sistemləri İdarəsinin rəisi Elçin Əsədovun yarıtmaz fəaliyyətinə dair şikayət məktubları ölkənin əksər informasiya vasitələrinə də daxil olmaqdadır. Rayondakı mənbələr yekdilliklə təsdiq edirlər ki, Nefçala rayon Suvarma Sistemləri İdarəsinin işində yer almış bütün korrupsiya hallarını ifşa etmək üçün daha ciddi yoxlamalara ehtiyac vardır.

Kənan