İxtisasca hərbiçi olan Əhməd Mehbalıyev Laçın, Qubadlı, Kəlbəcər və Tərtər döyüşlərində iştirak edib, Ağdamda düşmən mühasirəsinə düşərək həlak olub; hazırda Şəhidlər Xiyabanında uyuyur...
Qarabağ qazisi Zaur Həsənovun ölümü ilə diqqət mərkəzinə gələn AHİK-in sədri Səttar Mehbalıyev barədə iddiaların biri doğrulub. Belə ki, onu bu proseslərdə müdafiə edənlərin belə bir arqumenti vardı: “Səttar Mehbalıyev özü şəhid ailəsidir, qardaşı Qarabağ uğrunda gedən döyüşlərdə həlak olub... ”

Mehbalıyevin şəhid ailəsi olmasına inanmadılar...

O zaman çoxları bu iddiaya inanmadı. Lakin bu faktla dərindən maraqlanan da olmadı. Səttar Mehbalıyevin özü və onun müdafiəsini quranlar da faktla bağlı ayrıntılı bilgi vermədilər.

Zaur Həsənovun özünü yandırması hadisəsi ilə bağlı yeni məlumatlar yayılanda və bu məsələnin arxasında sabiq müdafiə naziri Səfər Əbiyevə yaxın bir şirkətin -"Edis Qroup"-un dayanmasına dair iddialar mediaya yol tapanda Mehbalıyevin personası yenidən diqqət mərkəzinə gəldi. AHİK-in müvafiq strukturundan sənədli-sübutlu yayılan sensasion açıqlamadan belə məlum oldu ki, əslində Z. Həsənovu özünü yandırmağa vadar edən faktlar şişirdilib. Belə ki, sənədlərlə sübut olunurdu ki, Bibiheybət qəsəbəsi, “Şıx” sanatoriyasının ərazisində yerləşən çayxananın faktiki qeyri-rəsmi sahibi “Edis Qroup” şirkəti olub və bu obyektə dair bütün xərcləri də o çəkib. Yerli mediaya dərhal məlumat sızdırıldı ki, bu şirkət Səfər Əbiyevin adamlarına məxsusdur və mümkündür ki, qazını radikal addımlara Əbiyevin klanı təhrik edib. Məhz bu iddiaları özündə daşıyan yazılara verilən şərh və müzakirələrdə S. Mehbalıyevin özünün “yaxşı adam və şəhid ailəsi” olması iddiası yenidən gündəmə gəldi.

Həqiqəti yazılara şərh yazan “Aida” açdı...



Musavat.com saytında gedən yazıların birinin altında isə oxucular mübahisəyə başladılar. “Nurlan” niki ilə şərh yazan oxucu iddia edirdi ki, Mehbalıyevin qardaşı Qarabağda şəhid olub. “Mery911" niki ilə yazan oxucu da israr edirdi ki, yalandı, sübut elə. Nəhayət ”Aida" nikli oxucu belə bir şərh yazdı: “Sizin sualınızı cavablandırıram. Əhməd Mehbalıyev Ağdam uğrunda döyüşlərdə qəhrəmancasına şəhid olub. Dəfn olunduğu yer Şəhidlər Xiyabanı. 01.09.1968-25.06.1993. Gedib qəbrinin üstünə qərənfillər qoya bilərsiniz. Allah Şəhidlərimizə rəhmət etsin”.

Şəhid Mehbalıyevin qəbri tapıldı...

Müxbirimiz məhz bu məlumatdan çıxış edərək, Şəhid Əhməd Mehbalıyevin qəbrini görüntüləmək üçün Şəhidlər Xiyabanında olub.

Qarabağ şəhidlərinin basdırıldığı xiyabanda onun məzarını tapmaq xeyli çətin oldu. Xiyabanın təmizlik işi ilə məşğul olan Səyyarə xanım bizə bu məsələdə kömək etdi. Məzarı tapdıq. Səyyarə xanım deyir ki, şəhid Əhmədin məzarını tez-tez ziyarətə gələnlər olur: “Gələnlərdən təkcə qardaşını tanıyıram. Deyəsən Milli Məclisdə deputatdır. Keçən dəfə də bizi danladı ki, bəs məzarların üstünü təmizləyin. Dedim siz desəniz də, deməsəniz də biz bu məzarları hər gün silirik. Köhnə mərmərlərdir. Nəm parça vuran kimi bozarır”.

Uşaqlıq arzusu hərbiçi olmaq imiş

“Azərbaycan bayrağı” ordenli şəhid Əhməd Mehbalıyev haqqında ətraflı məlumatı “Azərbaycanın Milli Qəhrəmanları” kitabından əldə etdik.

Əhməd Suliddin oğlu Mehbalıyev 1968-ci il sentyabr ayının 1-də Naxçıvan Muxtar Respublikasının Şərur rayonunun Qıvraq kəndində anadan olub. Atası Süliddin, anası Firənginaz xanımın ən böyük arzusu Əhmədi hərbiçi görmək imiş. Hərbiçi olmaq Əhmədin də uşaqlıq arzusu olub. Əhməd özünün və valideynlərinin istəyi ilə ilk olaraq sənədlərini Cəmşid Naxçıvanski adına Bakı Ali Ümumqoşun Komandirləri Məktəbinə verib. C.Naxçıvanski adına Bakı Ali Ümumqoşun Komandirləri Məktəbini bitirdikdən sonra Əhməd hərbi sirlərə daha da yiyələnmək məqsədilə Kazan Ali Tank Qoşunları Məktəbinə daxil olub. O, oxuduğu illərdə daima SSRİ-nin ən ali hərbi məktəbinin komandirlərinin rəğbətini qazanıb, öncül kursantlardan olub.

Daha sonra o, Kiyevdə, Moskvada SSRİ-nin tank qoşunları diviziyalarında xidmət edib. Qarabağda müharibə başlayanda Ə.Mehbalıyev vətənə qayıdıb. Əhməd bir təcrübəli tankçı kimi ilk döyüşə Şuşada başlayıb. Şuşanın müdafiəsi uğrunda mərd və qəhrəmancasına döyüşüb. Saysız erməni tankını sıradan çıxarıb. Sonralar o, rota komandiri kimi Laçın, Qubadlı, Kəlbəcər, Tərtər bölgələrində gedən ağır döyüşlərdə iştirak edib.

25 iyun 1993-cü il Əhmədin son döyüşü olub. O, düşmənlə açıq döyüşdə qəhrəmancasına şəhid olub.

Əhmədin komandiri baş leytenant P.Mahmudov Əhmədin sonuncu döyüşü haqqında danışanda bunları deyib: “Bir il idi ki, birlikdə vuruşurduq. Çox komandirlər görmüşdüm, amma tank komandiri Əhməd Mehbalıyev kimi özünü odun-alovun içinə atanı görməmişdim. Elə bil ki, sıravi döyüşçü idi. Dəfələrlə çıxılmaz vəziyyətdə qalan taqımı səriştəsi və bacarığı hesabına itkisiz xilas etmişdi. Heç vaxt özünü gözləmirdi. Elə o axırıncı döyüşdə də kişi kimi döyüşdü. Ağır yaralansa da, döyüşdən çıxmırdı. Ağdamın Qızıllı-Kəngərli kəndindəki döyüşü daha ağır keçdi. Düşmən həddən artıq güclü texnika ilə hücuma keçmişdi. Əhməd idarə etdiyi tankla bir neçə saat bu hücumun qarşısını ala bilsə də, özü barədə düşünmədi. Sentyabr ayında 25 yaşı tamam olacaqdı, onu vaxtsız itirdik...”.

22 iyul 1989-cu il tarixdə ali hərbi məktəbi bitirdiyi üçün leytenant, 26 iyul 1991-ci il tarixdə baş leytenant rütbəsi alan Əhməd Mehbalıyev Azərbaycan Respublikası Prezidentinin 25 iyun 1994-cü il tarixli fərmanı ilə “Azərbaycan Bayrağı” ordeninə layiq görülüb.

Qaraçuxur qəsəbəsindəki “Gənclik” küçəsinə onun adı verilib.

***
Beləliklə, “Qarabağ qazisinə zülm edən Mehbalıyev”in özünün şəhid qardaşının olması təsdiqləndi. Mehbalıyevlərdən biri Qarabağ uğrunda gedən döyüşlərdə həyatından keçərək, şəhidlik mərtəbəsinə yüksəlibmiş. Təbii ki, bu fakt onun məmur qardaşı Səttar Mehbalıyevlə bağlı ittihamlara yenidən baxmaq zərurəti yaradır. Lakin Konfederasiya sədrini Qarabağ qazisi Zaur Həsənovun ruhu, ailə üzvləri və bütövlükdə müharibə veteranları qarşısında məsuliyyətdən azad etmir.

Qazilərlə hər kəs sayğılı davranmalı, onların səhvlərini belə doğru qəbul edərək, hər kaprizlərini çəkməlidir. Qarabağ qaziləri Azərbaycanın ən böyük dəyəri və sərvətidir. Allah onlara uzun ömür, Azərbaycan iqtidarına da onların xidmətində duracaq qədər səbat versin.

Cəmi Şəhidlərimizə isə Allahdan rəhmət diləyirik.